Mae'r ymosodwr 27 mlwydd oed wedi rhwygo cyhyr llinyn y gar, anaf sy'n cymryd hyd at 12 wythnos i wella. Dioddefodd Chopra yr anaf wedi 25 munud o gêm gyfartal Caerdydd yn erbyn Barnsley ddydd Sul, ac fe adawodd y maes ar ben stretsier. "Mae profion wedi cadarnhau'r gwaethaf," dywedodd Caerdydd mewn datganiad. "Mae'n siomedig iawn i bawb." Mae Chopra wedi sgorio 11 gôl mewn 32 ymddangosiad i Gaerdydd y tymor yma. Mae'i anaf yn golygu mai Jay Bothroyd, Craig Bellamy a Jon Parkin yw'r unig ymosodwyr holliach yng ngharfan Caerdydd wrth i'r tymor gyrraedd diweddglo hynod gyffrous. Pedwerydd yn y Bencampwriaeth yw safle'r Adar Gleision ar hyn o bryd gyda naw gêm o'r tymor yn weddill. Mae bwlch o 11 pwynt at y tîm ar y brig, Queens Park Rangers, ond mae Norwich, sy'n ail, o fewn cyrraedd a hwythau pedwar pwynt ar y blaen. Mae'r ddau dîm ar y brig yn ennill dyrchafiad i'r Uwch Gynghrair, gyda'r timau sy'n gorffen o'r trydydd i'r chweched safle yn brwydro am un lle mewn gemau ail-gyfle.
 | 
