Nid yw Jones - yn ystod ei yrfa fel chwaraewyr neu reolwr - wedi bod yn rhan o rownd derfynol Cwpan FA Lloegr o'r blaen.

Chwaraeodd Jones i Everton yn Wembley ym 1977, ond yn rownd derfynol Cwpan y Gynghrair oedd hynny.

"Yn fy marn i hon yw'r gystadleuaeth gwpan fwyaf yn y byd," meddai Jones. "Yn blentyn 'da chi'n breuddwydio cael bod yn rhan o' rownd derfynol.

"Bydd arwain Caerdydd yn anrhydedd mawr ac mae'n deimlad arbennig bod yn rhan o'r holl beth.

"'Da ni'n gwybod y bydd 'na gynulleidfa fyd-eang sydd yn beth gwych i Gaerdydd.

"Bydd hi'n ddiwrnod gwych ond mae gennym un peth mewn golwg sef ennill y gwpan ond 'da ni'n gwybod y bydd hi'n dasg anodd."

"Mae nhw'n dîm o safon gyda chwaraewyr o safon a bydd yn rhaid i ni fod ar ein gorau ac os gallwn ni wneud hynny da ni'n gallu cystadlu gydag unrhyw dim," meddai Jones.

Mae Jones yn cydnabod mai Portsmouth o'r Uwchgynghrair fydd y ffefrynnau i ennill y gwpan am y tro cyntaf ers 1939.

"Mae'r pwysau ar Portsmouth i ennill, mae pobl yn disgwyl iddynt ennill.

"Mae pobl wedi dweud wrthyf y dyle ni fynd yno a mwynhau ac mae pawb yn rhoi cyngor i mi ar sut i ennill y gwpan."

Y rheolwr y bydd Jones yn wynebu yn Wembley yfory yw Harry Rednkapp, gŵr arall sydd â phrofiad helaeth o'r gêm.

"Mae Harry yn rheolwr da ac yn haeddu'r holl glod, ond gobeithio 'na fydd ddydd Sadwrn."