Lleoliad	Ffrainc
Timau	32
Pencampwyr	Ffrainc
Prif Sgorwyr	Davor Šuker  6 gôl

O'r herwydd, roedd Siapan, De Affrica a Jamaica yn gwneud eu hymddangosiad cyntaf yng Nghwpan y Byd.

Ac yn dilyn cwymp yr hen Iwgoslafia, roedd Croatia yn ymddangos am y tro cyntaf hefyd.

Llwyddodd Nigeria i drechu Sbaen yn eu gêm agoriadol, ac er i'r Sbaenwyr chwalu Bwlgaria 6-1 yn eu gêm olaf, llwyddodd Paragwai i drechu Nigeria a sicrhau bod y Sbaenwyr yn dychwelyd adref yn gynnar.

Ond yng ngêm fwyaf tanllyd y rowndiau agoriadol llwyddodd Iran i drechu America 2-1 diolch i goliau Hamid Estili a Mehdi Mahdavikia.

Yn yr ail rownd, llwyddodd Laurent Blanc i rwydo yr unig gôl aur yn hanes y bencampwriaeth wrth i'r tîm cartref drechu Paragwai a llwyddodd Yr Ariannin i drechu 10-dyn Lloegr ar giciau o'r smotyn wedi gêm danllyd yn St Etienne.

Synnwyd y byd pêl-droed wrth i Croatia drechu'r Almaen 3-0 yn rownd yr wyth olaf a rhoddodd dîm Miroslav Blazevic fraw i Ffrainc yn y rownd gynderfynol hefyd.

Llwyddodd Davor Šuker i roi Croatia ar y blaen ond rhwydodd Lilian Thuram ddwy gôl i sicrhau eu lle yn y rownd derfynol.

Brasil oedd gwrthwynebwyr y Ffrancwyr wedi iddynt drechu'r Iseldiroedd ar giciau o'r smotyn.

Ond roedd dryswch mawr cyn y rownd derfynol ym Mharis wedi newyddion syfrdanol fod seren Brasil, Ronaldo, wedi ei adael allan o'r tîm.

Ond wrth i'r wasg ddarlledu'r newyddion i bedwar ban byd, cafwyd cywiriad i'r rhestr timau a'r tro hyn, roedd y gŵr o Frasil wedi ei gynnwys wedi'r cwbwl.

Roedd y gêm ei hun yn gwbl ddi-fflach wedi'r holl gyffro cyn y chwiban gyntaf, a llwyddodd Zinedine Zidane i rwydo ddwywaith cyn i Emmanuel Petit ychwanegu trydedd gôl i sicrhau buddugoliaeth cartref.