Roedd yn hynod eironig, mai yng Ngorllewin yr Almaen cynhaliwyd yr unig bencampwriaeth welodd Dwyrain yr Almaen yn cyrraedd y rowndiau terfynol.

Lleoliad	Gorll. Almaen
Timau	16
Pencampwyr	Gorll. Almaen
Prif Sgoriwyr	Grzegorz Lato 7 gôl

Ac wedi'r enwau ddod allan o'r het ar gyfer y rowndiau terfynol, roedd y ddwy wlad Almaeneg yn yr un grŵp.

Wrth i'r ddwy wlad gwrdd am yr unig dro yn eu hanes, cafwyd un o ganlyniadau mwyaf annisgwyl y bencampwriaeth wrth i Jürgen Sparwasser rwydo unig gôl y gêm.

Er y golled llwyddodd Gorllewin yr Almaen i gamu ymlaen i'r rownd derfynol lle roeddent i wynebu un o dimau gorau'r byd - Yr Iseldiroedd.

O dan oruchwyliaeth eu rheolwr, Rinus Michels, roedd yr Oranje a'u chwaraewyr dawnus yn chwarae system Total Football.

Ac er i Johan Neeskens rwydo gôl i'r Iseldiroedd o fewn 90 eiliad i'r chwiban gyntaf, rhwydodd Paul Breitner a Gerd Müller i sicrhau buddugoliaeth i'r tîm cartref.