Cynhaliwyd Cwpan y Byd yn Ewrop am yr ail dro yn olynol wrth i Fifa ddewis Ffrainc fel lleolioad pencampwriaeth 1938.

Lleoliad	Ffrainc
Timau	16¹
Pencampwyr	Yr Eidal
Prif Sgoriwr	Leônidas  8 gôl

Roedd gwledydd De America yn gandryll â'r penderfyniad ac o'r herwydd gwrthododd Wrwgwái a'r Ariannin â chystadlu.

Ond cafwyd y cystadleuwyr cyntaf o Asia wrth i India'r Gorllewin Iseldireg sicrhau eu lle yn y gystadleuaeth.

A chyda Cuba o'r Carîbî a Brasil o Dde America hefyd yn cystadlu, dyma'r bencampwriaeth gyntaf â thimau o bob cwr o'r byd.

Roedd angen amser ychwanegol ar y deiliaid, Yr Eidal, i drechu Norwy yn y rownd gyntaf, ond, wedi trechu'r tîm cytref a Brasil, roeddent yn llawn haeddu eu lle yn y rownd derfynol yn erbyn Hwngari.

A llwyddodd yr Azzuri i dorri eu henwau yn y llyfrau hanes fel y tîm cyntaf erioed i amddiffyn eu coron wedi iddynt drechu Hwngari 4-2 yn y rownd derfynol yn y Stade Colombes ym Mharis.

¹ Er iddynt lwyddo i sicrhau eu lle yn Ffrainc, bu rhaid i Awstria dynnu yn ôl wedi'r Anschluss ym mis Mawrth 1938.