Bryn Fon

Go brin fod neb arall sy'n canu'n Gymraeg yn unig wedi diddanu cymaint o gynulleidfa dros yr ugain mlynedd diwethaf na Bryn Fôn.

Yn anterth Sobin a'r Smaeliaid ddiwedd yr wythdegau a dechrau'r nawdegau, dyma oedd prif grŵp Cymru, a Bryn Fôn oedd pin-up miloedd o ferched ledled Cymru.

Caneuon anthemig poblogaidd oedd rhai Sobin, yn eu plith Meibion y Fflam, cân yn gwawdio'r heddlu am fod mor ddi-glem wrth chwilio am losgwyr Meibion Glyndŵr. Wedi i Bryn Fôn ei hun gael ei arestio yn 1991 ar amheuaeth o fod yn un o'r Meibion, dim ond tyfu wnaeth ei boblogrwydd ymysg cefnogwyr o bob oed.

Yn 1994, daeth cyfeiriad newydd wrth iddo recordio albwm o ganeuon mwy myfyriol, Dyddiau Digymar - ac ers hynny, mae wedi perfformio fel Bryn Fôn a'r Band. Yn 2001 sefydlodd y grŵp eu label eu hunain, gan barhau i recordio a pherfformio yn gyson oddi ar hynny. Rhyddhaodd ddwy albym newydd-'Abacus' yn 2008 ac 'Y Goreuon 1994 - 2005" yn 2009.

Yn ogystal â'r caneuon pop cofiadwy, mae Bryn Fôn ar ei orau yn canu caneuon a baledi canu gwlad melodaidd rhai o gyfansoddwyr gorau Cymru, Emyr Huws Jones ac Alun 'Sbardun' Huws. Fel Dafydd Iwan o'i flaen, mae Bryn Fôn yn un o'r ychydig o berfformwyr Cymraeg sydd wedi llwyddo i ehangu poblogrwydd canu Cymraeg y tu hwnt i'r indie kids a'r gynulleidfa golegol, gyfryngol arferol.