"Dw i wedi bod yn gweithio ar y cynllun cyffrous hwn sydd wedi cychwyn ym Machynlleth ers Gorffennaf 2004, ers dros flwyddyn, yn dilyn ymadawiad y swyddog blaenorol.

Nod y Cynllun hwn yw hybu'r Gymraeg fel iaith gymunedol mewn ardal o arwyddocâd ieithyddol arbennig. Diffinnir Machynlleth fel ardal lle mae tystiolaeth o shifft ieithyddol amlwg, a lle mae tystiolaeth fod llai o ddefnydd o'r Gymraeg gan bobl ifanc.

Mae Cynlluniau Gweithredu Iaith yn wahanol i'r Mentrau Iaith gan eu bod yn targedu ardaloedd llai na'r Mentrau tra'n effeithio ar waith sydd y tu hwnt i ddylanwad y Mentrau, e.e. polisïau a gwaith cyrff statudol fel ELWa, Awdurdod Datblygu Cymru a chynghorau sir, ynghyd â chydlynu'n agos â phrif bartneriaid y Bwrdd.

Mae'r cynllun dan ofal Bwrdd yr Iaith Gymraeg, a rôl y Bwrdd yn y maes hwn yw gweithredu fel catalydd - i helpu sefydlu partneriaeth ddeinamig i adnabod blaenoriaethau lleol ac wedyn parhau â gweithio ar y cyd â'r Fenter Iaith leol, a sefydliadau eraill, fel hwylusydd i waith y bartneriaeth.

Un o brif amcanion fy swydd yw hwyluso gweithgareddau a digwyddiadau sy'n cael eu trefnu er mwyn hyrwyddo defnydd o'r Gymraeg yn yr ardal. Dros y blynyddoedd diwethaf mae nifer y bobl sy'n medru'r Gymraeg ym Machynlleth wedi gostwng. Bwriad Cynllun Gweithredu Iaith Machynlleth yw cynyddu'r cyfleoedd sydd yna i bobl o bob oed ddefnyddio'r Gymraeg yn eu bywydau bob dydd. Byddwn yn gweithio yn benodol ymysg plant, pobl ifanc, dysgwyr a rhieni.

Mae'r Gymraeg yn rhan annatod ohona i, rwy'n hynod falch i fod yn gweithio yma ym Mro Ddyfi, yn enwedig i weithio dros rywbeth mor bwysig â hyrwyddo'r iaith Gymraeg ar lefel leol."

Prosiectau arbrofol yw'r Cynlluniau Gweithredu Iaith er mwyn hyrwyddo'r Gymraeg mewn ardaloedd lle gwelwyd dirywiad sylweddol yn y nifer sy'n siarad yr iaith. Mae swyddogion Bwrdd yr Iaith Gymraeg yn hwyluso'r gwaith drwy ddod â phawb at ei gilydd - yn lleol, yn rhanbarthol ac yn genedlaethol - sydd â diddordeb mewn cynyddu'r defnydd o'r iaith Gymraeg yn y gymuned.

Yn ogystal â Machynlleth, mae cynlluniau hefyd wedi'u sefydlu yn Nghorwen, Rhuthun, Pwllheli, Amlwch, Bangor, Llanrwst, Rhydaman, Aberteifi, Abergwaun a Chasnewydd. Os hoffech gysylltu â Siwan, mae ei swyddfa wedi eo leoli yn Swyddfa Rhanbarthol Powys ym Machynlleth (drws nesaf i Nat West), neu codwch y ffôn (01654 703944) neu gyrru e-bost (siwan.hywel@bwrdd-yr-iaith.org.uk).