Dyma oedd sail ein drama gerdd, a lwyfanwyd nos Wener y 31ain o Fehefin a phrynhawn dydd Sul yr 2il o Orffennaf yn Neuadd y Celfyddydau Llanbedr Pont Steffan, cyrchfan Undeb Yr Annibynwyr Cymraeg eleni.

Stori Noa oedd gennym, hen, hen hanes sy'n gyfarwydd i ni gyd, ac fe geisiwyd darlunio'r stori mewn modd deniadol i'r glust a'r llygad, ac fe gawsom fendith rhyfeddol yn y paratoi a'r ymarferion di-ri, a chyfle i wneud ffrindiau newydd o bob oedran.

Dawnsio, llefaru, actio a chanu dyna fu rhan y plant i gyd o bob oedran o'r ieuengaf yn 4 oed i'r hynaf yn l9 mlwydd oed, a phlant oeddent o ysgolion Sul, Bethel, Parc y Rhos; Gwyddgrug; Rhydybont; Saron, Llangeler; a Tabernacl, Pencader dros ddeg a thrigain i gyd, a phob un fel ei gilydd wedi dysgu eu gwaith yn drylwyr a'u harwain yn ddeheuig gan ein cyfarwyddwraig Mrs Dulcie James, un a drosglwyddodd asbri, egni a hyfforddiant penigamp i bob un ohonom.

Ar ddiwedd y perfformiad gofynnwyd y cwestiwn gan John Roberts a oedd yn recordio ei raglen bore Sul "Beth oedd neges y stori i ti?" ateb Dafydd oedd "mae Duw wedi rhoi ail gynnig i ni", a braf oedd clywed bachgen ifanc yn ei arddegau yn tystio i hyn.

Awn ymlaen felly yn ffyddiog i'r yfory newydd a sain ein pasiant yn fyw yn y cof,
'Duw a wnaeth addewid, addewid i ni, tydi hi'n grêt, tydi hi'n dda .... '

Kevin Davies

Darparwyd yr erthygl hon i wefan Lleol fel rhan o gynllun Cyfrannu ar y cyd rhwng BBC Cymru'r Byd ac Antur Teifi. Am fwy o fanylion sut fedrwch chi gael £30 am ysgrifennu - cliciwch yma.