Cliciwch yma i weld lluniau o'r diwrnod.
Ar ddydd Gwener, Mehefin 16eg 2006 fe gynhaliodd Urdd Gobaith Cymru ei thaith gerdded blynyddol. Yn mynychu'r daith hon 'roedd mil o blant o ysgolion cynradd ac uwchradd, ac roeddent wedi gwisgo lliwiau'r Urdd (sef coch, gwyn a gwyrdd).
'Roedd y daith yn cychwyn yng nghlwb rygbi Aberystwyth. Fe gerddodd y plant o'r clwb rygbi, ar hyd y prom ac yn ôl eto. A'r tywydd mor braf mae'n rhaid fod y plant wedi llwyr ymlâdd, ond fe oleuodd eu hwynebau pan ymddangosodd Mr Urdd, sef Sian Price, ar y prom i'w cyfarch!
Panto i'r plant
Nid oeddwn i yn cymryd rhan yn y daith, ond yn hytrach yn darparu adloniant i'r plant cyn iddynt gychwyn tua thre. Pantomeim oedd yr adloniant hwnnw! Ar ôl ychydig ymarferion fe drosglwyddais i a pedwar arall (Gwen Simms-Williams, Sioned Thomas, Elin Huxtable a Tomi Turner) bantomeim Sinderella i'r plant yn y bandstand. 'Roedd gennym fand yn cynhyrchu'r seiniau angenrheidiol ar ochr y llwyfan, megis cerddoriaeth amheus wrth i'r ddwy chwaer hyll ddod i'r llwyfan a cherddoriaeth hudol wrth i'r dylwythen deg a'i chyfaill ddod i'r llwyfan. Wrth y piano 'roedd James Hancock-Evans ac wrth y gitâr drydanol 'roedd Tomos Dylan.
Fe berfformion gynhyrchiad modern o stori Sinderella, a'r cynnwys yn addas ar gyfer yr achlysur. 'Roedd Sinderella (Sioned Thomas) yn drist iawn gan fod ei dwy chwaer hyll (Elin Huxtable a Carys Davies) wedi mynd â'i hesgidiau cerdded yn ddiarwybod iddi ac wedi'u cuddio fel ni allai fynd ar daith gerdded yr Urdd. Fe ymddangosodd y dylwythen deg (Gwen Simms-Williams) a'i chyfaill (Tomi Turner) a oedd yn byw ar y prom i'w helpu. Fe roddodd y dylwythen deg bâr o esgidiau cerdded i Sinderella, a oedd yn gan mil gwell na rhai Sal a Lw (y ddwy chwaer hyll) a chafodd arwain y daith gerdded. Fe gafodd y dylwythen deg a'r gynulleidfa fwynhad wrth weld Sal a Lw yn cael eu cosbi. Do, fe gafodd y ddwy chwaer fynd ar y daith - ond ar dair troed! Fe glymwyd eu traed gyda'i gilydd cyn iddynt gwympo'n glec ar y llwyfan!
Erbyn chwarter wedi tri roeddem ni, fel yr actorion, yn chwysu'n stecs ac wedi'n llorio'n llwyr ar ôl perfformio tri pherfformiad i gynulleidfa gwahanol. Roeddem yn fwy na pharod i roi ein traed i fyny!
Mwynheuodd y plant (a'r actorion!) yn fawr iawn. Fe dynnwyd y plant i mewn i sbort a miri'r pantomeim ar sawl achlysur ac 'roedd eu hymateb yn anhygoel.
'Roedd sawl llwyddiant i'r panto. Yn fy marn i, llwyddiant mwya'r sioe oedd y gân fythgofiadwy â ganwyd ddwywaith yn ystod perfformiad gan yr actorion a'r gwylwyr. Cafodd y gân ei chanu i dôn "Amarillo" a chyfeiliant y band. Isod gwelir geiriau'r gân (a grewyd gan Carys Davies a Gwen Simms-Williams).
Ar lan y môr
A ninnau'n canu fel côr,
Ni'n siŵr chi'n joio
Os chi yn, wel clapiwch eich dwylo.
Ma' pawb moen bod 'ma
A-A-A-A
'Da ni'n gwmni da,
A-A-A-A
Ma' Sal a Lw yn pwdu
Ond dewch chi gyda ni.
Ma' taith yr Urdd 'mlan 'da ni heddi'
Dewch i gerdded 'da Anwen Eleri,
Sbort a sbri wrth gerdded 'da ni
Chi yw gobeth Cymru.
'Roedd hi'n brynhawn fythgofiadwy ac rwy'n siŵr fydd y digwyddiad yn aros yng nghof y mwyafrif am gryn amser eto. Cefais hwyl ar y llwyfan ac roeddwn yn cael modd i fyw wrth actio Lw. 'Roedd hi ymron yn ddiwrnod perffaith ond 'roeddwn i'n pobi o dan y wisg ddychrynllyd a'r haenau o golur! Wedi dweud hynny, 'roedd yr hufen iâ â fwynheuodd yr actorion ar ddiwedd y diwrnod yn gwneud yn iawn am hynny!
Rwy'n edrych ymlaen yn eiddgar at y flwyddyn nesaf. Eira Wen, y Blodyn a'r Bwystfil - pwy a ŵyr?!!!
Erthygl gan Carys Mair o Aberystwyth
