Cafodd ei eni a'i fagu yn Aberystwyth yn ystod haf chwilboeth 1976. Roedd yn byw uwchben caffi ei rieni - sef 'Caffi Morgan' un o gaffis mwya' poblogaidd Aber.

Mynychodd Aled Ysgol Gymraeg Aberystwyth a chafodd ei addysg Uwchradd yn Ysgol Gyfun Penweddig.

Gweithiodd yng nghaffi ei rieni ar ddyddiau Sadwrn a gwyliau ysgol, a phan oedd yn ifancach, chwaraeodd â'r syniad o fod yn yrrwr bws pan oedd yn hŷn. Ond ei brif freuddwyd oedd efelychu Phillip Schofield, un o brif gyflwynwyr rhaglenni plant y BBC yn y 1980au.

Wedi gadael yr ysgol uwchradd ym 1992 dechreuodd gwrs Rhaglenni Cyfrifiaduron yng Ngholeg Addysg Bellach Ceredigion, ond sylweddolodd yn fuan nad cyfrifiadureg oedd y proffesiwn iddo ef. Gadawodd Goleg Ceredigion a mynd i Goleg Abertawe i astudio Astudiaethau'r Cyfryngau.

Daeth ei gyfle mawr ar ddiwedd y 1990au, pan oedd Sioeau 'roadshows' enwog Radio 1 yn dod i ben. Cynhaliwyd y Sioe olaf ym 1999, ychydig wedi i Aled ymuno â thîm cynhyrchu Radio 1.

Yn y cyfnod hwnnw y dechreuodd yr hyn a elwid yn One Big Sunday lle roedd Radio 1 yn darlledu'n fyw o gyngerdd awyr agored, mewn trefi gwahanol ar draws y Deyrnas Unedig, bob Sul trwy'r haf. Roedd Aled yn gweithio'n agos gyda'r cyflwynydd enwog Chris Moyles yn y cyfnod hwn.

Tua'r un cyfnod, dechreuodd y sioe realiti poblogaidd Big Brother ar y teledu, ac Aled yn ddilynwr brwd llwyddodd i ennyn yr un diddordeb yn Chris Moyles.

Pan ddechreuodd yr ail gyfres o BB, roedd Aled yn gweithio fel Cynorthwydd Cynhyrchu ar raglen Dave Pearce ar Radio 1 ac estynnodd Chris Moyles wahoddiad i Aled ddod ar ei raglen yn y prynhawn i adolygu'r rhaglen gyntaf o Big Brother. Arweiniodd hyn at slot parhaol i Aled ar y rhaglen bob prynhawn, yn dilyn ac yn trafod holl droeon trwstan y gyfres realiti poblogaidd. Cafodd yr enw "BB Aled" - enw sydd wedi aros gydag ef hyd heddiw.

Dychwelodd 'BB Aled' i'r donfedd yn 2003 pan welwyd cyfres 3 o Big Brother ar ein sgrin fach.

A phan adawodd Lizzie - un o dîm Chris Moyles ei raglen radio, cafodd Aled gynnig slot parhaol bob prynhawn ar y rhaglen oedd yn cael ei darlledu rhwng 3pm a 5pm.

Ym mis Mawrth 2003, ymddeolodd rhieni Aled o Gaffi Morgan, a chlywyd amdano ar Radio 1, wrth i Chris Moyles eu cyfweld ar ei raglen.

Ers Ionawr 2004 mae Aled yn cyd-gyflwyno gyda Chris Moyles ar ei slot frecwast bob bore ar Radio 1.

Uchafbwyntiau eraill gyrfa Aled hyd yn hyn ydy cyfarfod rhai o selebs enwoca'r byd o Madonna, i Kylie a Robbie Williams.

Yn ogystal â gweithio ar Radio 1, mae Aled hefyd yn cyfrannu i raglenni C2 ar Radio Cymru bob nos Iau, ac roedd yn un o'r beirniaid ar y rhaglen deledu i bobol ifanc, Waw Ffactor ar S4C ddiwedd 2003.