ကက်ရှ်မီးယား ပဋိပက္ခ - အိန္ဒိယ တိုက်လေယာဉ် ၂ စီး ကို ပါကစ္စတန် ပစ်ချ

ကက်ရှ်မီးယား ဒေသ ပါကစ္စတန် ထိန်းချုပ် နယ်မြေ ဝေဟင် ပိုင်နယ် ထဲကို ဝင်လာတဲ့ အိန္ဒိယ လေတပ် ဂျက် လေယာဉ်ပျံ ၂ စီးကို ပစ်ချခဲ့ပြီး လေယာဉ်မှူးကိုလည်း မြေပြင်ပေါ်မှာ အရှင်ဖမ်းမိခဲ့တယ်လို့ ပါကစ္စတန် စစ်တပ်က ပြောပါတယ်။

ပစ်ချခဲ့တဲ့ လေယာဉ် ၂ စီးမှာ ၁ စီးက ပါကစ္စတန် ထိန်းချုပ် နယ်မြေထဲကို ပျက်ကျခဲ့ပြီး ၁ စီးကတော့ အိန္ဒိယ ပိုင်နက်ထဲ ပျက်ကျခဲ့တယ်လို့ ပါကစ္စတန် တပ်မတော် ပြောခွင့်ရ ဗိုလ်ချုပ်ကြီး အဇိဖ်ဂါဖောက ဆိုပါတယ်။

ဒါပေမယ့် အိန္ဒိယဘက်ကတော့ တစ်စုံတစ်ရာ အတည်ပြုတာမျိုး မရှိသေးဘဲ ပါကစ္စတန် လေယာဉ် ၁ စီးကို ပစ်ချခဲ့တယ်လို့ ကြေညာထားပါတယ်။

ပြီးခဲ့တဲ့ အင်္ဂါနေ့ (ဖေဖော်ဝါရီ ၂၆) က ပါကစ္စတန် ထိန်းချုပ် ကက်ရှ်မီးယား နယ်မြေ ဘာလာကော့ဒ် ဒေသက ဂျိတ်ရှ် မိုဟာမက် စစ်သွေးကြွအဖွဲ့ရဲ့ လေ့ကျင့်ရေး စခန်း ကို ဦးတည်ပြီး အိန္ဒိယ ဘက်က လေကြောင်း တိုက်ခိုက်မှု လုပ်ဆောင်ခဲ့ပြီးနောက်ပိုင်း အဲဒီမှာ အိန္ဒိယနဲ့ ပါကစ္စတန် အပြန်အလှန် တင်းမာမှုတွေ ဆက်တိုက်ဖြစ်ပေါ်နေပါတယ်။

အိန္ဒိယရဲ့ တိုက်ခိုက်မှုက ကက်ရှ်မီးယား ဒေသ အိန္ဒိယ ထိန်းချုပ်နယ်မြေထဲမှာ ဖြစ်ပွားခဲ့တဲ့ စစ်သွေးကြွအဖွဲ့ရဲ့ တိုက်ခိုက်ခဲ့မှု ကို လက်တုံ့ပြန်တာပါ။

ဖေဖော်ဝါရီလ ၁၄ ရက် တုန်းက အနည်းဆုံး စစ်သား ၄၀ သေဆုံးခဲ့ရတဲ့ အိန္ဒိယ စစ်ရဲတပ်ဖွဲ့ ယာဉ်တန်း အသေခံ ဗုံးခွဲတိုက်ခိုက်ခံရပြီးနောက်ပိုင်း ကက်ရှ်မီးယား ဒေသမှာ စစ်ရေး တင်းမာမှုတွေ ပြန်လည် စတင်လာခဲ့ပါတယ်။

ဖေဖော်ဝါရီလ ၂၇ ရက် (ဗုဒ္ဓဟူးနေ့) မှာ ကတ်ရှ်မီးယား ဒေသ နှစ်နိုင်ငံ ထိန်းချုပ်မျဉ်း တလျှောက် ပါကစ္စတန် လေတပ် ဂျက်လေယာဉ်တွေက လေကြောင်း တိုက်ခိုက်မှုတွေ ပြုလုပ်ခဲ့တယ်လို့လည်း ပါကစ္စတန် နိုင်ငံခြားရေး ဝန်ကြီးဌာနက ကြေညာချက် ထုတ်ပြန်ထားပါတယ်။

အရပ်သား ထိခိုက်မှုနဲ့ လူ့ အသက်တွေ ဆုံးရှုံးမှု မရှိအောင် စစ်ရေး ပစ်မှတ်တွေကို ရှောင်လွှဲ ပြီး တိုက်ခိုက်ခဲ့တယ်လို့ ပါကစ္စတန်ဘက်က ဆိုပါတယ်။ ဒါပေမယ့် ပါကစ္စတန် ဂျက်လေယာဉ်တွေကို မောင်းထုတ်နိုင်ခဲ့တယ်လို့ အိန္ဒိယ အာဏာပိုင်တွေက တုံ့ပြန်ပါတယ်။

စစ်ရေး တင်းမာနေတဲ့ ဒေသတဝိုက်မှာ အိန္ဒိယဘက်က လေယာဉ်ပျံသန်းခွင့် ကန့်သတ်လိုက်တဲ့ သတင်းတွေလည်း ထွက်ပေါ်နေပါတယ်။ အဲဒီ ဒေသတဝိုက် လေယာဉ်ခရီးစဉ်တွေကို ယာယီ ရပ်နားထားရတယ်လို့ အိန္ဒိယ ပြည်တွင်း လေကြောင်းလိုက် Vistara က ပြောပါတယ်။

Line of Control (LoC) လို့ ခေါ်တဲ့ ကက်ရှ်မီးယားဒေသ အိန္ဒိယနဲ့ ပါကစ္စတန် ထိန်းချုပ်နယ်မြေ သတ်မှတ်မျဉ်း တလျှောက် အခုလို လေကြောင်းတိုက်ပွဲ ဖြစ်ပွားနေတာဟာ ၁၉၇၁ ခုနှစ် နှစ်နိုင်ငံ စစ်ပွဲ အပြီး နောက်ပိုင်း ပထမဆုံးအကြိမ် ဖြစ်ပါတယ်။

အဲဒီ နယ်ခြားမျဉ်းကို ကျော်ပြီး နှစ်ဖက် မြေပြင် တပ်ဖွဲ့တွေ အကြား အပြန်အလှန် ပစ်ခတ်မှုတွေလည်း ဖြစ်ပေါ်နေပါတယ်။ နယ်စပ်ဖြတ်ကျော် ပစ်ခတ်မှုတွေကြောင့် အင်္ဂါနေ့က ပါကစ္စတန် အရပ်သား ၄ ဦး သေဆုံးခဲ့ပြီး လူ ၁၀ ဦး ထိခိုက်ဒဏ်ရာ ရခဲ့ပါတယ်။

အိန္ဒိယဘက်ခြမ်းမှာတော့ စစ်သား ၅ ဦး ဒဏ်ရာ ရခဲ့တယ်လို့ တာဝန်ရှိသူတွေက ဘီဘီစီကို ပြောပါတယ်။ နယ်စပ်မျဉ်း တလျှောက်ရှိ ရာဂျိုရီနဲ့ ပွန့်ချ် ခရိုင် ၂ ခုက စာသင်ကျောင်းတွေကိုလည်း ပိတ်ထားရပါတယ်။

နယ်ခြားတလျှောက် နေထိုင်ကြသူတွေကိုလည်း နေအိမ်တွေကနေ စွန့်ခွာဖို့ အမိန့်ထုတ်ပြန်ထားပါတယ်။

အစ္စလာမ် ဘာသာဝင် အများစု နေထိုင်တဲ့ ကက်ရှ်မီးယား ဒေသကို အိန္ဒယနဲ့ ပါကစ္စတန် နှစ်ဖက်စလုံးက သူတို့ ပိုင်နက်အဖြစ် တောင်းဆိုနေကြပြီး အဲဒီက နယ်မြေတွေကို ခွဲခြား ထိန်းချုပ်မှုတွေ လုပ်ဆောင်ခဲ့ကြပါတယ်။

အင်အားပြင်း နျူကလီးယား လက်နက်ကိုယ်စီ ပိုင်ဆိုင်ထားတဲ့ အိန္ဒိယနဲ့ ပါကစ္စတန် နှစ်နိုင်ငံဟာ ၁၉၄၇ ခုနှစ်မှာ ဗြိတိသျှ ဆီကနေ သီးခြားစီ လွတ်လပ်ရေး ရယူခဲ့ပြီးနောက် စစ်ပွဲ အဆင့် ၃ ကြိမ် ဖြစ်ပွားခဲ့ရာမှာ ၁ ကြိမ်က လွဲပြီး ကျန်တာတွေက ကက်ရှ်မီးယား နယ်မြေ အငြင်းပွားမှုကြောင့် ဖြစ်ပွား ခဲ့တာပါ။

အိန္ဒိယနဲ့ ပါကစ္စတန် စစ်ရေး တင်းမာမှု သမိုင်း