တိုက်ရိုက်ထုတ်လွှင့်မှု, ‘‘နိုင်ငံတကာက အသိအမှတ်ပြုတာ မပြုတာ ကျွန်တော်တို့ နားမလည်ဘူး။...’’

တိုက်ရိုက် ထုတ်လွှင့်ချက်

1. လွန်ခဲ့သော ၁၃ မိနစ် ကရွေးကောက်ပွဲပြုလုပ်နေတဲ့ ဖားကန့်မြို့ပေါ်မှာ ပစ်ခတ်တိုက်ခိုက်မှုတွေဖြစ်

   

   ဓာတ်ပုံ ရင်းမြစ်, Supplied

   ရွေးကောက်ပွဲအပိုင်း ၃ ကျင်းပနေတဲ့ ကချင်ပြည်နယ်၊ ဖားကန့်မြို့နယ်က မဲရုံအနီးတဝိုက်နေရာတွေကို တော်လှန်ရေးပူးပေါင်းတပ်တွေက လက်နက်ကြီးတွေနဲ့ ပစ်ခတ်တိုက်ခိုက်နေပြီး စစ်တပ်ဘက်ကလည်း ပြန်လည်ပစ်ခတ်နေလို့ နှစ်ဘက်တိုက်ပွဲတွေ ပြင်းထန်နေတယ်လို့ စစ်ရေးသတင်းအရင်းအမြစ်တစ်ဦးက ပြောပါတယ်။

   “လက်နက်ကြီး အပြန်အလှန်ပစ်ခတ်မှုကတော့ ဆက်တိုက်ဆိုသလိုဖြစ်နေတဲ့အနေအထားပေါ့။ စစ်တပ်ဘက်ကလည်း တော်လှန်ရေးအင်အားစုတွေ ထိန်းချုပ်ထားတဲ့ ဆိပ်မူကျေးရွာအုပ်စုဘက်ကို ဗျူဟာကုန်းဘက်က ၁၂၀ မမ(လက်နက်ကြီး)တွေနဲ့ လှမ်းပစ်တာတွေ ရှိတယ်။ တော်လှန်ရေးအင်အားစုတွေဘက်ကလည်း ဖားကန့်ဗျူဟာကုန်းနဲ့ မဲရုံအနီးတဝိုက်တွေကို လက်နက်ကြီးတွေနဲ့ ပစ်တာရှိတယ်” လို့ စစ်ရေးသတင်းအရင်းအမြစ်က ပြောပါတယ်။

   အပြန်အလှန် ပစ်ခတ်မှုတွေကြောင့် ဖားကန့်မြို့ပေါ်မှာ ဒေသခံ ၅ ဦး ထိခိုက်ဒဏ်ရာရထားပြီး ကချင်လွတ်လပ်ရေးတပ် (KIA) ပူးပေါင်းတပ်တွေ ထိန်းချုပ်တဲ့ ဆိပ်မူကျေးရွာအုပ်စုမှာတော့ စစ်တပ် ပစ်လိုက်တဲ့ လက်နက်ကြီးကြောင့် လူ ၂ ဦး ထိခိုက်ဒဏ်ရာရတယ်လို့ သူက ပြောပါတယ်။

   စစ်ကော်မရှင်ဟာ ရွေးကောက်ပွဲ အပိုင်း ၃ ကျင်းပနိုင်ရေး ကြိုပြင်တဲ့အနေနဲ့ ဖားကန့်မြို့အဝင်အထွက်တွေကို ဇန်နဝါရီ ၂၃ ရက်ညကစလို့ ဒီနေ့ အထိ ပိတ်ထားတယ်လို့ မြို့ခံတွေက ပြောပါတယ်။

   ဖားကန့်မြို့ရဲ့ အဝင်၊ အထွက် နေရာတွေဖြစ်တဲ့ ပန်းတင်တံတား၊ အေးမြသာယာရပ်ကွက် ကနေ ဆိပ်မူကျေးရွာအုပ်စုဘက်ကို ပတ်ပြီးသွားလို့ရတဲ့ ဆန်းကြွယ်လမ်း၊ မြို့မရပ်ကွက်နဲ့ မရှီကထောင် ရပ်ကွက်ကို ချိတ်ထားတဲ့ သံဘောင်တံတား စတဲ့ နေရာတွေကို အသွားအလာပိတ်ထားလိုက်တယ်လို့ ဖားကန့်မြို့ခံက ပြောပါတယ်။

   ဖားကန့်မြို့ပေါ် ရွေးကောက်ပွဲကျင်းပနေတဲ့ အခြေအနေတွေနဲ့ ပတ်သက်လို့ မြို့ခံတစ်ဦးက “မြို့ပေါ်ရပ်ကွက် ၅ ခုမှာ၊ မရှီကထောင်ရပ်ကွက်ကလွဲရင် ကျန်တဲ့ ရပ်ကွက် ၄ ခုမှာ အကုန်လုံးပိတ်ချပြီးတော့ စာသင်ကျောင်းတွေမှာ ရွေးကောက်ပွဲလုပ်ဖို့ မဲရုံတွေ ပြင်ဆင်ထားတာ”လို့ ပြောပါတယ်။

   ဖားကန့်မြို့နယ်မှာ နှစ်ဖက် ပစ်ခတ်မှုတွေ ရှိနေတာကြောင့် မြို့ပေါ်မှာ အသွားအလာ မရှိတော့ဘဲ တိတ်ဆိတ်နေတယ်လို့ မြို့ခံတွေက ပြောပါတယ်။

   ကချင်ပြည်နယ်ထဲက ဖားကန့်၊ မံစီ၊ ရွှေကူနဲ့ မိုးမောက်မြို့နယ်တို့မှာ ရွေးကောက်ပွဲ ကျင်းပမယ်လို့ ပြည်ထောင်စု ရွေးကောက်ပွဲ ကော်မရှင်က ပြောထားပေမဲ့ မံစီနဲ့ မိုးမောက်မြို့တွေမှာ ရွေးကောက်ပွဲ မကျင်းပနိုင်ပါဘူး။

   ဖားကန့်နဲ့ ရွှေကူမြို့နယ်တွေမှာပဲ ရွေးကောက်ပွဲ အပိုင်း ၃ လုပ်နိုင်ပြီး ဖားကန့်မှာတော့ ပစ်ခတ်တိုက်ခိုက်မှုတွေ ရှိနေပါယတ်။

2. လွန်ခဲ့သော ၄၅ မိနစ် ကဓာတ်ပုံစုစည်းချက် - ရွေးကောက်ပွဲ အပိုင်း ၃ နေ့ ရန်ကုန်နဲ့ မန္တလေးက မြင်ကွင်းများ

   ရန်ကုန်မြို့နဲ့ မန္တလေးမြို့တွေမှာ ဒီနေ့ပြုလုပ်တဲ့ ရွေးကောက်ပွဲ အပိုင်း ၃ မြင်ကွင်းတွေဖြစ်ပါတယ်။

   ရန်ကုန်မှာတော့ အရင်အစိုးရလက်ထက်တွေမှာ တာဝန်ယူခဲ့တဲ့ ဝန်ကြီးဟောင်းအချို့နဲ့ သူတို့နဲ့နီးစပ်သူတွေက ကြံ့ခိုင်ရေးပါတီကနေ ဝင်ပြိုင်နေကြပါတယ်။

   ၈၈ ကျောင်းသားခေါင်းဆောင်အများစုနဲ့ဖွဲ့စည်းထားတဲ့ ပြည်သူ့ပါတီက ဥက္ကဋ္ဌ ဦးကိုကိုကြီးကလည်း ပြည်သူ့လွှတ်တော်အမတ်နေရာအတွက် လမ်းမတော်မြို့နယ်ကနေ ဝင်ပြိုင်နေပါတယ်။

   မန္တလေးမှာတော့ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က မဲရုံတွေက မဲပေးတဲ့အခြေအနေကို ဒီနေ့ မနက်ပိုင်းမှာပဲ လုံခြုံရေးအပြည့်နဲ့ လိုက်ကြည့်နေပါတယ်။

   ဒီနေ့ ရန်ကုန်နဲ့ မန္တလေးက ရွေးကောက်ပွဲ မြင်ကွင်းတွေကို စုစည်းဖော်ပြပေးလိုက်ပါတယ်။

   

   ဓာတ်ပုံ ရင်းမြစ်, Getty Images

   

   ဓာတ်ပုံ ရင်းမြစ်, Getty Images

   

   

   

   ဓာတ်ပုံ ရင်းမြစ်, Getty Images

   

   ဓာတ်ပုံ ရင်းမြစ်, Getty Images

   

   ဓာတ်ပုံ ရင်းမြစ်, Getty Images

   

   ဓာတ်ပုံ ရင်းမြစ်, Getty Images

   

   ဓာတ်ပုံ ရင်းမြစ်, Getty Images

3. လွန်ခဲ့သော တစ်နာရီ ကသမ္မတ ဘယ်သူဖြစ်မလဲ

   

   စစ်တပ် ကျင်းပတဲ့ ရွေးကောက်ပွဲရဲ့နောက်ဆုံးအပိုင်းဖြစ်တဲ့ အပိုင်း ၃ ကို ဒီနေ့ ရောက်ရှိပြီဖြစ်ပါတယ်။

   ပြည်သူ့လွှတ်တော်၊ အမျိုးသားလွှတ်တော်၊ တိုင်းဒေသကြီးနဲ့ပြည်နယ်လွှတ်တော်တွေအတွက် ရွေးကောက်ပွဲကို ဒီဇင်ဘာ ၂၈ ရက်မှာ အပိုင်း ၁၊ ဇန်နဝါရီ ၁၁ ရက်မှာ အပိုင်း ၂ ကျင်းပခဲ့တာဖြစ်ပါတယ်။ ဒါကြောင့် ဒီနေ့ ကျင်းပတာက အပိုင်း ၃ ဖြစ်ပါတယ်။

   ပြီးခဲ့တဲ့အပိုင်း ၁ နဲ့ ၂ ရွေးကောက်ပွဲတွေမှာတော့ စစ်တပ်က ကိုယ်စားလှယ်လောင်းတွေ စေလွှတ်ခဲ့သလို စစ်ဗိုလ်ချုပ်ဟောင်းတွေ ဦးဆောင်တဲ့ ပြည်ထောင်စု ကြံ့ခိုင်ရေးနဲ့ဖွံ့ဖြိုးရေးပါတီ (USDP) က အမတ်နေရာအများစုကို အနိုင်ရရှိထားပါတယ်။

   စစ်ကော်မရှင် ပြောခွင့်ရသူကတော့ ရွေးကောက်ပွဲအလွန် မတ်လမှာ လွှတ်တော်အသစ် ခေါ်ယူပြီး ဧပြီလမှာ အစိုးရအသစ်ဖွဲ့ဖို့ရှိတဲ့အကြောင်း အချိန်ကာလအပိုင်းအခြားကို အစောပိုင်းမှာပြောထားပါတယ်။

   အခုတစ်ကြိမ် ပြည်သူ့လွှတ်တော်နဲ့ အမျိုးသားလွှတ်တော် ကိုယ်စားလှယ်နေရာတွေမှာ အနိုင်ရရှိလာတဲ့ အမတ်တွေ တက်ရောက်မယ့် ပြည်ထောင်စုလွှတ်တော်ဟာ သမ္မတ ရွေးပြီး အစိုးရဖွဲ့ဖို့ အဓိက ဆုံးဖြတ်ပေးရမယ့်နေရာပါ။

   သမ္မတ ရွေးချယ်ရာမှာ ပြည်သူ့လွှတ်တော်၊ အမျိုးသားလွှတ်တော်နဲ့ တပ်ကိုယ်စားလှယ်အစုအဖွဲ့ သုံးခုကနေ ဒုတိယ သမ္မတ တစ်ဦးစီ ပြည်ထောင်စုလွှတ်တော်ကို အမည်စာရင်း တင်သွင်းရပါမယ်။ အဲဒီသုံးဦးထဲက မဲအများဆုံးရသူက သမ္မတ ဖြစ်လာပါမယ်။

   အခုကျင်းပနေတဲ့ ရွေးကောက်ပွဲရလဒ်တွေအရပေါ်ပေါက်လာမယ့်လွှတ်တော်ကနေ သမ္မတ ဘယ်သူဖြစ်လာမလဲ။ ရှင်းပြချက်ရုပ်သံ အပြည့်အစုံကို ဒီလင့်ခ် မှာ ဆက်လက်ကြည့်ရှုနိုင်ပါတယ်။

4. လွန်ခဲ့သော တစ်နာရီ ကမန္တလေးမြို့အပြင်က မတ္တရာနဲ့ မင်းကွန်းဒေသကို စစ်တပ် စစ်ကြောင်းထိုးနေ

   

   ဓာတ်ပုံ ရင်းမြစ်, Lulu Luo / BBC

   မန္တလေးတိုင်း၊ မန္တလေးမြို့ကို စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင် ရောက်နေချိန်မှာပဲ မြို့အပြင် မတ္တရာမြို့နယ်ထဲနဲ့ မြို့တစ်ဖက်ကမ်းက မင်းကွန်းမှာ စစ်တပ်က စစ်ကြောင်းထိုးနေတယ်လို့ ဒေသခံတွေက ပြောပါတယ်။

   မန္တလေးတိုင်းထဲက မတ္တရာမြို့နယ်ကို ပြည်သူ့ကာကွယ်ရေး(PDF) ပူးပေါင်းတပ်တွေလက်ထဲကနေ စစ်တပ်က ၂၀၂၅ ခုနှစ် နှစ်ကုန်းပိုင်းမှာ ပြန်လည်ထိန်းချုပ်ထားတာဖြစ်ပါတယ်။

   မန္တလေးမြို့တစ်ဖက်ကမ်းက စစ်ကိုင်းတိုင်း၊ မင်းကွန်းရွာမှာတော့ စစ်တပ်နဲ့ တော်လှန်ရေးတပ်တွေ နှစ်ဖက်တိုက်ပွဲတွေ ဖြစ်ပွားနေပါတယ်။

   “မတ္တရာဘက်မှာလည်း ရွာတွေ မီးလောင်နေတယ်။ မီးခိုးတွေ တက်လာတာ အများကြီးပဲ။ မန္တလေး ပတ် ချာလည် အကုန် မီးခိုးတွေ ချည်းပဲ။ စစ်ကြောင်းထိုးပြီး မီးလိုက်ရှို့နေတဲ့ပုံစံမျိုး။ မင်းကွန်းဘက်ခြမ်းမှာလည်း ဖြစ်နေတယ်။ မနေ့က ညနေ ၄ နာရီခွဲလောက်မှာ မီးခိုးတွေ မြင်နေရတုန်းပဲ။ အဲဒါကို ကြည့်နေရင်းနဲ့ ခဏနေတော့ စစ်တပ် ဟတ်စကီး (ရဟတ်ယာဉ်) ၂ စီး ဆင်းလာတယ်။ လူကြီးလာတာ ဖြစ်မယ်” လို့ မန္တလေးမြို့ခံတစ်ဦးက ဒီနေ့ မနက်ပိုင်းမှာ ဘီဘီစီကို ပြောပါတယ်။

   ဒီနေ့မှာ မန္တလေးမြို့၊ ချမ်းမြေ့သာစည်မြို့နယ်ထဲက မဲရုံတွေကို စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က သွားရောက်ကြည့်ရှုခဲ့ပါတယ်။

   ရွေးကောက်ပွဲ ပထမပိုင်း စတင်ကျင်းပတဲ့ ဒီဇင်ဘာ ၂၈ ရက် မနက်အစောပိုင်းတုန်းကဆိုလည်း မန္တလေးမြို့၊ အောင်မြေသာဇံမြို့နယ်ကို ရှော့တိုက်ဒုံးတွေနဲ့ ပစ်ခတ်တိုက်ခိုက်ခံရလို့ ထိခိုက်ဒဏ်ရာရသူတွေ ရှိခဲ့ပါတယ်။

   အဲဒီနောက် ရွေးကောက်ပွဲ အပိုင်း ၂ ကျင်းပတဲ့ ဇန်နဝါရီလ ၁၁ ရက်မှာတော့ တိုင်းစစ်ကော်မရှင်က မဲရုံတွေမှာ တပ်နဲ့ ရဲ လုံခြုံရေး ဖြန့်ကြက်ပြီး ရွေးကောက်ပွဲကို ပြုလုပ်ခဲ့ပါတယ်။

   ‌ရွေးကောက်ပွဲအပိုင်း ၃ မှာ မန္တလေးတိုင်းထဲက ချမ်း‌မြေ့သာစည်၊ မြစ်သား၊ မလှိုင်၊ ပုသိမ်ကြီးအပြင် ဒေသကာကွယ်ရေးတပ်ဖွဲ့တွေ အားကောင်းတဲ့ သပိတ်ကျင်း၊ တောင်သာ၊ မြင်းခြံ၊ ငါန်းဇွန် မြို့နယ်စုစုပေါင်း ၈ ခု ပါဝင်နေပါတယ်။

5. လွန်ခဲ့သော ၂ နာရီ က‘‘နိုင်ငံတကာက အသိအမှတ်ပြုတာ၊ မပြုတာ ကျွန်တော်တို့ နားမလည်ဘူး။ ပြည်သူက မဲပေးတာ ကျွန်တော် အသိအမှတ်ပြုတယ်’’

   

   ဓာတ်ပုံ ရင်းမြစ်, One News

   စစ်တပ် ကျင်းပတဲ့ရွေးကောက်ပွဲကို နိုင်ငံတကာ အသိအမှတ်ပြုတာ မပြုတာထက် လူထု မဲပေးတာကို အသိအမှတ်ပြုတယ်လို့ဆိုပြီး မြန်မာစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောလာပါတယ်။

   ဒီနေ့မှာ ပြုလုပ်တဲ့ ရွေးကောက်ပွဲ အပိုင်း ၃ မှာ မန္တလေးမြို့က မဲရုံတွေကို သွားကြည့်ချိန် သူက အခုလို ပြောလိုက်တာဖြစ်ပါတယ်။

   အခုကျင်းပနေတဲ့ရွေးကောက်ပွဲကို ကုလသမဂ္ဂကျွမ်းကျင်သူတွေအပါအဝင် နိုင်ငံတကာက ဝေဖန်နေတဲ့အပေါ် သတင်းထောက်တွေက မေးခွန်းမေးမြန်းချိန် သူက အခုလို ပြောလိုက်တာဖြစ်ပါတယ်။

   ကြံ့ခိုင်ရေးပါတီက ရွေးကောက်ပွဲအပိုင်း ၁ နဲ့ ၂ တို့မှာ ပြည်သူ့လွှတ်တော်နဲ့ အမျိုးသားလွှတ်တော်အမတ်နေရာတွေအတွက် မဲအများစုနိုင်ခဲ့တာဟာလည်း တပ်နဲ့နီးစပ်တဲ့ပါတီဆိုတာထက် ''လူထုက မဲပေးချင်တဲ့သူကို မဲထည့်ခဲ့တာကြောင့်'' လို့ဆိုပြီး သူက ခုခံပြောဆိုသွားပါတယ်။

   စစ်ခေါင်းဆောင်ဟာ ရွေးကောက်ပွဲ အပိုင်း ၁ မှာ နေပြည်တော်မှာ မဲထည့်ပြီး မဲရုံတွေကို လိုက်ကြည့်ခဲ့သလို အပိုင်း ၂ မှာတော့ ရန်ကုန်မြို့ လှိုင်မြို့နယ်ထဲက တက္ကသိုလ်ဝန်းထဲမှာရှိတဲ့ မဲရုံကို သွားကြည့်ခဲ့ပါတယ်။

6. လွန်ခဲ့သော ၂ နာရီ ကရွေးကောက်ပွဲအပိုင်း ၃ မှာ ဘယ်သူတွေ ပြိုင်နေလဲ

   အပိုင်း ၃ မှာ အရင် သမ္မတ ဦးသိန်းစိန် လက်ထက်က သမ္မတ ရုံးဝန်ကြီး ဦးထွန်းအုံက တာမွေမြို့နယ်ကနေ ပြည်သူ့လွှတ်တော်အမတ်နေရာအတွက် ဝင်ပြိုင်မှာဖြစ်ပါတယ်။

   လက်ရှိ စစ်ကော်မရှင်ရဲ့အလုပ်သမားဝန်ကြီး ဦးအောင်ကျော်ဟိုးက လှိုင်သာယာ (အနောက်ပိုင်း)မှာ ဝင်ပြိုင်မှာပါ။

   အရင် အမျိုးသားလွှတ်တော်ဥက္ကဋ္ဌဟောင်း ဦးနန္ဒကျော်စွာက ဒဂုံမြို့နယ်ကနေ ပြိုင်မှာဖြစ်ပြီး သမ္မတရုံးဝန်ကြီးဟောင်း ဦးစိုးသိန်းရဲ့သား ဦးအေးချမ်းက လှိုင်သာယာ(အရှေ့ပိုင်း) ကနေ ပြိုင်ပါတယ်။

   သာသနာရေးဝန်ကြီးဟောင်း ဦးဆန်းဆင့်က သူ့ရဲ့ဇာတိ ဧရာဝတီတိုင်း၊ ရေကြည်မြို့နယ်ကနေ တစ်သီးပုဂ္ဂလ အမတ်လောင်းအဖြစ် ဝင်ပြိုင်နေပါတယ်။ သူဟာ ရွေးကောက်ပွဲ အပိုင်း ၁ တုန်းက ကြိုတင်မဲနဲ့ပတ်သက်တဲ့အားနည်းချက်တွေကို ကော်မရှင်ကို ပေးပို့ခဲ့သူ ဖြစ်ပါတယ်။

   ပြည်သူ့ပါတီဥက္ကဋ္ဌ ဦးကိုကိုကြီးကတော့ လမ်းမတော်မြို့နယ်ကနေ ဝင်ပြိုင်ပြီး စစ်တပ်ကို ထောက်ခံတဲ့ တောင်သူလယ်သမားဖွံ့ဖြိုးတိုးတက်ရေးပါတီ ဥက္ကဋ္ဌ ဦးကျော်စွာစိုးက ဒဂုံဆိပ်ကမ်းမြို့နယ်ကနေ ဝင်ပြိုင်မှာ ဖြစ်ပါတယ်။

   လူငယ်တွေကြား လိင်ပညာပေးဗီဒီယိုတွေကြောင့် လူသိများခဲ့တဲ့ ဗီဗီချမ်း ခေါ် ဒေါ်နန်းစုသဇင်အောင်ကတော့ လှိုင်သာယာမြို့နယ်(အနောက်ပိုင်း)မှာ ငြိမ်းချမ်းရေးနဲ့ညီညွတ်ရေးပါတီကနေ ပြည်သူ့လွှတ်တော်အမတ်နေရာအတွက် ဝင်ပြိုင်နေပါတယ်။

7. လွန်ခဲ့သော ၃ နာရီ ကမန္တလေးက မဲရုံတွေမှာ မဲလာထည့်သူနည်း

   

   ရွေးကောက်ပွဲအပိုင်း (၃) ကျင်းပနေတဲ့ မန္တလေးမြို့က မဲရုံတွေမှာ ပြီးခဲ့တဲ့ ရွေးကောက်ပွဲ အပိုင်း ၁၊ အပိုင်း ၂ နဲ့ ထက် မဲလာပေးသူသိသိသာသာ နည်းပါးနေတာ မြင်တွေ့ရပါတယ်။

   မဲရုံစဖွင့်ကတည်းက မဲလာပေးဖို့ ဆက်တိုက်ဆိုသလို ဆော်ဩမှုတွေ ပြုလုပ်ခဲ့တာ တွေ့ရပါတယ်။

   ရွေးကောက်ပွဲ အပိုင်း ၃ မှာ မန္တလေးတိုင်းက မဲပေးပိုင်ခွင့် ရှိသူပေါင်း (၆)သိန်းကျော်ရှိတယ်လို့ တိုင်း ရွေးကောက်ပွဲကော်မရှင်အဖွဲ့ခွဲက ပြောပါတယ်။

   နိုင်ငံရေးပါတီပေါင်း ၉ ပါတီ ဝင်ရောက်ယှဉ်ပြိုင်ပြီး ကိုယ်စားလှယ်လောင်း ၅၄၀ ရှိပါတယ်။

   ‌ရွေးကောက်ပွဲအပိုင်း (၃) မှာ မန္တလေးတိုင်းထဲက ချမ်း‌မြေ့သာစည်၊ မြစ်သား၊ မလှိုင်၊ ပုသိမ်ကြီးနဲ့ ဒေသကာကွယ်ရေးတွေ အားကောင်းတဲ့ သပိတ်ကျင်း၊ တောင်သာ၊ မြင်းခြံ၊ ငါန်းဇွန်၊ မြို့နယ်ပေါင်း ၈ခု ပါဝင်ပါတယ်။

   ပြီးခဲ့တဲ့ ဒီဇင်ဘာ ၂၈ ရက် ရွေးကောက်ပွဲ ပထမပိုင်းမှာ မန္တလေးတိုင်းအတွင်း ရှစ်မြို့နယ်မှာ မဲပေးမှုပေါင်း ၆၂ % ကျော်ရှိခဲ့ပါတယ်။

   ဇန်နဝါရီ ၁၁ ရက် ဒုတိယပိုင်းမှာ မဲလာရောက်ပေးသူ ၆၄ % ကျော်ရှိတယ်လို့ တိုင်းကော်မရှင်အဖွဲ့ခွဲကနေ ပြောပါတယ်။

8. လွန်ခဲ့သော ၃ နာရီ ကလမ်းမတော် ပြည်သူ့လွှတ်တော် ကိုယ်စားလှယ်နေရာဝင်ပြိုင်တဲ့ ဦးကိုကိုကြီး မဲပေး

   

   ဒီကနေ့ ကျင်းပတဲ့ရွေးကောက်ပွဲအပိုင်း ၃ မှာ ရန်ကုန်က လမ်းမတော် ပြည်သူ့လွှတ်တော်ကိုယ်စားလှယ်လောင်းနေရာကနေ ဝင်ပြိုင်တဲ့ ဦးကိုကိုကြီးဟာ လမ်းမတော် မြို့နယ်၊ ၂ ရပ်ကွက်၊ ဝါးတန်းလမ်းအပေါ်ဘလောက်က မဲရုံအမှတ် ၂ မှာ မဲပေးခဲ့ပြီးဖြစ်ပါတယ်။

   ဦးကိုကိုကြီးရဲ့ဇနီး ဖြစ်သူ ဒေါ်ခင်သူသူဝင်းလည်း မန္တလေးတိုင်း၊ သပိတ်ကျင်းမြို့နယ်က ပြည်သူ့လွှတ်တော်ကိုယ်စားလှယ်လောင်းအဖြစ် ဝင်ရောက်ယှဥ်ပြိုင်နေပါတယ်။

   သပိတ်ကျင်းဟာလည်း ရွေးကောက်ပွဲ အပိုင်း ၃ မှာ ပါဝင်ပါတယ်။

   ဦးကိုကိုကြီးပါတီဟာ ၂၀၂၀ ရွေးကောက်ပွဲမှာ ဝင်ရောက်ယှဥ်ပြိုင်ခဲ့ပြီး တစ်နေရာမှ မနိုင်ခဲ့ပါဘူး။

   လက်ရှိ ၂၀၂၅ ရွေးကောက်ပွဲမှာတော့ ပြည်သူ့ပါတီက တနင်္သာရီတိုင်းဒေသကြီးလွှတ်တော်ကိုယ်စားလှယ်တစ်နေရာနိုင်ထားပြီး အချိုးကျကိုယ်စားပြုစနစ်အရတော့ အမျိုးသားလွှတ်တော်မှာ နေရာတချို့ရရှိထားပါတယ်။

9. လွန်ခဲ့သော ၃ နာရီ ကစစ်တပ်ရွေးကောက်ပွဲ အပိုင်း ၃ ကို မံစီနဲ့ မိုးမောက်မြို့နယ်တွေမှာ မလုပ်နိုင်

   စစ်တပ် ရွေးကောက်ပွဲ အပိုင်း ၃ ကို ဒီနေ့ ဇန်နဝါရီလ ၂၅ ရက်မှာ နိုင်ငံတဝန်း တိုင်းနဲ့ပြည်နယ် ၉ ခုက မြို့နယ်ပေါင်း ၆၃ ခုမှာ ကျင်းပဖို့ ပြည်ထောင်စုရွေးကောက်ပွဲကော်မရှင်(UEC) ကြေညာထားပါတယ်။

   ဒါပေမဲ့ ကချင်ပြည်နယ်ထဲက မံစီနဲ့ မိုးမောက်မြို့နယ်တွေမှာ မကျင်းပနိုင်လို့ စုစုပေါင်း ၆၁ မြို့နယ်မှာပဲ ပြုလုပ်နိုင်ပါတယ်။

   အဲဒီထဲမှာ ရန်ကုန်တိုင်းက မြို့နယ်ပေါင်း ၁၇ မြို့နယ်အထိ ပါဝင်နေပါတယ်။

   ကရင်ပြည်နယ်ထဲမှာတော့ ကော့ကရိတ်နဲ့ ကြာအင်းဆိပ်ကြီးမြို့နယ်တို့မှာပြုလုပ်ဖို့ ကြေညာထားပါတယ်။ ဒါပေမဲ့ ထိုင်း- မြန်မာနယ်စပ်ကုန်သွယ်ရေးအတွက် အခရာကျတဲ့ အာရှလမ်းမကြီးဖြတ်သန်းရာ ကော့ကရိတ်မှာတော့ စစ်တပ်နဲ့ ကရင်အမျိုးသားလွတ်မြောက်ရေးတပ်(KNLA) ပူးပေါင်းတပ်တွေ အခုရက်ပိုင်းအတွင်း တိုက်ပွဲ ဆက်ရှိနေပါတယ်။

   စစ်ကိုင်းတိုင်းထဲမှာတော့ ဆားလင်းကြီးနဲ့ ကနီမြို့တွေကို ရွေးကောက်ပွဲ အပိုင်း ၃ ပြုလုပ်ဖို့ ထည့်သွင်းထားပြီး အဲဒီမြို့နယ် နှစ်ခုစလုံးမှာ ဒီနေ့ ရွေးကောက်ပွဲမတိုင်ခင် စစ်တပ်က စစ်ကြောင်းထိုးတာနဲ့ လေကြောင်းတိုက်ခိုက်တာတွေ ရှိခဲ့ပါတယ်။

10. လွန်ခဲ့သော ၄ နာရီ က

    မင်္ဂလာပါ ...

    ဇန်နဝါရီလ ၂၅ ရက် နောက်ဆုံးရ မြန်မာနဲ့ ကမ္ဘာ့သတင်းတွေကို အခုစာမျက်နှာမှာ တိုက်ရိုက်တင်ဆက်ပေးသွားမှာဖြစ်ပါတယ်။

    ဆက်လက်ဖတ်ရှုဖို့လည်း ဖိတ်ခေါ်ပါတယ်။