စစ်ကောင်စီတပ်လေကြောင်းတိုက်ခိုက်မှုမှာ တပ်ဖွဲ့ဝင် ၆ ဦးကျဆုံးတယ်လို့ အေအေပြော

တိုက်ရိုက် ထုတ်လွှင့်ချက်

1. ၉ သြဂုတ် ၂၀၂၂ပြည်ပကနေ ရေနံနဲ့ ရေနံထွက်ပစ္စည်း တင်သွင်းမှု လျှော့ချဖို့လိုတယ်လို့ စစ်ခေါင်းဆောင်ပြော

   ရေနံနဲ့ ရေနံထွက်ပစ္စည်းတွေကို ပြည်ပကနေ တစ်နှစ်ကို အမေရိကန်ဒေါ်လာ ၁ ဒသမ ၃ ဘီလီယံဝန်းကျင် တင်သွင်းနေရလို့ ပြည်ပကနေတင်သွင်းမှု လျှော့ချသွားဖို့လိုအပ်တယ်လို့ စစ်ကောင်စီဥက္ကဋ္ဌကပြောလိုက်ပါတယ်။

   မနေ့က နေပြည်တော်မှာလုပ်တဲ့ ပြည်ထောင်စုအစိုးရအဖွဲ့လုပ်ငန်းဆောင်ရွက်ချက်များ ညှိနှိုင်းမှုအစည်းအဝေးမှာ ပြောလိုက်တာပါ။

   ပြည်တွင်းမှာ အထိုက်အလျောက် ရေနံထွက်ရှိပြီး အချို့ဒေသများရှိ တွင်းတိမ်ရေနံတူးဖော် ထုတ်လုပ်မှုတွေ စနစ်တကျဖြစ်ဖို့လိုပြီး ရေနံထုတ်လုပ်မှုလုပ်ငန်းတွေကို တိုင်းပြည်အတွက် အကျိုးရှိအောင် စနစ်တကျ ကြပ်မတ်ဆောင်ရွက်သွားကြဖို့လိုကြောင်း ဗိုလ်ချုပ်မှူးကြီးမင်းအောင်လှိုင်ကပြောပါတယ်။

   စစ်ကောင်စီဥက္ကဋ္ဌပြောတဲ့ ရေနံနဲ့ ရေနံထွက်ပစ္စည်းတွေဆိုတဲ့အထဲမှာ စက်သုံးဆီပါပါဝင်ပေမယ့် လက်ရှိတင်သွင်းခွင့်ပြုနေတဲ့ စက်သုံးဆီပမာဏကို ချက်ချင်းဖြတ်တောက်ဖို့ ညွှန်ကြားတာမဟုတ်ဘူးလို့ စစ်ကောင်စီသတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းကပြောပါတယ်။

   ‘ပထမအဆင့်က ပညာပေးခြင်းအားဖြင့် ခြွေတာနိုင်ဖို့၊ ဒုတိယအဆင့်က ပြည်တွင်းကနေထုတ်လုပ်သုံးစွဲနိုင်ဖို့၊တတိယအဆင့်က ပြည်ပကနေ တင်သွင်းတဲ့အခါ ခိုင်မာပြီးစျေးသက်သာတဲ့ ရေနံနဲ့စက်သုံးဆီ ရရှိနိုင်ဖို့ဖြစ်တယ်’လို့ သူကပြောပါတယ်။

   နိုင်ငံတော်ရဲ့အရန်အဖြစ်သိုလှောင်ထားတဲ့ စက်သုံးဆီပမာဏ အလုံအလောက်ရှိတယ်လို့လည်း သူကပြောပါတယ်။

   စက်သုံးဆီလုပ်ငန်းရှင်တစ်ဦးကတော့ လက်ရှိမှာတောင် စျေးကွက်ကလိုအပ်တဲ့ ပမာဏကို မဖြည့်ဆည်းပေးနိုင်လို့ လက်ရှိထက်လျှော့ချရင် ပိုပြီးကျပ်တည်းတဲ့အခြေအနေနဲ့ ရင်ဆိုင်ရနိုင်တယ်လို့ သုံးသပ်ပါတယ်။ ပြည်တွင်းကထုတ်နိုင်တဲ့အခြေအနေလည်း မရှိဘူးလို့ သူကဆက်ပြောပါတယ်။

   

   ဓာတ်ပုံ ရင်းမြစ်, Getty Images

2. ၇ ဇူလိုင် ၂၀၂၂မန္တလေးမြို့ ဘူတာကြီးအနီး မီးရထားရိပ်သာဝင်းရှေ့မှာ ပစ်ခတ်ပေါက်ကွဲမှုဖြစ်၊ နှစ်ဦးဒဏ်ရာရ

   မန္တလေးမြို့ ဘူတာကြီးအနီး မီးရထားရိပ်သာဝန်းနားက စစ်ကောင်စီတပ်ဖွဲ့ဝင်တွေယာယီနားနေဆောင်အနီးမှာ ဒီကနေ့ဇူလိုင် ၇ ရက် မနက်ပိုင်းက ပစ်ခတ်မှုဖြစ်ခဲ့တယ်လို့ ဒေသခံတွေကပြောပါတယ်။

   ဒီပစ်ခတ်၊ ‌ပေါက်ကွဲမှုကြောင့် အနီးမှာရှိနေတဲ့ အကြော်ရောင်းတဲ့ အမျိုးသမီးတစ်ဦးနဲ့ အမျိုးသားတစ်ဦး ထိခိုက်ဒဏ်ရာရခဲ့လို့ ဆေးရုံကို ပို့ဆောင်ပေးခဲ့ရတယ်လို့လည်း လူမှုကူညီကယ်ဆယ်ရေးအသင်းက ပြောပါတယ်။

   " ဆေးရုံကြီးကို ဘယာကြော်သည် အမျိုးသမီး နဲ့ အမျိုးသားတို့ ရင်ဘက် ဗုံးစမှန်ရောက်လာတယ်။ ရဲထိတာတော့ မကြားဘူး။ ‌ပစ္စတိုနဲ့ လေးချက်ပစ်ပြီးမှ ဟိုဘက်ကပြန်ပစ်တော့ ဗုံးနဲ့ပစ်ပြေးတာ"လို့ ဖြစ်စဉ် အခြေနေကို သိရတဲ့ ဒေသခံတဦးကပြောပါတယ်။

   ပစ်ခတ်မှုဖြစ်ပွားခဲ့တဲ့ နေရာဟာဆိုရင် စစ်အာဏာသိမ်းပြီးနောက်ပိုင်းကတည်းက နေ့စဥ်ဆိုသလို စစ်ကောင်စီတပ်ဖွဲ့ဝင်တွေက ဒေသခံတွေရဲ့ ယာဥ်အသွားအလာတွေကို စစ်ဆေးတဲ့နေရာတစ်ခုလည်း ဖြစ်တယ်လို့ ဒေသခံတွေကပြောပါတယ်။ ပစ်ခတ်မှုနဲ့ ပေါက်ကွဲမှုဖြစ်ပြီးတဲ့နောက်ပိုင်းမှာတော့ အနီးတစ်ဝိုက်မှာ စစ်ကောင်စီတပ်ဖွဲ့တွေက လမ်းပိတ်စစ်ဆေးတာတွေရှိခဲ့တယ်လို့လည်း သိရပါတယ်။

   

   ဓာတ်ပုံ ရင်းမြစ်, CJ

3. ၇ ဇူလိုင် ၂၀၂၂ဒေါ်အောင်ဆန်းစုကြည်ကို နေပြည်တော်အချုပ်ထောင်မှာပဲဆက်လက်ထားရှိထား, အစိုးရလျှို့ဝှက်ချက်အက်ဥပဒေ အမှု တရားသူကြီးခွင့်ယူလို့ မစစ်ဖြစ်

   နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ကိုစွပ်စွဲထားတဲ့အမှုတွေထဲက သြစတေးလျနိုင်ငံသားစီပွားရေးပညာရှင် မစ္စတာရှောင်တာနယ်နဲ့ အတူစွဲဆိုခံထားရတဲ့ အစိုးရလျှို့ဝှက်ချက်အက်ဥပဒေ ပုဒ်မနဲ့ အမှုကို ဒီကနေ့ ဇူလိုင် ၇ရက်မှာ တရားသူကြီးခွင့်ယူလို့ မစစ်ဆေးဖြစ်ခဲ့ဘူးလို့ တရားရုံးနဲ့နီးစပ်တဲ့အသိုင်းအဝိုင်းကဘီဘီစီကိုပြောပါတယ်။

   ဒီကနေ့ ဇူလိုင် ၇ ရက်မှာ ဒေါ်အောင်ဆန်းစုကြည်ရဲ့ကျန်းမာရေးကောင်းမွန်တာကိုတွေ့ရပြီး နေပြည်တော်အချုပ်ထောင် ထောင်တွင်းတရားရုံးမှာ ကြားနာမှုမစခင် ရှေ့နေတွေနဲ့ သီးသန့်တွေ့ဆုံခွင့်ရခဲ့တယ်လို့ ‌တရားရုံးအသိုင်းအဝိုင်းက အတည်ပြုပါတယ်။

   '' ဒီကနေ့ က ပြန်ခေါ်သက်သေဖြစ်တဲ့ ဒုရဲမှူးကြီးငွေထွန်းကို စစ်ဆေးဖို့ပါ။ ဒါပေမဲ့တရားသူကြီးမလာလို့ မစစ်ဖြစ်ပါဘူး။ အန်တီ ကျန်းမာရေးကောင်းပါတယ်။ နေပြည်တော်အချုပ်ထောင်ထဲမှာပဲဆက်ရှိနေရပါတယ်'' လို့ တရားရုံးအသိုင်းအဝိုင်းနဲ့ နီးစပ်သူတစ်ဦးကပြောပြပါတယ်။

   ပြန်ခေါ်သက်သေစစ်ပြီးရင်တော့ စွပ်စွဲခံရသူ ဒေါ်အောင်ဆန်းစုကြည်တို့ကိုဆက်လက်စစ်ဆေးဖို့ရှိနေပါတယ်။ မစ္စတာ ရှောင်တာနယ်ရဲ့ လက်(ပ်)တော့ နဲ့ စာရွက်စာတမ်းတွေမှာတွေ့ရှိတဲ့ အချက်အလက်တွေအရ သူအပါအဝင် ဒေါ်အောင်ဆန်းစုကြည်၊ စီမံ/ဘဏ္ဍာ ဝန်ကြီးဟောင်းတွေဖြစ်တဲ့ ဦးစိုးဝင်း၊ ဦးကျော်ဝင်းနဲ့ ဦးဆက်အောင်တို့ ကို စစ်ကောင်စီက မြန်မာနိုင်ငံအစိုးရလျှို့ဝှက်ချက်အက်ဥပဒေ နဲ့ တရားစွဲဆိုထားတာဖြစ်ပါတယ်။

   မနေ့ဇူလိုင် ၆ရက်မှာတော့ ‌ဒေါ်အောင်ဆန်းစုကြည်အတွက် လိုအပ်တဲ့ အစားအသောက်နဲ့ ရိက္ခာကို ထောင်ဝင်စာအနေနဲ့ နေပြည်‌တော်အချုပ်ထောင်ကိုပေးပို့ခဲ့ရတယ်လို့ ‌နီးစပ်သူတွေက အတည်ပြုပါတယ်။

   Update : ဘီဘီစီက ထပ်မံသတင်းမေးမြန်းမှုတွေအရ ဒေါ်အောင်ဆန်းစုကြည်ကို ရန်ကုန်အိမ်ခြံအမှတ် ၅၄ မှာ ပြောင်းရွှေ့ထားတယ်ဆိုတဲ့သတင်းမဟုတ်မှန်ကြောင်းတရားရုံးနဲ့နီးစပ်သူတွေက အတည်ပြုသလို ၊ စစ်ကောင်စီကလည်း နေပြည်တော်အချုပ်ထောင်သီးသန့် နေရာမှာသာထားရှိထားပြီး ၊ရန်ကုန်အိမ်ကိုပြောင်းရွှေ့ထားတာမဟုတ်ကြောင်း တုံ့ပြန်ပါတယ်။

   

   ဓာတ်ပုံ ရင်းမြစ်, Getty Images

4. ၇ ဇူလိုင် ၂၀၂၂သရုပ်ဆောင်သင်ဇာဝင့်ကျော်ကို ခေါ်ယူမေးမြန်းခြင်းသာဖြစ်တယ်လို့ စစ်ကောင်စီပြော

   မနေ့ ဇူလိုင် ၆ ရက်နေ့ညပိုင်းမှာ ဝမ်ဟိုင်းဒေသကအပြန် စစ်ကောင်စီတပ်ဖွဲ့ဝင်တွေရဲ့ဖမ်းဆီး ထိန်းသိမ်းမှုခံရတဲ့ သရုပ်ဆောင်သင်ဇာဝင့်ကျော်ကို ဖမ်းဆီးတာမဟုတ်ဘဲ ခေါ်ယူမေးမြန်းတာသာဖြစ်တယ်လို့ စစ်ကောင်စီပြောခွင့်ရက ဒီကနေ့ ဇူလိုင် ၇ ရက်နေ့မှာပြောပါတယ်။

   သရုပ်ဆောင်သင်ဇာဝင့်ကျော်က ပြီးခဲ့တဲ့ ဇူလိုင်လဆန်းကတည်းက ရှမ်းပြည်တိုးတက်ရေးပါတီ ရှမ်းပြည်တပ်မတော်(SSPP/SSA) ဌာနချုပ်ရှိရာ ၀မ်ဟိုင်းမြို့မှာဒေသဖွံ့ဖြိုးရေး မှတ်တမ်းရုပ်ရှင်ရိုက်ကူးဖို့သွားရောက်ခဲ့တာဖြစ်ပြီး အပြန်မှာ ဖမ်းဆီးခံလိုက်ရတာဖြစ်ကြောင်းနဲ့ စစ်ကောင်စီထံညှိနှိုင်းမှုတွေလုပ်နေတဲ့အကြောင်းလည်း SSPP က ဘီဘီစီကို အတည်ပြုပြောဆိုထားပါတယ်။

   ''ဖမ်းဆီးထိန်းသိမ်းထားခြင်းမရှိဘူး။ ရိပ်သာမှာပဲ မေးမြန်းစရာရှိတာတွေခေါ်ယူမေးမြန်းနေတာဖြစ်တယ်’’ လို့ စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းက ဘီဘီစီကိုပြောပါတယ်။

   လက်ရှိမှာတော့ သရုပ်ဆောင်သင်ဇာဝင့်ကျော်အပါအဝင် အတူပါသွားသူ ၆ ဦးဟာ လားရှိုးမြို့မှာဆက်လက်ထိန်းသိမ်းခံထားရဆဲဖြစ်ပြီး ပြန်လွတ်မြောက်ခြင်းမရှိသေးဘူးလို့ SSPP ဘက် ပြောပါတယ်။

   

   ဓာတ်ပုံ ရင်းမြစ်, social media

5. ၇ ဇူလိုင် ၂၀၂၂ကယားပြည်နယ်ထဲက ဒေသတချို့မှာ စိုက်ပျိုးရာသီအတွင်းပြန်စိုက်ပျိုးနိုင်ဖို့ တောင်သူတွေမျှော်လင့်, တောင်ယာတွေနဲ့ စိုက်ပျိုးရေးသုံးပစ္စည်းတွေလည်း ဆက်တိုက်မီးရှို့ဖျက်ဆီးခံနေရ

   စစ်အာဏာသိမ်းပြီးကတည်းက စစ်ကောင်စီနဲ့ဒေသကာကွယ်ရေးတပ်တွေကြား တိုက်ပွဲတွေပြင်းထန်နေတဲ့ ကယားပြည်နယ်အတွင်း က တောင်သူတချို့ဟာ အခုစိုက်ပျိုးရာသီမှာ လယ်ယာတွေပြန်စိုက်ပျိုးနိုင်ဖို့အတွက် မျှော်လင့်နေကြတယ်လို့ ဒေသခံတွေကပြောပါတယ်။

   ဒါပေမယ့်တိုက်ပွဲတွေပြင်းထန်နေတဲ့ ကယားပြည်နယ်အတွင်းနဲ့ ရှမ်းကယားနယ်စပ်တွေမှာတော့ အရပ်သားသေဆုံးမှုတွေ၊ဒေသခံတွေရဲ့ တောင်ယာတွေမီးရှို့ဖျက်ဆီးခံရတာတွေကတော့ ဆက်တိုက်ဆိုသလိုဖြစ်နေတယ်လို့ကရင်နီလူမှုအဖွဲ့အစည်းတွေကလည်း မနေ့ဇူလိုင် ၆ ရက်နေ့ထုတ်ပြန်ချက်မှာဖော်ပြလာပါတယ်။

   ဒေသတွင်းမှာလယ်ဧကပေါင်း တစ်ထောင်ကျော်အထိ စိုက်ပျိုးနေတဲ့ မိုးဗြဲမြို့နယ်ထဲက ဝါရီဆူးပလိုင်ကျေးရွာကိုတော့ စစ်ကောင်စီဘက်က ဒေသခံတွေလယ်ဧက မစိုက်ပျိုးနိုင်အောင်ရည်ရွယ်တပ်စွဲထားတဲ့အတွက် ဝါရီဆူးပလိုင်ကျေးရွာကို စစ်မဲ့ဇုန်အဖြစ်သတ်မှတ်ကြောင်းနဲ့ ဒေသခံတွေဖြတ်သန်းသွားလာတာမလုပ်ဖို့ဆိုပြီး မိုးဗြဲ PDF ကလည်း ပြီးခဲ့တဲ့ဇွန်လ ၂၈ ကထုတ်ပြန်ကြေညာထားပါတယ်။

   ပြီးခဲ့တဲ့ ဇွန်လအတွင်းမှာတော့ ကယားပြည်နယ်အတွင်းမှာ စစ်ကောင်စီနဲ့ ကရင်နီဒေသကာကွယ်ရေးပူးပေါင်းတပ်တွေကြားတိုက်ပွဲပေါင်း ၃၀ အထိဖြစ်ခဲ့ပြီး နှစ်ဖက်အထိအခိုက်ကျဆုံးမှုတွေရှိတဲ့အကြောင်းကိုလည်း KNDF က စစ်ရေးသတင်းထုတ်ပြန်ထားပါတယ်။

   ဒါ့အပြင် ပြီးခဲ့တဲ့ ဇူလိုင် ၄ ရက်နေ့က ဖယ်ခုံမြို့နယ်မှာဖြစ်ခဲ့တဲ့ နှစ်ဖက်တိုက်ပွဲမှာလည်း စစ်ကောင်စီဘက်က ဆယ်ချီကျဆုံးသလို KNDF တပ်ဖွဲ့ဝင် ၁၁ ဦးကျဆုံးတယ်လို့လည်း KNDF ကသတင်းထုတ်ပြန်ပါတယ်။

   တနှစ်ကျော်ကာလအထိ တိုက်ပွဲတွေပြင်းထန်နေတဲ့ ကယားပြည်နယ်ထဲမှာတော့ ပြည်နယ်လူဦးရေရဲ့တစ်ဝက်ကျော်လောက်ဖြစ်တဲ့ လူ ဦးရေ ၂သိန်းနီးပါးလောက်ဟာလည်း နေရပ်စွန့်ခွာ ထွက်ပြေးတိမ်းရှောင်နေရပြီး အရပ်သားသေဆုံးမှုဟာလည်း ၂၆၀ နီးပါး အထိရှိလာပြီလို့ ကရင်နီလူမှုအသင်းအဖွဲ့များကွန်ရက်က သတင်းထုတ်ပြန်ထားပါတယ်။

   

   ဓာတ်ပုံ ရင်းမြစ်, CJ

6. ၆ ဇူလိုင် ၂၀၂၂ကျောက်တော်မြို့မှာ စစ်တပ်က ဖမ်းသွားသူ သုံးဦးကို ရဲတပ်ဖွဲ့ထံလွှဲပေး, စစ်တပ်ဖမ်းထားသူ အယောက် ၄၀ ကျော်ထဲက အများစု မိသားစုနဲ့အဆက်အသွယ်ပြတ်နေဆဲ

   ရခိုင်ပြည်နယ် ကျောက်တော်မြို့မှာ စစ်ကောင်စီတပ်ဖွဲ့တွေရဲ့ ဖမ်းဆီးခြင်းခံထားရတဲ့ တက်ကြွလှုပ်ရှားသူ ဦးဇော်ဝင်းအပါအဝင် သုံးဦးကို မနေ့ ဇူလိုင် ၅ ရက် ရဲတပ်ဖွဲ့ထံ လွှဲပြောင်းပေးလိုက်ပြီဖြစ်တယ်လို့ မိသားစုတွေက ပြောပါတယ်။

   အဲဒီသုံးဦးတို့မှာ ဦးဇော်ဝင်း၊ ကိုကျော်သန်းမောင်၊ ကိုဇော်မိုးထက်တို့ဖြစ်ကြပြီး ကျောက်တော်မြို့အခြေစိုက် တပ်မကနေ ကျောက်တာ်ရဲတပ်ဖွဲ့ကို လွှဲပြောင်းပေးလိုက်တာလို့ သိရပါတယ်။ ပြီးခဲ့တဲ့ ဇွန်လ ၂၀ ရက်နေ့က ကျောက်တော်မြိုပေါ်မှာ ရဲတပ်ဖွဲ့ဝင်သုံးဦးတို့ကို အေအေဘက်က ဖမ်းဆီးခဲ့ပြီး ၂၁ ရက်နေ့မှာ စစ်ကောင်စီက မြို့တွင်းဝင်ရောက်လာကာ ရှာဖွေမှုတွေပြုလုပ်ချိန် အဖမ်းခံလိုက်ကြရသူတွေဖြစ်ကြပါတယ်။

   “မနေ့က နေ့လယ် ၂ နာရီလောက်မှာ ကျွန်မယောကျ်ားနဲ့ နောက်ထပ်နှစ်ဦး ရဲစခန်းကိုရောက်နေပြီလို့သိရလို့ သွားတွေ့ခဲ့ပါတယ်။ တွေ့ခွင့်ရခဲ့ပါတယ်။ လောလောဆယ်တော့ ကျန်းကျန်းမာမာဆိုတာ တွေ့ခဲ့ရပါတယ်”လို့ ဦးဇော်ဝင်းရဲ့အမျိုးသမီး ‌ဒေါခင်လှစံက ပြောပါတယ်။ ဦးဇော်ဝင်းကိုတော့ ပုဒ်မ ၅၀၅ (က)နဲ့ အမှုဖွင့်ထားသလို ကိုကျော်သန်းမောင်နဲ့ ကိုဇော်မိုးထက်တို့ကိုတော့ ပုဒ်မ ၅၀၅ (ခ) နဲ့ ကျောက်တော်မြို့မရဲစခန်းမှာ အဖွင့်ထားတယ်လို့ သိရပါတယ်။ အခုလို ခင်ပွန်းဖြစ်သူကို ကျန်းကျန်းမာမာပြန်တွေ့ရတဲ့အတွက် ဝမ်းသာခဲ့ရပြီး သူတို့သုံးဦးကို ဘယ်သူက တရားလိုလုပ်ပြီး ဘယ်အကြောင်းအရာနဲ့ အခုလို တရားစွဲဆိုတားတယ်ဆိုတာ မမေးမြန်းခဲ့ရဘူးလို့ ဒေါ်ခင်လှစံက ပြောပါတယ်။

   အခုလိုမျိုး အေအေနဲ့ စစ်ကောင်စီတို့ အပြန်အလှန် လူဖမ်းပွဲမှာ ဖမ်းဆီးခံခဲ့ရတဲ့အရပ်သား ၄၅ ဦးခန့်ရှိနေတယ်လို့ အေအေဘက်ကထုတ်ပြန်ထားပြီး နောက်ထပ်ဖမ်းဆီးခံထားရသူတွေကို ဘယ်နေရာတွေမှာ ထားရှိတယ်ဆိုတာ မသိရသေးတာကြောင့် မိသားစုတွေက စိုးရိမ်မှုတွေရှိနေကြတာဖြစ်ပါတယ်။

   

   ဓာတ်ပုံ ရင်းမြစ်, CJ

7. ၅ ဇူလိုင် ၂၀၂၂တောင်ပျောက်တိုက်နယ်ထဲ စစ်ရှောင် ၆ ထောင်နီးပါးရှိနေ

   

   ဓာတ်ပုံ ရင်းမြစ်, CJ

   တနင်္သာရီတိုင်း၊ ထားဝယ်ခရိုင်၊ သရက်ချောင်းမြို့နယ်ထဲက တောင်ပျောက်တိုက်နယ်ထဲမှာ စစ်ကောင်စီတပ်က ပြီးခဲ့တဲ့ရက်ပိုင်းကစလို့ စစ်ကြောင်းထိုးဝင်ရောက်နေတာကြောင့် လူဦးရေ ၆ ထောင်နီးပါး စစ်ဘေးရှောင်တွေ ဖြစ်လာတယ်လို့ သိရပါတယ်။

   လက်ရှိမှာ တောင်ပျောက်တိုက်နယ်ထဲမှာရှိတဲ့ ကျေးရွာပေါင်း ၁၀ ရွာထဲမှာ ၆ ရွာနီးပါးက ဒေသခံတွေဟာ ဘုန်းကြီးကျောင်းတွေ၊ ကွမ်းခြံတွေနဲ့ တောင်ယာတွေထဲမှာ တိမ်းရှောင်နေကြတာဖြစ်ပါတယ်။

   စစ်ကောင်စီတပ်ဟာ ဒေသကာကွယ်ရေးတပ်ဖွဲ့ဝင်တွေနဲ့ ဇူလိုင်လ ၃ ရက်မှာ တောင်ပျောက်တိုက်နယ်ထဲမှာတိုက်ပွဲဖြစ်အပြီး လုံခြုံရေးစိုးရိမ်တဲ့ဒေသခံတွေဟာ အခုလို ဘေးလွတ်ရာ ထွက်ပြေးတိမ်းရှောင်လာကြတာဖြစ်ပါတယ်။

   ‘‘တောင်ပျောက်တိုက်နယ်ထဲမှာ ဒေါင်းမင်းစစ်ဆင်ရေးဆိုတဲ့အဖွဲ့ရဲ့ လှုပ်ရှားမှုကို သူတို့ ထိန်းချုပ်ဖို့ ဖြစ်နိုင်တယ်။ ဒါက ပထမတစ်ချက်ပေါ့။ နောက်တစ်ချက်က စစ်ကောင်စီက ကွမ်းသီးတစ်ပိဿာကို ၄၀၀ ကျပ်လောက်အခွန်ရတယ်။ ကွမ်းသီးချိန်က တစ်ရာသီကို ပိဿာချိန် သောင်းဂဏန်းအထိ ထွက်တဲ့နေရာလည်းဖြစ်နေတော့ အဲဒီအပေါ်မှာ သူတို့ ဒီနယ်မြေကို ထိန်းချုပ်ချင်တဲ့သဘောပေါ့’’ လို့ စစ်ရှောင်တွေအရေးအကူအညီပေးနေသူက ပြောပါတယ်။

   အရင်တုန်းက ဒေသခံတွေ ထွက်ပြေးတာမျိုးမရှိခဲ့တဲ့ သဲချောင်းကြီးလိုရွာမျိုးက ဒေသခံတွေဟာ လက်နက်ကြီးကျတာကြောင့် စိုးရိမ်ပြီး ထွက်ပြေးတာ၊ နောက် ကျွဲခြံနဲ့ ဝင်းကဘော်လို လူဦးရေများတဲ့ကျေးရွာကြီးတွေက ဒေသခံတွေ ထွက်ပြေး တိမ်းရှောင်ကြတာကြောင့် စစ်ရှောင် ထောင်ချီတိုးလာတာဖြစ်ပါတယ်။

   တစ်ဖက်မှာလည်း တောင်ပျောက်တိုက်နယ်ထဲကို စစ်ကောင်စီတပ် အခုလို ဝင်ရောက်မွှေနှောက်ခံရတာ အာဏာသိမ်းပြီးကတည်းကဆိုရင် ၁၀ ကြိမ်ထက်မနည်းရှိနေပြီလို့ ဒေသခံတွေက ပြောပါတယ်။

8. ၅ ဇူလိုင် ၂၀၂၂CDM ကျောင်းဆရာရဲ့ မီးကျွမ်းနေတဲ့မျက်မှန်ဘူး

   

   ဓာတ်ပုံ ရင်းမြစ်, CJ

   မကွေးတိုင်း၊ ရေစကြိုမြို့‌မြောက်ပိုင်း၊ ဒါန်းပင်ကန်ရွာမှာ ပြီးခဲ့တဲ့ ဇွန်လ ၁၀ ရက်တုန်းက CDM ကျောင်းအုပ်ဆရာကြီး တစ်ဦးအပါအဝင် အကြီးတန်းသူနာပြုတစ်ဦး၊ ကျောင်းဆရာမတစ်ဦး၊ ဒေသကာကွယ်ရေးတပ်ဖွဲ့ဝင် ၂ ဦးတို့ ဖမ်းဆီးသတ်ဖြတ်ခံခဲ့ရပါတယ်။

   သူတို့ကို စစ်ကောင်စီတပ်ဖွဲ့ဝင်အချို့နဲ့ ဒေသအခေါ် ပျူစောထီးအဖွဲ့ဝင်တချို့က ပြီးခဲ့တဲ့ဇွန်လ ၁၀ရက်မှာ ဒါန်းပင်ကန်အနောက်ဘက်တောရိုးမှာ ဖမ်းခဲ့ကြတာဖြစ်ပါတယ်။

   အဲဒီနောက် ဇွန်လ ၁၄ ရက်မှာတော့ သူတို့ ရုပ်အလောင်းတွေကိုသာ ပြန်တွေ့ခဲ့ရတာဖြစ်ပါတယ်။

   မျက်မြင်သက်သေတွေ၊ပြန်လည်လွတ်မြောက်လာသူအချို့နဲ့ မေးထားတဲ့ ဒီအကြောင်း CDM ကျောင်းဆရာရဲ့မျက်မှန်ဘူးဆောင်းပါးကို ဝင်ရောက်ဖတ်ရှုနိုင်ပါပြီ။

9. ၅ ဇူလိုင် ၂၀၂၂အာရှလမ်းသစ်က စစ်ကောင်စီစခန်း ပစ်ခတ်ခံရ၊ တိုက်ပွဲ တစ်နာရီခန့် ကြာ ဖြစ်ပွား, စစ်ကောင်စီ တပ်ဖွဲ့၀င် ၃ ဦး သေဆုံးတယ်လို့ ပြော

   ကော့ကရိတ်-မြ၀တီ အာရှလမ်းသစ် KNU မွေးမြူရေးစခန်းဟောင်း အနီး ရှိ စစ်ကောင်စီလုံခြုံရေးဂိတ်စခန်းတစ်ခု ဇူလိုင်လ ၅ ရက် မနက်ပိုင်းက ပစ်ခတ်ခံရလို့ စစ်ကောင်စီဘက်က တပ်ဖွဲ့၀င် ၃ ဦးသေဆုံးပြီး တိုက်ပွဲ တစ်နာရီခန့်ကြာ ဖြစ်ပွားခဲ့တယ်လို့ ကော့ကရိတ် စစ်ရေး နယ်မြေ သတင်း အရင်းအမြစ်က ပြောပါတယ်။

   စစ်ကောင်စီ ဂိတ်ကို ဒေါနတောင် အရှေ့ဘက်မှာလှုပ်ရှားနေတဲ့ လက်နက်ကိုင်တပ်တွေက လာရောက် ပစ်ခတ် တိုက်ခိုက်ခဲ့တာဖြစ်ပြီး စစ်တပ်အတွက် စစ်ကူလာတဲ့ စစ်ကောင်စီ တပ်တွေ၊ BGF တပ်တွေနဲ့ ပူးပေါင်းတပ်တွေကြား တိုက်ပွဲ ၁နာရီခန့်ဖြစ်ပွားခဲ့တယ်လို့လည်း သိရပါတယ်။

   "အာရှ လမ်းက မနက်က ၆ နာရီ လောက် က ပစ်ခတ်မှုဖြစ်တယ်။ အရင်က KNU မွေးမြူရေး လုပ်ဖို့ စခန်း လုပ်ထားတဲ့ နေရာ အထက် လမ်းတောင်ကုန်း နားမှာ စစ်ကောင်စီ စခန်း ရှိတယ်၊ အရင်က BGF တွေ လည်း နေတယ်၊ ကုန်ကားတွေ အိမ်စီးကားတွေ ကို ပိုက်ဆံ ကောက်တာ ရှိတယ် ။ မနက်က တိုက်ပွဲဖြစ်တော့ ကားလမ်းတော့ ခဏ ပိတ်သွားတယ်။ ကရင် အဖွဲ့ ၊ကျားဖြူ အဖွဲ့ ၊ပကဖ အဖွဲ့ ၊တော်လှန်ရေး အဖွဲ့ တွေ အဖွဲ့ စုံ ရှိ နေတဲ့ နေရာဆိုတော့ ဘယ် အဖွဲ့ က ပစ်တာလဲဆိုတာတော့ မသိရဘူး၊ စနိုက်ပါနဲ့ ပစ်တာ ၃ယောက် သေတယ်တော့ အနီးအနား က BGF တွေ ပြောတာတော့ သိရတယ်။ ဒဏ်ရာ ရတာလည်း ရှိတယ် ကြားတယ်၊ စစ်တပ်နဲ့ BGF တွေ ကားတွေ မြ၀တီ ဘက် တောင်ပေါ် က ဆင်းလာပြီး ပစ်ခတ်တာတော့ ရှိတယ်၊ အခုတော့ ပုံ မှန် ကားတွေ ဆင်းနေတယ် " လို့ ကော့ကရိတ် စစ်ရေးနယ်မြေ သတင်းအရင်းအမြစ်က ပြောပါတယ်။

   စစ်တပ်ဘက်က ၃ ဦးသေဆုံးတယ်ဆိုတာနဲ့ပတ်သက်လို့ သီးခြားအတည်ပြုနိုင်ဖို့ ဘီဘီစီက စစ်ကောင်စီကို ဆက်သွယ်မေးမြန်းဖို့ကြိုးစားနေပါတယ်။

   ကော့ကရိတ်-မြ၀တီ အာရှ လမ်းသစ်မှာ ၂၀၂၂ ခုနှစ် မတ်လ -ဧပြီလ တွေမှာ KNLA ပူးပေါင်းတပ်နဲ့ စစ်ကောင်စီ တပ်တွေ တိုက်ပွဲ ဖြစ်ပွားမှုအတွင်း လမ်းအသုံးပြုဖြတ်သန်းသွားလာတဲ့ ကုန်ကားတွေ၊ အိမ်စီးကားတွေ၊ ခရီးသည်တင်ယာဥ်တချို့ ပစ်ခတ် မီးရှို့ ခံ ရ မှု ၁၀ ကြိမ် ထက်မနည်း ဖြစ်ပွားခဲ့ပါတယ်။ အခု ဇူလိုင် လ ၅ ရက်မှာ အာရှ လမ်း မ ပေါ် စစ်ကောင်စီ တပ်တွေနဲ့ ဒေသတွင်း တော်လှန်ရေး အဖွဲ့တွေကြား တိုက်ပွဲပြန်ဖြစ်လာလို့ အာရှလမ်းမမှာ စစ်ရေးပြန်လည်လှုပ်ရှားမှုသဘောလို့ ယူဆမှုတွေရှိနေပါတယ်။

   

   ဓာတ်ပုံ ရင်းမြစ်, CJ

10. ၅ ဇူလိုင် ၂၀၂၂KNU တပ်မဟာ ၅ နယ်မြေမှာ BGF နယ်ခြားစောင့်တပ်ဖွဲ့ဝင်တွေ တိုက်ခိုက်ခံရပြီး သေဆုံးသူတွေရှိ

    

    ဓာတ်ပုံ ရင်းမြစ်, မူတြော်သတင်း

    ကရင်ပြည်နယ်၊ ဖာပွန်မြို့နယ်ထဲက ကမမောင်းနဲ့ ကတိုင်တိလမ်းပေါ်မှာ စစ်ကောင်စီတပ်လက်အောက်က နယ်ခြားစောင့်တပ်(BGF) တပ်ဖွဲ့ဝင်အချို့ဟာ ကရင်အမျိုးသားအစည်းအရုံး-ကေအဲန်ယူရဲ့ ကရင်အမျိုးသားလွတ်မြောက်ရေးတပ်(KNLA) တပ်ဖွဲ့ဝင်တွေရဲ့ တိုက်ခိုက်တာကို ခံခဲ့ရပါတယ်။

    စစ်ကောင်စီတပ်လက်အောက်က အမှတ်-၁၀၁၃ နယ်ခြားစောင့်တပ်ဖွဲ့ဝင်တွေရဲ့ မော်တော်ယာဥ်ကို ဇူလိုင်လ ၁ ရက်မှာ တိုက်ခိုက်ခဲ့တာလို့ ကေအဲန်ယူ တပ်မဟာ ၅ နယ်မြေ ဖာပွန်(မူတြော်)ခရိုင်သတင်းတွေကို ဖော်ပြနေတဲ့မူတြော်သတင်းစဥ်က သတင်းထုတ်ပြန်လာတာဖြစ်ပါတယ်။

    ကမာမို(ကမမောင်းရွာ)ကနေ ကတဲတိ(ကတိုင်တိရွာ)ဘက်ကို ‌မောင်းလာတဲ့ အဲဒီကားကို ကြားဖြတ်တိုက်ခိုက်ခဲ့တာဖြစ်ပြီး နယ်ခြားစောင့်တပ်ဖွဲ့ဝင် ၇ ဦးသေဆုံးတယ်လို့လည်းဆိုပါတယ်။

    ကားပေါ်ပါလာတဲ့ လက်နက်ခဲယမ်းတွေကို KNLA ဘက်က သိမ်းဆည်းခဲ့ပြီး ကားကိုတော့ ဖျက်ဆီးခဲ့တယ်လို့လည်း ထုတ်ပြန်ချက်ကဆိုပါတယ်။

    BGF တပ်ဖွဲ့၀င်တွေ သေဆုံးမှုနဲ့ပတ်သက်လို့ စစ်တပ်ကတော့သတင်းထုတ်ပြန်တာမရှိသေးပါဘူး။

11. ၅ ဇူလိုင် ၂၀၂၂ဒေါ်အောင်ဆန်းစုကြည်နဲ့ တွေ့ခွင့်ရဖို့ အာဆီယံအထူးသံ ထပ်လောင်းပြောဆို

    

    ဓာတ်ပုံ ရင်းမြစ်, AKP

    အာဆီယံအထူးသံတမန်လည်းဖြစ်၊ ကမ္ဘောဒီးယားနိုင်ငံခြားရေးဝန်ကြီးလည်းဖြစ်တဲ့ မစ္စတာ ပရက်ဆော့ခွန်းဟာ ဒေါ်အောင်ဆန်းစုကြည်နဲ့တွေ့ဆုံခွင့်ရဖို့ စစ်ကောင်စီဘက်ကို ထပ်လောင်းတောင်းဆိုခဲ့တယ်လို့ သိရပါတယ်။

    အာဆီယံအထူးသံဟာ သူ့ရဲ့ မြန်မာပြည်တွင်းခရီးစဥ်မှာ စစ်ကောင်စီနိုင်ငံခြားရေးဝန်ကြီး ဦးဝဏ္ဏမောင်လွင်နဲ့ တွေ့ဆုံချိန် အခုလို တောင်းဆိုခဲ့တာဆိုပြီး အထူးသံရဲ့ ခရီးစဥ်အပြီးထုတ်ပြန်ချက်မှာ ဖော်ပြပါတယ်။

    အထူးသံဟာ သူ့ရဲ့ မြန်မာပြည်တွင်း ခရီးစဥ်မှာ သမ္မတကတော်ဟောင်းလည်းဖြစ်၊ လွှတ်တော်အမတ်လည်း ဖြစ်တဲ့ဒေါ်စုစုလွင်နဲ့လည်း တွေ့ဆုံခွင့်ရဖို့ တောင်းဆိုခဲ့ပေမဲ့ ဒေါ်စုစုလွင်ရဲ့ ကျန်းမာရေးအခြေအနေကြောင့် မတွေ့နိုင်ခဲ့ဘူးလို့ သိရပါတယ်။

    ဒါ့ပြင် အထူးသံတမန်ဟာ စစ်ကောင်စီဥက္ကဋ္ဌနဲ့တွေ့ဆုံချိန်မှာ ကုလသမဂ္ဂရဲ့ မြန်မာနိုင်ငံဆိုင်ရာအထူးကိုယ်စားလှယ်နဲ့ လက်တွဲလုပ်နိုင်မယ့်နည်းလမ်းတွေကို ရှာဖွေဖို့ စစ်ကောင်စီဘက်ကို တောင်းဆိုခဲ့တယ်လို့လည်း သိရပါတယ်။

    အဲဒီလို အခြေအနေ ဖန်တီးနိုင်မှသာ အာဆီယံနဲ့ ကုလသမဂ္ဂကြား ပူးပေါင်းဆောင်ရွက်မှု မူဘောင်အတွင်း ဟန် ချက်ညီညီလုပ်ကိုင်နိုင်မယ့်အကြောင်းကိုလည်း အထူးသံက ရှင်းပြခဲ့တယ်လို့ ဆိုပါတယ်။

    အခုခရီးစဥ်ဟာ အာဆီယံအထူးသံ မြန်မာနိုင်ငံကို လာရောက်တဲ့ ဒုတိယအကြိမ် ခရီးစဥ်ဖြစ်ပြီး နှစ်ကြိမ်စလုံးမှာ အထူးသံဟာ ဒေါ်အောင်ဆန်းစုကြည်နဲ့တွေ့ဆုံခွင့်မရခဲ့ပါဘူး။

    စစ်ကောင်စီဘက်ကတော့ ဒေါ်အောင်ဆန်းစုကြည်ဟာ အမှုတွေရင်ဆိုင်နေရသူဖြစ်တာကြောင့် ဥပဒေအရ ထောက်ပြပြောဆိုပြီး တွေ့ဆုံခွင့်ကို ငြင်းဆိုထားတာဖြစ်ပါတယ်။

12. ၅ ဇူလိုင် ၂၀၂၂ရန်ကုန် လှိုင်မြို့နယ်ကို ဗဟိုပြုပြီး အင်အားအသင့်တင့်ရှိတဲ့ငလျင်တစ်ခု လှုပ်ခတ်

    

    ဓာတ်ပုံ ရင်းမြစ်, ရွှေအင်းသားခင်မောင်ဝင်း

    ရန်ကုန်မြို့၊ လှိုင်မြို့နယ်ကို ဗဟိုပြုပြီး အင်အားအနည်းငယ်ရှိတဲ့ငလျင်တစ်ခု ဒီနေ့ ဇူလိုင်လ ၅ ရက် မနက်ပိုင်းမှာ လှုပ်ခတ်သွားတယ်လို့ မိုးလေဝသနဲ့ ဇလဗေဒညွှန်ကြားမှု ဦးစီးဌာနက သတင်းထုတ်ပြန်ပါတယ်။

    မနက်က လှုပ်ခတ်ခဲ့တဲ့ငလျင်ဟာ အင်အား ရစ်(ချ်)တာစကေး ၃.၀ အဆင့်ရှိ အင်အားအနည်းငယ်ရှိတဲ့ မြေငလျင်ဖြစ်ပြီး ရန်ကုန်မြို့၊ လှိုင်မြို့နယ်အရှေ့မြောက်ဘက်တစ်မိုင်ခန့်အကွာကို ဗဟိုပြုလှုပ်ခတ်သွားတယ်လို့ဆိုပါတယ်။

    ဒါပေမဲ့ ရန်ကုန်မြို့ထဲက မရမ်းကုန်း၊ အင်းစိန်၊ လှိုင်မြို့နယ်တွေမှာအပြင် ဆိပ်ကြီးခနောင်တိုမြို့နယ်တို့မှာလည်း ငလျင်လှုပ်ခတ်မှုကို သိသိသာသာ ခံစားခဲ့ကြရတယ်လို့ ဒေသခံတွေက ဘီဘီစီကို လာရောက်ပြောပြကြပါတယ်။

    ‘’မနက်တုန်းက မုန့်ဟင်းခါးစားနေတုန်းလှုပ်သွားတာ။ အထိတ်တလန့်တော့ဖြစ်သွားတယ်။ မုန့်စားနေတုန်း တုန်ခါသွားတယ်ဗျ။ တုန်ခါမှုကိုငါးစက္ကန့်လောက်ကြုံခဲ့ရတယ်ဗျာ။ မြေအောက်ကနေ ရထားမောင်းသွား သလိုမျိုးပေါ့’’ လို့ ရန်ကုန်မြို့ခံတစ်ဦးက ပြောပါတယ်။

    ပြင်းအား အနည်းငယ်သာရှိတယ်လို့ မိုးဇလဘက်က ထုတ်ပြန်ပေမဲ့ ရန်ကုန်မြို့ခံတွေကတော့ ဒီထက်အား ပြင်းတဲ့ငလျင်လှုပ်ခတ်မှုမျိုး ခံစားခဲ့ရတယ်လို့ လူမှုကွန်ယက်တွေမှာ ပြောဆိုနေကြပါတယ်။

13. ၅ ဇူလိုင် ၂၀၂၂စစ်ကောင်စီရဲ့ လေကြောင်းတိုက်ခိုက်မှုကြောင့် တပ်ဖွဲ့ဝင် ၆ ဦးကျဆုံးတယ်လို့ အေအေပြော

    

    ဓာတ်ပုံ ရင်းမြစ်, အေအေ

    မြန်မာ-ထိုင်းနယ်စပ်အနီးက ကရင်ပြည်နယ်၊ KNLA တပ်မဟာ ၅ နယ်မြေထဲမှာရှိတဲ့ ရက္ခိုင့်တပ်တော်(အေအေ)ရဲ့ တပ်စခန်းတစ်ခုကို စစ်ကောင်စီတပ်က လေယာဥ်နဲ့ ဗုံးကြဲ တိုက်ခိုက်ချိန် တပ်ဖွဲ့ဝင် ၆ ဦးကျဆုံးခဲ့တယ်ဆိုပြီး အေအေဘက်က ဒီနေ့ ဇူလိုင်လ ၅ ရက်မှာ သတင်းထုတ်ပြန်လာပါတယ်။

    စစ်ကောင်စီတပ်ရဲ့ တိုက်လေယာဥ် ၂ စင်းက စခန်းကို မနေ့ ဇူလိုင်လ ၄ ရက် နေ့လယ်ပိုင်းမှာ ဗုံးကြဲတိုက်ခိုက်ချိန် စခန်းပျက်စီးခဲ့သလို အဲဒီတပ်ဖွဲ့ဝင် ၆ ဦးလည်း ကျဆုံးခဲ့တာလို့ အေအေဘက်က ပြောပါတယ်။

    အေအေထုတ်ပြန်ချက်အရ ကျဆုံးတဲ့သူတွေဟာ တပ်သားအဆင့်ရှိသူ အသက်အကြီးဆုံး ၃၁ နှစ်နဲ့ အငယ်ဆုံး အသက် ၂၀ အရွယ် အမျိုးသားတွေဖြစ်ကြပါတယ်။

    စစ်ကောင်စီရဲ့လေကြောင်းတိုက်ခိုက်မှုအတွင်း စခန်းထဲက ဆေးရုံ၊ ဆေးခန်း၊ စက်ချုပ်စက်ရုံအပါအဝင် အဆောက်အအုံအချို့ ပျက်စီး ဆုံးရှုံးခဲ့တယ်လို့လည်း ဆိုပါတယ်။

    စစ်ကောင်စီရဲ့ အဲဒီဂျက်တိုက်လေယာဉ် နှစ်စီးဟာ နယ်စပ်အနီးက တပ်စခန်းကို မြန်မာဘက်(ကရင်ပြည်နယ်ထဲ)ကနေ ရုတ်တရက် ဗုံးကြဲတိုက်ခိုက်ပြီးနောက် ထိုင်းနိုင်ငံလေပိုင်နက်ထဲဝင်ရောက်သွားခဲ့တယ်ဆိုပြီးတော့လည်း အေအေဘက်က ပြောထားပါတယ်။

14. ၅ ဇူလိုင် ၂၀၂၂ဗန်းမော်-လွယ်ဂျယ်လမ်း ပျက်စီးနေတာကြောင့် ကုန်သွယ်ရေး အခက်တွေ့နေ

    

    ဓာတ်ပုံ ရင်းမြစ်, ရွှေဖီမြေ

    မြန်မာ-တရုတ် နယ်စပ်ကုန်သွယ်ရေးမှာ အရေးပါတဲ့ ဗန်းမော်-လွယ်ဂျယ်လမ်းဟာ တံတားပျက်တာ၊ တောင်ပြိုလို့ လမ်းပျက်တာတွေကြောင့် ကုန်ပစ္စည်းတွေကို ကားသေးတွေနဲ့သာ သယ်ယူနိုင်တဲ့အခြေအနေရှိနေပါတယ်။

    ဗန်းမော်-လွယ်ဂျယ်လမ်း ဖြစ်တဲ့ စိန်လုံအကျော် ၂၈ မိုင်နားမှာ တံတားပျက်သလို လွယ်ဂျယ် အဝင်နားက လမ်းဟာလည်း မိုးများလို့ တောင်ပြိုတာ၊ လမ်းတွေအက်ကြောင်းဖြစ် နိမ့်လျှောကျတာတွေ ဖြစ်နေတယ်လို့ အဲဒီလမ်းကို သွားလာနေသူတွေက ပြောပါတယ်။

    အဲ့ဒီလမ်းဟာ ကုန်ကားကြီးတွေ ဖြတ်သန်းမှုများတာ၊ မိုးများပြီး တောင်ပြိုတာတွေကလည်း လမ်းတစ်လျှောက်က တံတားတွေ၊ လမ်းတွေ ပျက်စီးတဲ့အကြောင်းရင်း တစ်ရပ်လို့ ကားသမားတွေက ပြောကြပါတယ်။

    “စိန်လုံအကျော် ၂၈ မိုင်၊ ရှမ်းကုလား ထမင်းဆိုင်နားကတံတား ပျက်ကျသွားတာ။ ပြုတ်ကျသွားတာပေါ့။ အောက်ကို။ တံတားကျိုးတာနဲ့ လွယ်ဂျယ်အဝင်တောင်ပြိုတာနဲ့ဆိုတော့ သွားတဲ့လူတော့ သိပ်မရှိဘူး။ မြစ်ကြီးနားတော့သိပ်မရှိဘူး။ ဗန်းမော်တော့ လွယ်ဂျယ်ကတော့ သွားတယ်။ ဟိုဘက်ဒီဘက် ပစ္စည်းတွေကဲ့ပြီးသွားနေရတာ။ တံတားပျက်ကျသွားတော့အဲ့နားကနေပြီးအဲ့ကနေ ကဲ့ရတာပေါ့နော်။ ဟိုဘက်နဲ့ဒီဘက် ကားချိန်းရတာ။ တဆင့်ပြန်ချိန်းစီးပြီးတော့ ပစ္စည်းတွေရော၊ အကုန်လုံး ချိန်းပြီးတော့သွားနေရတယ်’’ လို့ ကားသမားတစ်ဦးက ပြောပါတယ်။

    အဲဒီလမ်းပိုင်းပျက်နေလို့ လမ်းကို ယာယီပိတ်ထားခဲ့ပေမဲ့ ဒီနေ့မနက်မှာ ကားအသေးတွေကို သွားလာနိုင်ပြီလို့ သိရပါတယ်။

    အဲဒီလမ်းဟာ တရုတ်နိုင်ငံ၊ ကျန်ဖုန်းမြို့နယ်နဲ့ ကချင်ပြည်နယ်၊ မိုးမောက်မြို့နယ်၊ လွယ်ဂျယ်နဲ့ ဗန်းမော်ကို ဆက်သွယ်ထားပြီး မိုင် ၅၀ ကျော်ရှိပါတယ်။

    မြန်မာက တရုတ်ဘက်ကို ဆန်၊ ဆန်ကွဲ၊ ပြောင်း၊ တစ်ရှူးငှက်ပျော၊ ဖရဲသီး၊ ရော်ဘာ တွေကို အများဆုံး တင်ပို့ပြီး တရုတ်ဘက်ကနေ ဘိလပ်မြေ၊ ချည်ထည်၊ လယ်ယာသုံးပစ္စည်း၊ ဆိုင်ကယ်တွေကို တင်သွင်းရာမှာ ဒီလမ်းကို အသုံးပြုနေကြတာဖြစ်ပါတယ်။

15. ၄ ဇူလိုင် ၂၀၂၂KNLA တပ်မဟာ ၅ နယ်မြေထဲက အေအေစခန်း ဗုံးကြဲခံရ

    

    ဓာတ်ပုံ ရင်းမြစ်, AA သတင်းနှင့်ပြန်ကြားရေး

    မြန်မာနဲ့ထိုင်းန​ယ်စပ်မှာ ရှိတဲ့ အေအေ စခန်းတစ်ခု လေကြောင်း တိုက်ခိုက် ခံရတယ်လို့ အေအေတပ်ဘက်က သတင်းထုတ်ပြန်ပါတယ်။

    ကရင်ပြည် KNLA တပ်မဟာ ၅ ဧရိယာထဲမှာ ရှိတဲ့ ရက္ခိုင့်တပ်တော်ရဲ့ တပ်စခန်းတစ်ခုကို စစ်ကောင်စီ လေတပ် ဂျက်တိုက်လေယာဥ် ၂ စင်း က တိုက်ခိုက် ခဲ့တာကြောင့် တပ်ဖွဲ့ဝင်တချို့ ကျဆုံးဒဏ်ရာရတာတွေ ဖြစ်ခဲ့တယ် ဆိုပြီး အေအေ သတင်းနဲ့ပြန်ကြားရေး အဖွဲ့က ထုတ်ပြန် ပါတယ်။

    အဲဒီ စခန်းမှာ ရှိတဲ့ ဆေးရုံ ဆေးခန်း၊ စက်ချုပ်စက်ရုံ အပါအဝင် အဆောက်အဦးတချို့လည်း ပျက်စီး ဆုံးရှုံးခဲ့တယ်လို့ ဆိုပါတယ်။

    ဒီကနေ့ ဇူလိုင် ၄ ရက် ၊ မွန်းလွဲပိုင်းမှာ အဲဒီလို တိုက်ခိုက် ခံခဲ့ရတာလို့ ဆိုပါတယ်။

    တိုက်ခိုက်လာတဲ့ စစ်ကောင်စီ တိုက်လေယာဥ်ပျံတွေဟာ မြန်မာနိုင်ငံဘက်ခြမ်းကနေ ပျံသန်းလာတာ ဖြစ်ပြီး၊ ရှောင်တခင် ဗုံးကြဲ တိုက်ခိုက်ပြီးတဲ့နောက်မှာတော့ ထိုင်းနိုင်ငံ လေပိုင်နက်ထဲ ဝင်ရောက် သွားတယ်ဆိုပြီး အေအေရဲ့ ထုတ်ပြန်ချက်ထဲ ဖော်ပြထားပါတယ်။

    

    ဓာတ်ပုံ ရင်းမြစ်, AA သတင်းနှင့်ပြန်ကြားရေး

16. ၄ ဇူလိုင် ၂၀၂၂လောင်းလုံးပြည်သူ့ကာကွယ်ရေးတပ်ဖွဲရဲ့ စခန်း အသိမ်းခံရ, ဘုတလင်မှာလည်း ဒေသကာကွယ်ရေးတပ်ဖွဲ့ရဲ့ လက်နက်တိုက် ပေါက်ကွဲမှုဖြစ်

    

    ဓာတ်ပုံ ရင်းမြစ်, LLPDF

    တနင်္သာရီတိုင်း၊ ထားဝယ်ခရိုင်၊ လောင်းလုံမြို့နယ်ထဲမှာ လောင်းလုံးပြည်သူ့ကာကွယ်ရေးတပ်ဖွဲ့(LLPDF)ရဲ့ စခန်းတစ်ခုကို စစ်ကောင်စီတပ်ရဲ့ စီးနင်းသိမ်းပိုက်တာခံခဲ့ရတယ်လို့ အဲဒီအဖွဲ့က ဒီနေ့ ဇူလိုင်လ ၄ ရက်မှာ သတင်းထုတ်ပြန်ပါတယ်။

    လောင်းလုံးမြို့နယ်ထဲမှာ စစ်ကောင်စီတပ်က ပြီးခဲ့တဲ့ ဇွန်လ ၁၄ ရက်နေ့ကတည်းက မြို့နယ်ထဲကကျေးရွာတွေကို ဝင်ရောက်မွှေနှောက်နေတာဖြစ်ပြီး ဒေသကာကွယ်ရေးစခန်းကိုတော့ မနေ့ ဇူလိုင်လ ၃ ရက်မှာ ထိုးစစ်ဆင်ခဲ့တာလို့ ဆိုပါတယ်။

    စစ်ကောင်စီတပ်က အင်အားနဲ့ အခုလိုထိုးစစ်ဆင်လာချိန် ပစ်ခတ်မှုဖြစ်ပွားခဲ့ပေမဲ့ လူအင်အားနဲ့ လက်နက်အင်အား မမျှတတာကြောင့် စခန်းကနေ ဆုတ်ခွာခဲ့ရတာဖြစ်ပြီး ပကဖ ရဲဘော်တစ်ဦးလည်း သေနတ်ဒဏ်ရာနဲ့ အဖမ်းခံခဲ့ရတယ်လို့ အဲဒီအဖွဲ့က သတင်းထုတ်ပြန်ပါတယ်။

    တစ်ဖက်မှာလည်း စစ်ကောင်စီနဲ့ ဒေသကာကွယ်ရေးတပ်ဖွဲ့တွေကြား ထိတွေ့ တိုက်ပွဲတွေရှိနေတဲ့ စစ်တိုင်းတိုင်းထဲမှာ ဒေသကာကွယ်ရေးတပ်ဖွဲ့တစ်ဖွဲ့ရဲ့ လက်နက်သိုလှောင်တဲ့နေရာ ဒီနေ့မှာပဲ ပေါက်ကွဲမှုဖြစ်ခဲ့ပါတယ်။

    

    ဓာတ်ပုံ ရင်းမြစ်, ဒုံးပျံ

    စစ်ကိုင်းတိုင်း၊ ဘုတလင်မြို့နယ်က ဒေသကာကွယ်ရေးတပ်တစ်ခုဖြစ်တဲ့ ဒုံးပျံဒေသကာကွယ်ရေးတပ်ရဲ့ လက်နက်စခန်းပေါက်ကွဲမှုဖြစ်ခဲ့တာကြောင့် သိန်း ၈၀ ကျော်ဖိုးလောက် ဆုံးရှုံးသွားခဲ့တယ်လို့ သိရပါတယ်။

    ‘’နှာယမ်းတွေကနေ စဖြစ်တာပေါ့။ သူ့သဘာဝက လေလုံလို့ရှိရင်လည်း ကွဲတတ်တယ်။ စပ်ပြီးသားတွေဆိုတော့ နေပူတာများလို့ အပူဒဏ်များရင်လည်း ကွဲတတ်တယ်။ သူ့ချည်း တစ်ချောင်းချင်းထားရင်တောင် ထထပေါက်ကွဲနေတာ။ တပ်သားအချို့က အဲဒါကို သတိမထားမိဘဲ စက္ကူဖာတွေနဲ့စုထည့်ထားမိလိုက်ရာကနေ ဖြစ်တာ’’ လို့ အဲဒီအဖွဲ့က ပြောပါတယ်။

    အဲဒီပေါက်ကွဲမှုကြောင့် ဒုံးပျံအဖွဲ့က တပ်ဖွဲ့ဝင် ၂ ဦး ဒဏ်ရာရခဲ့တယ်လို့ သိရပါတယ်။

17. ၄ ဇူလိုင် ၂၀၂၂ကျောက်တော်မြို့နယ်မှာ နွားကျောင်းနေသူတစ်ဦးမိုင်းထိ, လဆန်းပိုင်းအတွင်း ရခိုင်မှာ မိုင်းပေါက်ကွဲမှုကြောင့် နှစ်ဦးသေ၊ တစ်ဦးဒဏ်ရာရ

    

    ဓာတ်ပုံ ရင်းမြစ်, CJ

    ရခိုင်ပြည်နယ်၊ ကျောက်တော်မြို့နယ်မှာ ဇူလိုင်လ ၄ ရက် ဒီကနေ့ နေ့လယ်ပိုင်းက မိုင်းပေါက်ကွဲမှုတစ်ခု ထပ်မံဖြစ်ပွားခဲ့ပြီး အရပ်သားတစ်ဦး သေဆုံးခဲ့ရတယ်လို့ သိရပါတယ်။

    သေဆုံးသူဟာ ကျောက်တော်မြို့နယ်၊ အပေါက်ဝကျေးရွာအုပ်စု၊ မျာလီကန်ကျေးရွာက အသက် ၃၅ နှစ်အရွယ် ဦးလှမောင်ဖြစ်ပြီး လယ်ကွင်းပြင်ထဲနွားကျောင်းနေချိန် စစ်တပ်ရဲ့မိုင်းကွင်းထဲကို ရောက်ရှိသွားပြီး အခုလိုဖြစ်ခဲ့ရတာလို့ ဒေသခံတွေက ပြောဆိုကြပါတယ်။

    ဦးလှမောင်ဟာ သူ့ပိုင်တဲ့နွားအုပ်ကို စစ်ကောင်စီရဲ့ အမှတ် ၃၇၇ အမြောက်တပ်ရင်းအနီးက လယ်ကွင်းထဲမှာ နွားကျောင်းနေစဉ် စစ်တပ်နားကိုရောက်ရှိနေတဲ့နွားတွေကို သွားမောင်းရာမှာ တောင်ခြေအနီးထောင်ထားတဲ့ မြေမြှုပ်မိုင်းကို နင်းမိပြီး ပေါက်ကွဲခဲ့တာဖြစ်တယ်လို့ သိရပါတယ်။

    “မိုင်းပေါက်တာက ၃၇၇ တပ်ရင်းနားမှာပါ။ ဒဏ်ရာတွေအပြင်းအထန်ရရှိခဲ့တယ်။ ခြေတစ်ဖက်လည်း ပေါင်ကနေ ပြတ်ကျန်ခဲ့တယ်၊ တခြားဒဏ်ရာတွေလည်းများကြီးပဲ။ သူ့ကို အပေါက်ဝဆေးရုံကိုယူလာပြီးတော့ ဆေးကုသမှုတွေလုပ်နေတယ်။ စစ်တွေကိုပို့ဆောင်ဖို့ပြင်နေတုန်းမှာပဲ ဆုံးသွားပါတယ်” လို့ အပေါက်ဝကျေးရွာ မေတ္တာရှင်အရေးပေါ်ကူညီရေးအဖွဲ့တာဝန်ခံ ဦးဦးထွန်းသိန်းက ပြောပါတယ်။

    အမှတ် ၃၇၇ တပ်ရင်းဟာ ရန်ကုန်-စစ်တွေအဝေးပြေးလမ်းမ၊ ကျောက်တော်-ယိုးတရုတ်လမ်းပိုင်း၊ ကန်ဇောက်တော်ခြေအနီးမှာတည်ရှိပြီး အဲ့ဒီတပ်ရဲ့အနီးဝန်းကျင်မှာ မိုင်းကွင်းတွေပြုလုပ်ထားတယ်လို့ ဒေသခံတွေက ပြောဆိုကြပါတယ်။

    မျာလီကန်ကျေးရွာသားတွေအပြင် အဲ့ဒီအနီးဝန်းကျင်မှာရှိတဲ့‌ ကျေးရွာသားတွေဟာ လယ်ယာလုပ်ငန်းလုပ်ကိုင်သူတွေဖြစ်ကြပြီး အခု မိုးစပါးစိုက်ပျိုးရာသီမှာ စစ်တပ်တွေနဲ့အနီးဝန်းကျင်လယ်ကွင်းတွေထဲ လယ်လုပ်နေသူတွေနဲ့ နွားကျောင်းနေသူတွေ မိုင်းပေါက်ကွဲမှုကြောင့် ထိခိုက်ဒဏ်ရာရမှုတွေ ဆက်တိုက်ကြုံနေကြရတာဖြစ်ပါတယ်။

    အခု ဇူလိုင်လအတွင်း ကျောက်တော်နဲ့ မင်းပြားမြို့နယ်မှာ မိုင်းပေါက်ကွဲမှု သုံးကြိမ်ဖြစ်ပွားခဲ့ပြီး နှစ်ဦးသေဆုံးကာ တစ်ဦးဒဏ်ရာအပြင်အထန်ရရှိခဲ့ပါတယ်။

    ဇူလိုင်လ ၁ ရက်နေ့က ကျောက်တော်မြို့နယ် ဝက်မှိုင်းကျေးရွာသားတစ်ဦးဟာလည်း လယ်ကွင်းပြင်အတွင်းနွားကျောင်းနေစဉ် အမှတ် ၃၇၅‌ ခြေလျင်တပ်ရင်းအနီး နွားတွေကိုသွားမောင်းရာမှာ မိုင်းပေါက်ကွဲမှုကြောင့် ဒဏ်ရာအပြင်းအထန်ရရှိခဲ့ကာ ဇူလိုင် ၂ ရက်နေ့မှာ စစ်တွေဆေးရုံမှာ ဆုံးပါးခဲ့ပါတယ်။

    ဇူလိုင် ၃ ရက်နေ့မှာလည်း မင်းပြားမြို့နယ် အထက်ခချီးမြောင်ကျေးရွာသားတစ်ဦးဟာ တိုင်းဗဟို (၉) အနီးတောင်ကုန်းပေါ်မှာ သစ်ဝါးခုတ်နေစဉ် မိုင်းပေါက်ကွဲမှုဖြစ်ပွားပြီး ခြေတစ်ဖက်ပြတ်ကာ ဆေးကုသမှုခံယူနေရပါတယ်။

    ဒါ့အပြင် ရခိုင်ပြည်နယ်အတွင်း တိုက်ပွဲဖြစ်ပွားမှုမရှိသေး ကျေးလက်နေပြည်သူတွေနဲ့ စစ်ဘေးရှောင်တွေဟာ မိုင်းပေါက်ကွဲမှုတွေကို နေ့စဉ်ရက်ဆက်ဆိုသလို ကြုံတွေ့နေကြရပြီး အခုနှစ်အတွင်း မိုင်းကြောင့်သေဆုံးသူ ၂၀ ဦးခန့်ရှိနေပြီဖြစ်တယ်လို့ သိရပါတယ်။

18. ၄ ဇူလိုင် ၂၀၂၂စစ်ကောင်စီနဲ့တရုတ်တို့ ပူးတွဲဥက္ကဋ္ဌ ပြုလုပ်တဲ့ မဲခေါင် - လန်ချန်းပူးပေါင်းဆောင်ရွက်မှု အစည်းအဝေးပွဲ

    

    ဓာတ်ပုံ ရင်းမြစ်, နိုင်ငံပိုင်

    စစ်ကောင်စီနဲ့ တရုတ်တို့ ပူးတွဲဥက္ကဋ္ဌ ပြုလုပ်တဲ့ မဲခေါင် - လန်ချန်း ပူးပေါင်းဆောင်ရွက်မှု အစည်းအဝေးပွဲကို ဒီနေ့ ဇူလိုင်လ ၄ ရက်မှာ ပုဂံမြို့မှာ ကျင်းပသွားပါတယ်။

    ၇ ကြိမ်မြောက် ဒီအစည်းအဝေးကို စစ်ကောင်စီနိုင်ငံခြားရေးဝန်ကြီး ဦးဝဏ္ဏမောင်လွင်နဲ့ တရုတ်နိုင်ငံခြား‌ရေးဝန်ကြီး ဝမ်ယိတို့က ဥက္ကဋ္ဌအနေနဲ့ ပူးတွဲ ကျင်းပတာဖြစ်ပါတယ်။

    အဲဒီအစည်းအဝေးကို တရုတ်နဲ့ မြန်မာနိုင်ငံခြားရေးဝန်ကြီးတွေ အပြင် မဲခေါင်မြစ်ဝှမ်းဒေသနိုင်ငံတွေဖြစ်တဲ့ ထိုင်း၊ လာအို၊ ဗီယက်နမ်နဲ့ ကမ္ဘောဒီးယားနိုင်ငံခြားရေးဝန်ကြီးတွေလည်း တက်ရောက်ခဲ့ကြပါတယ်။

    

    ဓာတ်ပုံ ရင်းမြစ်, နိုင်ငံပိုင်

    ဒီအစည်းအဝေးပွဲဟာ မြန်မာပြည်မှာ စစ်တပ်က အာဏာသိမ်းပြီးတဲ့နောက် ပြည်ပနိုင်ငံတွေက ဝန်ကြီးအဆင့်အရာရှိတွေ တစုတစည်းတည်း အများဆုံးတွေ့ဆုံကြတဲ့ ပထမဆုံးအစည်းအဝေးပွဲလည်း ဖြစ်လာပါတယ်။

    အမျိုးသားညီညွတ်‌ရေးအစိုးရ NUG ဘက်ကတော့ မြန်မာနိုင်ငံမှာ လက်ရှိဖြစ်နေတဲ့ အကျပ်အတည်းတွေကို ဖြေရှင်းရာမှာ လန်ချန်း-မဲခေါင် ပူးပေါင်းဆောင်ရွက်ရေးဖိုရမ်ရဲ့ အပြုသဘောဆောင်တဲ့ အခန်းကဏ္ဍကို အသိအမှတ်ပြုပေမဲ့ ဒီအစည်းအဝေးဟာ စစ်ကောင်စီကို အသိအမှတ်ပြုရာရောက်တာကြောင့် အမြဲတမ်းဥက္ကဋ္ဌအဖြစ်ဆောင်ရွက်တဲ့ တရုတ်နိုင်ငံ အနေနဲ့ အစည်းအဝေးကျင်းပတာကို ပြန်လည်သုံးသပ်ဖို့ ပြီးခဲ့တဲ့ရက်ပိုင်းက တိုက်တွန်းခဲ့ပါတယ်။

19. ၄ ဇူလိုင် ၂၀၂၂တိုင်းပြည်အာဏာကို ပြည်သူထံပြန်အပ်ရေး တရုတ်နိုင်ငံခြားရေး၀န်ကြီးနဲ့အာဆီယံသံတို့ ဆွေးနွေး

    

    ဓာတ်ပုံ ရင်းမြစ်, ကမ္ဘောဒီးယားနိုင်ငံခြားရေး

    တိုင်းပြည်အာဏာကို ပြည်သူတွေထံ ပြန်လည်အပ်နှင်းရေး အကောင်အထည်ဖော်ဖို့အတွက် တရုတ်နဲ့ အာဆီယံ အတူတွန်းအားပေးလမ်းကြောင်းရှာဖွေဖို့ တရုတ်နိုင်ငံခြားဝန်ကြီးဝမ်ယီနဲ့ မြန်မာ့အရေး အာဆီယံအထူးသံ ပရတ်ဆော့ခွန်းတို့ တွေ့ဆုံချိန်မှာဆွေးနွေးခဲ့တယ်လို့ မြန်မာနိုင်ငံဆိုင်ရာတရုတ်သံရုံးက ဒီကနေ့ ဇူလိုင် ၄ ရက်မှာ ထုတ်ပြန်လာပါတယ်။

    မဲခေါင် - လန်ချန်း အစည်းအဝေးတက်ဖို့ ပုဂံမှာရောက်နေတဲ့ သူတို့နှစ်ဦးတွေ့ဆုံမှုမှာ တရုတ်နိုင်ငံရဲ့ မြန်မာ့အရေးနဲ့ပတ်သက်ပြီး အချက်သုံးရပ်ကို အလေးပေးပြောကြားခဲ့တယ်လို့ဆိုပါတယ်။

    အဲဒီအချက်တွေထဲ ဖွဲ့စည်းပုံအခြေခံဥပဒေနဲ့ ဥပဒေမူဘောင်တွေ အောက်မှာ မြန်မာနိုင်ငံက နိုင်ငံရေးပြန်လည်သင့်မြတ်ရေး စဉ်ဆက်မပြတ် တွန်းအားပေးဖော်ဆောင်ဖို့ ၊ မြန်မာအဖွဲ့အစည်းအသီးသီးက နိုင်ငံရဲ့ အခင်းအကျင်း နဲ့ ပြည်သူလူထု အကျိုးစီးပွားကို အလေးထားပြီး ဆင်ခြင်တုံတရားနဲ့ လက်တွေ့ကျမှု၊ အပြန်အလှန်နားလည်သည်းခံမှုတွေနဲ့ ကျိုးကြောင်းဆီလျော်တဲ့ တောင်းဆိုချက်တွေ ထည့်သွင်းစဉ်းစားပြီး တည်ငြိမ်အေးချမ်းရေးကို ဆောလျင်စွာ ဖော်ဆောင်ကြဖို့ ၊ အာဆီယံက “အာဆီယံနည်းလမ်း” ကို လက်ကိုင်စွဲပြီး ပြည်တွင်းရေး ဝင်ရောက်စွက်ဖက်မှုမရှိရေး၊ ပေါင်းစပ်ညှိနှိုင်းရေးအခြေခံမူတွေနဲ့ အညီ အာဆီယံဘုံသဘောတူညီချက် ၅ ရပ်ကို အကောင်အထည်ဖော်ဖို့ ဆိုတာတွေကို ဆွေးနွေးခဲ့တယ်လို့ဆိုပါတယ်။

    တစ်ဖက်မှာလည်း လက်ရှိဖြစ်ပေါ်နေတဲ့ မြန်မာ့အကျပ်အတည်းကို ဒေါ်အောင်ဆန်းစုကြည် ပါဝင်ဖြေရှင်းပေးရေးဆိုတဲ့ တောင်းဆိုအကြံပြုချက်တွေ အာဆီယံအထူးကိုယ်စားလှယ်ရဲ့ မြန်မာခရီးစဥ်မှာ ကျယ်ကျယ်ပြန့်ပြန့် ထွက်ပေါ်လာနေပါတယ်။

    စစ်ကောင်စီ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းကတေ့"နိုင်ငံရေးမှာမဖြစ်နိုင်ဘူးဆိုတာ မရှိဘူး၊ အာဆီယံ အထူးကိုယ်စားလှယ်နဲ့ ဒေါ်အောင်ဆန်းစုကြည်တွေ့ဆုံနိုင်ရေး၊ စစ်ကောင်စီနဲ့ ဒေါ်အောင်ဆန်းစုကြည်တွေ့ဆုံနိုင်ရေး ဖြစ်နိုင် မဖြစ်နိုင်ပေါ့၊ ပထမဆုံးပြောချင်တာကတော့ တရားဥပဒေရင်ဆိုင်နေရဆဲ ပြစ်ဒဏ်ကျခံနေရဆဲ လူတွေနဲ့တွေ့ဆုံဖို့အတွက်တော့ ကန့်သတ်ချက်ရှိတယ်၊ နောင်မှာ ဖြစ်နိုင် မဖြစ်နိုင်ဆိုတာကတော့ နိုင်ငံရေးမှာ ဘာမှ ကြိုပြောလို့ မရဘူး "လို့ဘီဘီစီကိုပြောထားပါတယ်။

20. ၄ ဇူလိုင် ၂၀၂၂မင်းပြားမြို့နယ်မှာ အရပ်သားတစ်ဦးမိုင်းနင်းမိပြီး ခြေတစ်ဖက်ပြတ်ဒဏ်ရာရ

    

    ရခိုင်ပြည်နယ်၊ မင်းပြားမြို့နယ်မှာ ဇူလိုင် ၃ ရက်နေ့မွန်းလွဲပိုင်းက အရပ်သားတစ်ဦး မိုင်းနင်းမိပြီး ခြေတစ်ဖက်ပြတ်တဲ့ဒဏ်ရာအပြင်းအထန်ရရှိခဲ့တယ်လို့ သိရပါတယ်။

    ဒဏ်ရာရရှိခဲ့သူမှာ မင်းပြားမြို့နယ်၊ ဖုန်သာချောင်းအတွင်းက အထက်ခချီးမြောင်ကျေးရွာသား အသက် ၂၈ နှစ်အရွယ် ကိုမောင်လှထွန်းဖြစ်တယ်လို့ သိရပါတယ်။

    သူဟာ မနေ့ နေ့လယ်ပိုင်းမှာ ကျေးရွာအနီး တောင်ကုန်းပေါ်ကို အိမ်သုံးသစ်လုံးခုတ်ရန်သွားစဉ် မြေမြှုပ်မိုင်းမိပြီး ဘယ်ဘက်ခြေထောက် ခြေချင်းဝတ်က ပြတ်ထွက်သွားကာ ဒဏ်ရာအပြင်းအထန်ရရှိခဲ့တာလို့ ကျေးရွာသားတစ်ဦးက ပြောပါတယ်။

    ဒဏ်ရာပြင်းထန်တဲ့အတွက် ကိုမောင်လှထွန်းကို မနေ့ကတည်းက မင်းပြား‌ဆေးရုံကို အရေးပေါ်ပို့ခဲ့ရပြီး ဆေးကုသမှုခံယူနေရတယ်လို့ ကျေးရွာသားတစ်ဦးက ပြောပါတယ်။

    မိုင်းပေါက်ကွဲတဲ့နေရာဟာ ရက္ခိုင့်တပ်တော်(အေအေ)နဲ့ စစ်ကောင်စီတပ်တို့အကြား နှစ်ဘက်တိုက်ပွဲတွေပြင်းထန်နေတဲ့အချိန် စစ်ကောင်စီတပ်ဖွဲ့တွေ စခန်းချနေထိုင်ခဲ့တဲ့နေရာတစ်ခုလည်းဖြစ်တယ်လို့ သိရပါတယ်။

    ဒါ့အပြင် အထက်ခချီးမြောင်ကျေးရွာနဲ့ အနီးစပ်ဆုံးနေရာမှာ စစ်ကောင်စီရဲ့ တိုင်းဗဟို (၉) လေ့ကျင့်ရေးသင်တန်းကျောင်းတည်ရှိပြီး အဲ့ဒီဒေသဟာ တိုက်ပွဲကာလအတွင်း တိုက်ပွဲတွေဖြစ်ပွားခဲ့တဲ့ဒေသတစ်ခုလည်းဖြစ်ပါတယ်။

    ဇူလိုင် ၁ ရက် နေ့လယ်ပိုင်းကလည်း ကျောက်တော်မြို့နယ်၊ ဝက်မှိုင်းကျေးရွာအနီး မိုင်းပေါက်ကွဲမှုကြောင့် ခြေတစ်ဘက်ပြတ်ကာ ဒဏ်ရာအပြင်အထန်ရရှိခဲ့တဲ့ ဦးသန်းစိန်မောင်ဟာ စစ်တွေဆေးရုံမှာ ဆေးကုသမှုခံယူနေစဉ် ဇူလိုင် ၂ ရက်နေ့မှာ ဆုံးပါးခဲ့ပါတယ်။

    လက်ရှိမှာ ရခိုင်ပြည်နယ်အတွင်း နှစ်ဘက်တပ်တွေအကြား တိုက်ပွဲတွေမ ဒေသခံအရပ်သားတွေ သွားလာလှုပ်ရှားတဲ့နေရာတွေနဲ့ လယ်ကွင်းတွေမှာ မိုင်းပေါက်ကွဲမှုတွေ ဆက်တိုက်ဖြစ်ပွားနေပြီး ထိခိုက်ဒဏ်ရာရ သေဆုံးမှုတွေလည်း မြင့်တက်လာနေတာဖြစ်ပါတယ်။