မြန်မာပြည်တွင်းအခြေအနေ အတော်ဆိုးရွားနေတယ်လို့ ကုလအထူးကိုယ်စားလှယ် ပြော

’လက်ရှိ ချင်းပြည်နယ်က အခြေအနေဆို အတော်လေးကို ဆိုးရွားနေတယ်။ ဒီလို ထွက်ပြေးရသူတွေဟာ အစားအသောက်၊ရေနဲ့ အမိုးအကာအပြင် ကျန်းမာရေးစောင့်ရှောက်မှုလည်း အရေးတကြီးလိုအပ်နေတယ်’ လို့ ကုလအထူးကိုယ်စားလှယ်က ပြောပါတယ်။

တိုက်ရိုက် ထုတ်လွှင့်ချက်

၄ သြဂုတ် ၂၀၂၁အာဆီယံ အထူးကိုယ်စားလှယ်ကို စစ်ကောင်စီ လက်ခံ
မြန်မာ့အရေးဖြေရှင်းပေးဖို့ အာဆီယံနိုင်ငံတွေ့ ခန့်အပ်ထားတဲ့ အထူးကိုယ်စားလှယ် Erywan Yusof ကိုလည်း စစ်ကောင်စီဘက်က လက်ခံအတည်ပြုကြောင်း ဒီကနေ့ သြဂုတ်လ ၄ ရက်နေ့မှာ ထုတ်ပြန်ခဲ့ပါတယ်။
မြန်မာနိုင်ငံဆိုင်ရာ အာဆီယံ အထူးကိုယ်စားလှယ် အဖြစ် ဘူရုနိုင်း နိုင်ငံခြားရေး ဝန်ကြီး (၂) Erywan Yusof ကို သြဂုတ်လ ၃ ရက်ရက်နေ့မှာ ကျင်းပတဲ့ အာဆီယံ နိုင်ငံခြားရေး ဝန်ကြီးများ အစည်းအဝေးမှာ ခန့်အပ်ထားတာ ဖြစ်ပါတယ်။
မစ္စတာ Erywan Yusof ဟာ စစ်အာဏာသိမ်းပြီးနောက်မှာ မြန်မာ နိုင်ငံကို လာရောက်ခဲ့ဖူးသူ ဖြစ်ပြီး၊ အာဆီယံ အလှည့်ကျ ဥက္ကဋ္ဌ ဖြစ်တဲ့ ဘရုနိုင်း နိုင်ငံရဲ့ နိုင်ငံခြားရေး ဝန်ကြီး (၂) လည်း ဖြစ်ပါတယ်။
အာဆီယံ အထူးကိုယ်စားလှယ် အနေနဲ့ မြန်မာနိုင်ငံတွင်းကို ဘယ်အချိန်မှာ သွားရောက်နိုင်မလဲ ဆိုတာကိုတော့ အာဆီယံ အဖွဲ့ကရော မြန်မာနိုင်ငံဘက်ကပါ ထုတ်ပြန်ခြင်းတော့ မရှိသေးပါဘူး။
မစ္စတာ Erywan Yusof အနေနဲ့ မြန်မာ့အရေး ဖြေရှင်းဖို့ အာဆီယံဘက်က တောင်းဆို ထားတဲ့ အချက် (၅) ချက်ကို မြန်မာ ဘက်က လေးစားလိုက်နာဖို့ ကြိုးစား ရမှာဖြစ်ပါတယ်။
မြန်မာ့နိုင်ငံရေး အကျပ်အတည်းနဲ့ပတ်သက်လို့ ကုလသမဂ္ဂ၊ အမေရိကန်နဲ့ အနောက်နိုင်ငံ အတော်များများ က အာဆီယံ အဖွဲ့အစည်းဘက်က ကြားဝင် ဆောင်ရွက်ပေးဖို့ တိုက်တွန်းထားတာ ဖြစ်ပါတယ်။
အာဆီယံ အထူးကိုယ်စားလှယ်ကို မြန်မာနိုင်ငံအတွင်း လွတ်လပ်စွာ သွားလာလှုပ်ရှားခွင့်ရသင့် သလို၊ သက်ဆိုင်ရာ နိုင်ငံရေး အဖွဲ့အစည်းအားလုံးနဲ့ လွတ်လပ်စွာ တွေ့ဆုံခွင့် ရသင့်တယ်လို့လည်း နိုင်ငံတကာက တောင်းဆိုနေပါတယ်။
ဓာတ်ပုံ ရင်းမြစ်, Getty Images
ဓာတ်ပုံ ပုံစာ, မြန်မာ့အရေး အာဆီယံ အထူးကိုယ်စားလှယ် Mr Erywan Yusof
၂၅ မေ ၂၀၂၁
တိုက်ရိုက်တင်ဆက်မှု ပြီးဆုံးပါပြီ။ နောက်ထပ်ဖြစ်ပေါ်နေတဲ့ သတင်းတွေကိုတိုက်ရိုက်တင်ဆက်မှုစာမျက်နှာသစ်မှာ ဆက်လက်ဖတ်ရှုနိုင်ပါတယ်။ ဘီဘီစီက တင်ဆက်ခဲ့တဲ့ သတင်းတွေကို လာရောက်ဖတ်ရှုကြတဲ့အတွက် ကျေးဇူးတင်ရှိပါတယ်။
၂၅ မေ ၂၀၂၁ဒေါ်အောင်ဆန်းစုကြည် ပန်းမပန်တဲ့နေ့များ
၂၅ မေ ၂၀၂၁ဒီးမော့ဆိုမှာ လက်နက်ကြီးကျလို့ နေအိမ်အချို့ပျက်စီး
မေလ ၂၅ ရက်နေ့က စစ်ကောင်စီတပ်တွေရဲ့ လက်နက်ကြီးနဲ့ ပစ်ခတ်မှုကြောင့် ကယားပြည်နယ်၊ ဒီးမော့ဆိုမြို့၊ ဒေါငံခါးနဲ့ တနန်းဥကွိုင်ရပ်ကွက်ရှိနေအိမ်အချို့ ပျက်စီးသွားခဲ့တယ်လို့ သိရပါတယ်။
ကယားပြည်နယ်အတွင်း မနေ့က မေလ ၂၂ ရက်နေ့ကစပြီး လွိုင်ကော် နဲ့ ဒီးမော့ဆို တို့မှာ တိုက်ပွဲတွေရှိခဲ့ပြီး စစ်ကောင်စီဘက်က တင့်ကားတွေ အသုံးပြုပြီး တိုက်ခိုက်ခဲ့ပါတယ်။
ငွေတောင်ဆည်နဲ့ ဒီးမော့ဆိုတစ်လျှောက်မှာ မေလ ၂၅ ရက်‌ မနက်၄နာရီ၀န်းကျင်တည်းက တိုက်ပွဲပြင်းထန်လျက်ရှိပြီးတော့ စစ်ကောင်စီဘက် လက်နက်လူအင်အား အများအပြားသုံးပြီးပစ်နေတယ်လို့လည်းဒေသခံတွေက ပြောပါတယ်။
ဒီကနေ့ မနက် ၁၀ နာရိလောက်မှာ တိုက်ပွဲတွေ ခဏရပ်သွားခဲ့ပြီးနောက်မှာ စစ်ကောင်စီတပ်တွေဘက်က လက်နက်ကြီးတွေနဲ့ ပစ်ခတ်နေတယ်လို့ လည်းသိရပါတယ်။
တိုက်ပွဲကြောင့် နှစ်ဖက်စလုံး အကျအဆုံးတွေ ရှိတယ်လို့ သတင်းရပေမဲ့ အတည်ပြု ထုတ်ပြန်တာမျိုတေ့ မရှိသေးပါဘူး။
ဓာတ်ပုံ ရင်းမြစ်, CJ
ဓာတ်ပုံ ပုံစာ, ဒီးမော့ဆိုမြို့၊ ဒေါငံခါးနဲ့ တနန်းဥကွိုင်ရပ်ကွက်ရှိနေအိမ်အချို့ ပျက်စီးသွားခဲ့
ဓာတ်ပုံ ရင်းမြစ်, CJ
၂၅ မေ ၂၀၂၁ချင်းတွင်းမြစ်တွင်း စစ်ကောင်စီ ရေယာဥ်တွေ တိုက်ခိုက်ခံရ
ချင်းတွင်းမြစ်ကြောင်းအတွင်း ကနီမြို့ကနေ အထက်ပိုင်းကို ဆန်တက်တဲ့ စစ်ကောင်စီရဲ့ ရေယာဉ်တွေ ပစ်ခတ်တိုက်ခိုက်တာခံခဲ့ရတယ်လို့ ကနီ ဒေသခံတွေဘက်ကနေ တစ်ဆင့်သိရပါတယ်။
ဒီကနေ့ မနက်ပိုင်း ချင်းတွင်းမြစ်အတိုင်း ဆန်တက်သွားခဲ့တဲ့ စစ်ကောင်စီတပ်တွေရဲ့ လက်နက်ရိက္ခာတင်လာတဲ့ ဖလက်ကုန်တင်
သင်္ဘော ၃ စီး နဲ့ အမြန်ရေယာဥ် ၂ စီး တိုက်ခိုက်ခံရတာဖြစ်တယ်လို့လည်း သူတို့ကပြောပါတယ်။
အဲဒီလို တိုက်ခိုက်မှုကို ကနီဒေသခံ ကာကွယ်ရေးတပ်တွေကပြုလုပ်ခဲ့တာမဟုတ်ဘူးလို့ သူတို့က ငြင်းပါတယ်၊
ချင်းတွင်းမြစ်ဘေးက လက်ပံစုရွာမှာ ဒီနေ့တိုက်ပွဲတွေ ဖြစ်ခဲ့ပြီး ကင်းနဲ့ အနီးတစ်ဝိုက် ကျေးရွာတွေက ဒေသခံတွေတော့ တိမ်းရှောင်နေကြတယ်လို့ ပြောပါတယ်။
ကနီနဲ့ မင်းကင်း ကြားက ချင်းတွင်းမြစ်ဘေးက ကင်းရွာမှာလည်း ရွာထဲမှာ စစ်ကောင်စီတပ်တွေက တပ်စွဲထားပြီး ကင်းရွာခံတွေကတော့ ရွာလုံးကျွတ်တိမ်းရှောင်နေကြပါတယ်။
ချင်တွင်းမြစ်အတွင်း စစ်ကောင်စီတပ်တွေနဲ့ ဒေသခံတွေ ပြီးခဲ့တဲ့ မေလဆန်းကစပြီး တိုက်ပွဲတွေ ဖြစ်ပွားခဲ့ပြီးတော့ မနေ့က မေလ ၂၂ ရက်နေ့က လည်း ကနီနယ်ထဲက ကျေးရွာတွေကို ဝင်ရောက်ပစ်ခတ်မှုကြောင့် ဒေသခံ ၃ ဦး သေဆုံးခဲ့ပါတယ်။
ဓာတ်ပုံ ရင်းမြစ်, CJ
၂၅ မေ ၂၀၂၁ဆရာ၊ ဆရာမ တစ်သိန်းခွဲနီးပါး အလုပ်ကနေ ရပ်ဆိုင်းခံခဲ့ရ
၂၅ မေ ၂၀၂၁မြန်မာပြည်တွင်းအခြေအနေ အတော်ဆိုးရွားနေတယ်လို့ ကုလအထူးကိုယ်စားလှယ် ပြော
မြန်မာနိုင်ငံလက်ရှိပြည်တွင်းအခြေအနေဟာ အတော်ဆိုးရွားနေတယ်ဆိုပြီး ကုလသမဂ္ဂရဲ့ မြန်မာနိုင်ငံဆိုင်ရာ အထူးကိုယ်စားလှယ် ခရစ္စတင်း ဘာဂနာက ပြောလာပါတယ်။
ပြည်တွင်းမှာ ပြည်သူ ၈၀၀ ကျော် သတ်ဖြတ်ခံရတာ နောက်ထပ် လူပေါင်း ၅၃၀၀ ကျော် ထမ်းဆီးခံထားရတဲ့အခြေအနေတွေကြောင့်လို့ အထူးသံတမန်က နယူးယောက်မြို့မှာပြုလုပ်တဲ့ သတင်းစာရှင်းလင်းပွဲမှာပြောလိုက်တာပါ။
‘ပြည်သူတွေဟာ တခြားဒေသတွေကို ရှောင်ပြောင်းနေရတယ်။ နယ်စပ်ဖြတ်ကျော်ရှောင်ပြေးတာမျိုးလည်းရှိတယ်။ လက်ရှိ ချင်းပြည်နယ်က အခြေအနေဆို အတော်လေးကို ဆိုးရွားနေတယ်။ ဒီလို ထွက်ပြေးရသူတွေဟာ အစားအသောက်၊ရေနဲ့ အမိုးအကာအပြင် ကျန်းမာရေးစောင့်ရှောက်မှုလည်း အရေးတကြီးလိုအပ်နေတယ်’ လို့ သူက ပြောပါတယ်။
အကြမ်းဖက်မှုတွေကြောင့် လူထုအခြေအနေ ဘယ်လိုကြုံနေရလဲဆိုတာ သိရဖို့ ခက်ခဲနေပြီး ဒီအခြေအနေဟာ ကိုဗစ်နိုင်တင်းကပ်ရောဂါဖြစ်နေချိန်မှာ ဖြစ်နေတာကိုလည်း သူက ထောက်ပြပါတယ်။
လက်ရှိမြန်မာ့နိုင်ငံရေးအျပ်အတည်းကနေဖြစ်တာတဲ့ စီးပွားရေးကျဆင်းမှုကြောင့် လူ ၃ သန်းခွဲနီးပါးဟာ အစားအစာ မလုံခြုံမှု ကြုံလာရနိုင်တယ်လို့လည်း သူကပြောထားပါတယ်။
ဓာတ်ပုံ ပုံစာ, ကုလသမဂ္ဂရဲ့ မြန်မာနိုင်ငံဆိုင်ရာ အထူးကိုယ်စားလှယ် ခရစ္စတင်း ဘာဂနာ
၂၅ မေ ၂၀၂၁
ပလိပ်မြို့မှာ ဒီကနေ့ မနက်ပိုင်းက ကဆုန်လပြည့်နေ့ ညောင်ရေသွန်းပွဲတော် ပြုလုပ်ရင်း စစ်အာဏာရှင် ပြုတ်ကျရေး ဆန္ဒထုတ်ဖော်ခဲ့ကြပါတယ်။
ဓာတ်ပုံ ရင်းမြစ်, CJ
ဓာတ်ပုံ ရင်းမြစ်, CJ
ဓာတ်ပုံ ရင်းမြစ်, CJ
၂၅ မေ ၂၀၂၁လောင်းလုံ ကမြောကင်း အထက်တန်းကျောင်း မီးရှို့ခံရ
ထားဝယ်ခရိုင် လောင်းလုံးမြို့နယ်၊ ကမြောကင်းကျေးရွာ အထက်တန်းကျောင်းဆောင်ဟာ မေလ ၂၄ ရက်နေ့ ည ၁၀ နာရီကျော်က မီးလောင်ခဲ့တယ်လို့ ဒေသခံတွေက နေတစ်ဆင့်သိရပါတယ်။
ဒီမီးလောင်မှုဟာ ရှို့မီးဖြစ်တယ်လို့ ထားဝယ်ခရိုင်မီးသတ်တပ်ဖွဲ့ တာဝန်ရှိသူတစ်ဦးကပြောကြောင်း DAWEI WATCH က ရေးပါတယ်။
မေလ ၂၄ ရက် ည၁၀ နာရီ မိနစ် ၄၀ ခန့်က မီးလောင်တယ်လို့ သတင်းရပြီး မီးသတ်ကားတွေနဲ့ သွားရောက်ငြိမ်းသတ်ခဲ့ရာမှာ မိနစ် ၃၀ ခန့် အကြာမှာ မီးငြိမ်းခဲ့တယ်လို့ မီးသတ်တပ်ဖွဲ့က သိရပါတယ်။
မီးလောင်မှုကြောင့် အလျား ၁၂၅ ပေ ၊ အနံ ၃၅ ပေရှိ သွပ်မိုး အုတ်ကာ တစ်ထပ်ကျောင်းဆောင်တစ်ခုလုံး လောင်ကျွမ်းသွားခဲ့ကြောင်း နဲ့ အဲ့ဒီ့ ကျောင်းဆောင်ဟာ လမ်းနဲ့ အနီးဆုံး ကျောင်းဆောင်ဖြစ်ပြီး ဘုရားခန်း၊ ကွန်ပျူတာခန်း၊ စာကြည့်တိုက်နဲ့ ကျောင်းအုပ်ဆရာမကြီး ရုံးခန်း တို့ ပါရှိတဲ့ကျောင်းဆောင်လို့ သိရပါတယ်။
ကမြောကင်း အထက်တန်းကျောင်းဟာ ထားဝယ်-မောင်းမကန်လမ်းပေါ်တွင် တည်ရှိတဲ့ကျေးရွာ အထက်တန်းကျောင်းဖြစ်ပါတယ်။
ဓာတ်ပုံ ရင်းမြစ်, DAWEI WATCH
ဓာတ်ပုံ ပုံစာ, ကမြောကင်း အထက်တန်းကျောင်း
၂၅ မေ ၂၀၂၁ရန်ကုန် သုဝဏ္ဏက မင်္ဂလာဆောင်တစ်ခုမှာ ဗုံးပေါက်
ဓာတ်ပုံ ရင်းမြစ်, CJ
ရန်ကုန်မြို့ သင်္ကန်းကျွန်းမြို့နယ်ထဲက သုဝဏ္ဏ(က)ရပ်ကွက်က မင်္ဂလာဆောင်နေအိမ်တစ်အိမ်မှာ ဒီနေ့ မေလ ၂၅ ရက် မွန်းလွဲပိုင်းမှာ ဗုံးပေါက်ကွဲမှု တစ်ခုဖြစ်ခဲ့တယ်လို့ အနီးနားမှာ နေထိုင်သူတွေက ဘီဘီစီကိုပြောပါတယ်။
ဗုံးပေါက်ကွဲခဲ့တဲ့နေအိမ်ဟာ ဇေယျသုခလမ်းထဲက မင်္ဂလာဆောင်အိမ်ဖြစ်ပြီး သတို့သမီး ပွဲချင်းပြီး သေဆုံးတဲ့အပြင် နောက်ထပ် လူ ၈ ဦးထက်မနည်း ဒဏ်ရာရသွားတယ်လို့လည်း ဒေသခံတွေက ပြောပေမဲ့ ဘီဘီစီက သီးခြားအတည်မပြုနိုင်သေးပါဘူး။
''မင်္ဂလာဆောင်လက်ဖွဲ့ဖောက်နေတုန်းမှာ ပေါက်တာလို့ ပြောသံကြားတယ်။ သတို့သားက အောက်ထပ်ရောက်နေတုန်းဖြစ်တာပေါ့နော်။ ဒဏ်ရာရတဲ့ သတို့သမီးကို ကူသယ်ပေးခဲ့သူတွေ ပြန်ပြောပုံအရဆိုရင် သတို့သမီးက အောက်ပိုင်းထိပြီး ဆုံးသွားတာ။ ဒဏ်ရာရသူတွေလည်းရှိတယ်။ အစကတော့ ကားတာယာပေါက်တယ်လို့ ထင်တာ။ မသင်္ကလာလို့ ထွက်ကြည့်မှ လူတွေက ဗုံးပေါက်တာဆိုပြီး ရုတ်ရုတ်ဖြစ်ကုန်ကြတာ။ လမ်းထဲက မင်္ဂလာဆောင်မှာ ဒီလို ဘာ့ကြောင့်လာဖြစ်လဲဆိုတာတော့ မေးခွန်းထုတ်စရာပဲ''လို့ ဒေသခံတစ်ဦးကပြောပါတယ်။
ဗုံးပေါက်ကွဲမှုဖြစ်တဲ့လမ်းဟာ စစ်ကောင်စီတပ်တွေတပ်စွဲထားတဲ့ စာသင်ကျောင်းနဲ့နီးလို့ ချက်ချင်းရောက်လာပြီး အခင်းဖြစ်တဲ့နေရာရော၊ လမ်းအပြင် ရပ်ကွက်ထဲက လမ်းတချို့ကိုပါ ပိတ်ဆို့ထားတာ အခုအချိန်အထိလို့ သိရပါတယ်။
ပြီးခဲ့တဲ့ မေလ ၂၂ ရက် နေ့လည်ပိုင်းတုန်းကလည်း သုဝဏ္ဏပန်းခြံအနားမှာရှိတဲ့ ခရိုင်ပညာရေးမှူးရုံးရှိရာ အထက(သုဝဏ္ဏ) ကျောင်းရှေ့မှာ ပစ်ခတ်မှုဖြစ်ခဲ့လို့ စစ်ကောင်စီဘက် အနည်းဆုံး တပ်ဖွဲ့ဝင် ၃ ဦး ထိမှန်ခဲ့ပါတယ်။
၂၅ မေ ၂၀၂၁ကျောင်းတွေ ပြန်ဖွင့်ဖို့ ကြိုးစားမှု အောင်မြင်နိုင်မလား
၂၅ မေ ၂၀၂၁မြစ်ကြီးနား-မန္တလေး ကားလမ်းပေါ်က ဟိုပင်(ဝက်ကုန်း)သံတံတား မိုင်းဆွဲခံရ, လူသေဆုံး ထိခိုက်ဒဏ်ရာရတာလည်းရှိ
ဓာတ်ပုံ ရင်းမြစ်, CJ
ကချင်ပြည်နယ်၊ မြစ်ကြီးနား-မန္တလေး ကားလမ်းမပေါ်မှာရှိတဲ့ မိုးညှင်းမြို့နယ်ထဲက ဟိုပင်(ဝက်ကုန်း)သံတံတားတစ်စင်းဟာ မနေ့ မေလ ၂၄ ရက်ညပိုင်းက မိုင်းခွဲခံခဲ့ရပြီး အမျိုးသားတစ်ဦးလည်း သေဆုံးခဲ့တယ်လို့ ဒေသခံတွေဆီက သိရပါတယ်။
မနေ့ည ၈ နာရီခွဲလောက်မှာ ပေါက်ကွဲသံခပ်ကျယ်ကျယ်နဲ့ သေနတ်ပစ်ခတ်သံ အချက်ရေ ၆၀ နီးပါးကြားခဲ့ရအပြီးမှာ သံတံတားရဲ့ မြစ်ကြီးနားမြို့အဝင်ဘက်အခြမ်းပြိုကျသွားတာလို့ ဒေသခံတွေကပြောပါတယ်။
ပေါက်ကွဲမှုကြောင့် တံတားအနီးပတ်ဝန်းကျင်မှာရှိတဲ့ မြို့မြောက်ရပ်ကွက် အုပ်ချုပ်ရေးမှူးရုံးက တံခါးမှန်တွေ ကွဲတာ၊ နေအိမ်တွေကို တံတားက သံတိုသံစတွေလာမှန်တာမျိုးရှိခဲ့သလို စစ်ကောင်စီတပ်တွေဘက်က ပစ်ခတ်တာတွေလည်းရှိခဲ့လို့ တံတားအနီးပတ်ဝန်းကျင်က လူတွေလည်း ထွက်ပြေးရတာမျိုး ရှိခဲ့တယ်လို့ သိရပါတယ်။
''အုပ်ချုပ်ရေးမှူးရုံးခြံစည်းရိုးနားမှာ မိုင်းစတွေထိမှန်ပြီးပုံပျက်နေတဲ့လူသေအလောင်းတစ်လောင်းရယ်၊ တံတားဘေးမှာ ဦးခေါင်းဒဏ်ရာရထားတဲ့သူနဲ့ ဆိုင်ကယ်တစ်စီးရယ်လည်းတွေ့တယ်၊ ခန့်မှန်းခြေအရတော့ မိုင်းကွဲတဲ့အချိန်နဲ့ ဆိုင်ကယ်စီးတဲ့သူရောက်လာတဲ့အချိန် အံကိုက်ဖြစ်သွားပုံရတယ်၊ သေချာတော့ပြောလို့မရသေးဘူး။ သေတဲ့သူဘယ်သူဘယ်ဝါဆိုတာလည်းမသိရသေးဘူး၊ ဆိုင်ကယ်နဲ့လူကတော့ မေ့မြောနေလို့ဆေးရုံပို့ထားရတယ်''လို့ ဒေသခံတစ်ဦးကပြောပါတယ်။
မြစ်ကြီးနား-မန္တလေး လမ်းပိုင်းမှာရှိတဲ့ မီးရထားတွေကို ကိုဗစ်ကာလတည်းက ပြေးဆွဲတာ ရပ်နားထားတာဖြစ်ပါတယ်။
ဒီအချိန်မှာ ကားလမ်းမှာ အရေးပါတဲ့ ဒီသံတံတား မိုင်းခွဲခံရပြီး ပျက်စီးလို့ ခရီးသွားလာမှုနဲ့ ကုန်စည်စီးဆင်းမှုတွေ အခက်အခဲပြီး ကုန်ဈေးနှုန်းများမြင့်တက်လာမှာကို ဒေသခံတွေက စိုးရိမ်နေပါတယ်။
၂၅ မေ ၂၀၂၁ကယန်းသာယာတိုက်နယ်မှာ တိုက်ပွဲဖြစ်အပြီး ဒေသခံ တစ်ထောင်ကျော် ထွက်ပြေးနေရ
ကယားပြည်နယ်ထဲက ကန်သာယာတိုက်နယ်မှာ စစ်ကောင်စီတပ်ဖွဲ့ဝင်တွေနဲ့ ဒေသခံပြည်သူ့ကာကွယ်ရေးတပ်ဖွဲ့တွေကြား မနေ့ မေလ ၂၄ ရက်တုန်းက ဖြစ်တဲ့ တိုက်ပွဲအပြီးမှာ စစ်ဘေးရှောင်နေရတဲ့ ဒေသခံ တစ်ထောင့်ငါးရာနီးပါးအထိ ရှိနေတယ်လို့ ဒေသခံတွေဆီက သိရပါတယ်။
တိုက်ပွဲထပ်ဖြစ်မှာကို စိုးရိမ်ကြောက်လန့်ပြီးပြေးကြသူတွေထဲမှာ ကန်သာယာ တိုက်နယ်အပြင် တောင်ပိုင်းက ရွာတွေက အရပ်သားတွေလည်း ပါဝင်နေတယ်လို့ သိရပါတယ်။
ကန်သာယာထဲက ခရစ်ယာန်ဘုရားရှိခိုးကျောင်းမှာ အရပ်သားတွေ ခိုလှုံနေတယ်ဆိုတာသိပြီးတဲ့နောက် ကင်းလှည့်လာတဲ့ စစ်ကောင်စီတပ်ဖွဲ့ဝင်တွေက ဘုရားကျောင်းကို မေလ ၂၃ ရက် ညပိုင်းမှာ နာရီပိုင်း ဝိုင်းခဲ့ပါတယ်။
အဲဒီနောက် ည ၈ နာရီကနေ ၁၀ နာရီကျော်ထဲအထိ စစ်ကောင်စီတပ်တွေနဲ့ ဒေသခံကာကွယ်ရေးတပ်ဖွဲ့ဝင်တွေကြား အပြန်အလှန်ပစ်ခတ်ချိန် ဘုရားကျောင်း ပေါ်လက်နက်ကြီးကျလို့ အရပ်သား ၄ ဦးသေဆုံးပြီး နောက်ထပ် ၈ ဦး ဒဏ်ရာရခဲ့ပါတယ်။
ဒီထိတွေ့တိုက်ပွဲကြောင့် လွိုင်ကော်မြို့နဲ့ ၇ ကီလိုမီတာနီးပါးဝေးတဲ့ တိုက်နယ်ထဲကအပြင် အနီးနားရွာတွေထဲက လူတွေပါ တောတောင်ထဲ ထွက်ပြေးနေကြရတာပါ။
ဒါ့အပြင် လွိုင်ကော်မြို့က အထွက် နာနတ်တောရပ်ကွက်ဘက်မှာ မနေ့ မေလ ၂၄ ရက်က စစ်ကောင်စီတပ်တွေနဲ့ ပြည်သူကာကွယ်ရေးတပ်တွေ တိုက်ပွဲ ဖြစ်ခဲ့ပါတယ်။
ဒီအခြေအနေတွေကြောင့် လွိုင်ကော်မြို့ပေါ်မှာ ဆိုရင် ဒီနေ့ မေလ ၂၅ ရက် မနက်ကိုးနာရီနောက် အပြင်မှာ လူသွားလူလာမရှိသလောက် တိတ်ဆိတ်နေသလို ဈေးဆိုင်တွေလည်း ပိတ်ထားလို့ နီးစပ်ရာ ဖုန်းဆက်ပြီး ဈေးဝယ်ယူနေရတယ်ဆိုပြီး လွိုင်ကော်မြို့ခံတစ်ဦးက ပြောထားပါတယ်။
ဓာတ်ပုံ ရင်းမြစ်, CJ
ဓာတ်ပုံ ပုံစာ, လက်နက်ကြီးကျခဲ့တဲ့ကယန်းသာယာဘုရားကျောင်း
၂၅ မေ ၂၀၂၁စစ်ကောင်စီတပ်တွေနဲ့ KNLA တို့ တိုက်ပွဲအတွင်း စစ်ကောင်စီဘက်က ၃ ဦးကျဆုံးတယ်လို့ KNU ထုတ်ပြန်
ကရင်အမျိုးသားလွတ်မြောက်ရေးတပ်မတော် KNLA တပ်မဟာ ၅ နဲ့ တပ်မဟာ ၃ တို့ ပူးပေါင်းအဖွဲ့နဲ့ စစ်ကောင်စီတပ်တို့ကြား မေ ၂၂ ရက်တိုက်ပွဲအတွင်း စစ်ကောင်စီဘက်က ၃ ဦးကျဆုံးပြီး ၆ ဦးဒဏ်ရာရခဲ့ကာ သေနတ်နှစ်လက်ကို သိမ်းဆည်းရမိခဲ့တယ်လို့ ကရင်အမျိုးသားအစည်းအရုံးKNU သတင်းထုတ်ပြန်ရေးအဖွဲ့က ထုတ်ပြန်လာပါတယ်။
မေ ၂၂ ရက်မနက် ၁၁ နာရီခွဲကျော်ခန့်မှာ ခဲဒိုးအုပ်စု လယ်ပူထာ၊ ဝါမီလူနယ်မြေတွေအတွင်း စစ်ကောင်စီတပ်တွေနဲ့ ပစ်ခတ်မှုဖြစ်ပွားခဲ့တာဖြစ်ပြီး KNLA ဘက်က ထိခိုက်ကျဆုံးမှုမရှိဘဲ စစ်ကောင်စီဘက်က ၆ ဦးကျဆုံးပြီး သေနတ်နှစ်လက် သိမ်းဆည်းရမိတာလို့လည်း ဆိုပါတယ်။
ဒါ့အပြင် မနေ့ မေ ၂၄ ရက်မနက် ၁၁ နာရီခွဲမှာလည်း မူတြောခရိုင်ဘူးသိုမြို့နယ်အတွင်း ပစ်ခတ်မှုဖြစ်ပွားခဲ့ကြပြီး စစ်ကောင်စီဘက်က ၃ ဦး ဒဏ်ရာအပြင်းအထန်ရရှိခဲ့တယ်လို့ KNU ထုတ်ပြန်ချက်က ဆိုပါတယ်။
အဲဒါကြောင့် မနေ့ ညနေ ၆ နာရီခွဲမှာ ဖာပွန်အခြေစိုက် ခမရ ၁၉ နဲ့ ခမရ ၃၄၀ က စစ်ကောင်စီတပ်တွေဟာ မူတြော်ခရိုင် ဒွယ်လိုးမြို့နယ်အတွင်းရှိ ပြည်သူတွေရဲ့ ဥယျာဉ်ခြံအတွင်း လက်နက်ကြီး ၇ လုံး ပစ်ခတ်ခဲ့ပြီး ၆ လုံးပေါက်ကွဲခဲ့ကာ ၁ လုံးမှာမူ မပေါက်ကွဲခဲ့ကြောင်းလည်း ပါရှိပါတယ်။
ဒါ့အပြင် စစ်ကောင်စီတပ်တွေဟာ KNU တပ်မဟာ ၁ ထိန်းချုပ်နယ်မြေအတွင်းရှိ ဃူဘီးထွီကနေ ကမမောင်းသို့ ၆ ဘီးကား၊ ၁၀ ဘီးကား စုစုပေါင်း ကား ၁၃ စီးနဲ့ စစ်အင်အားနှင့် ရိက္ခာများ ပို့ဆောင်ခဲ့တယ်လို့လည်း ဆိုပါတယ်။
KNLA နဲ့ စစ်ကောင်စီတပ်တွေဟာ နေ့တိုင်းလိုလို ပစ်ခတ်မှုတွေဖြစ်ပွားနေပြီးပြည်သူလူထုရဲ့လုပ်ငန်းခွင်နဲ့ကျေးရွာတွေထဲကိုလက်နက်ကြီးလက်နက်ငယ်တွေနဲ့ ရမ်းသမ်းပစ်ခတ်နေတယ်လို့လည်း KNU ထုတ်ပြန်ချက်ကဆိုပါတယ်။
ဒါနဲ့ပတ်သက်လို့တော့ စစ်ကောင်စီဘက်က သတင်းတစ်စုံတရာ ထုတ်ပြန်ပြောကြားတာမရှိသေးပါဘူး။အခု KNU နဲ့ ဖြစ်ပွားနေတဲ့ ပစ်ခတ်တိုက်ခိုက်မှုတွေဟာ တပ်မဟာ ၅ ရဲ့ သဘောထားသာဖြစ်ပြီး KNU ရဲ့ ခေါင်းဆောင်ကိုယ်တိုင်က နိုင်ငံရေးအရ စေ့စပ်ညှိနှိုင်းတဲ့နည်းလမ်းကို ပြောကြားထားပြီးဖြစ်တယ်လို့ စစ်ကောင်စီပြောခွင့်ရသူ ဗိုလ်ချုပ်ဇော်မင်းထွန်းက မေ ၁၅ ရက်သတင်းစာရှင်းလင်းပွဲမှာပြောကြားထားပါတယ်။
ဓာတ်ပုံ ရင်းမြစ်, Thoolei News-KNU-Department of Information
၂၅ မေ ၂၀၂၁အာဏာသိမ်းအပြီးသေဆုံးသူ ၃၀၀ နီးပါးပဲရှိတယ်လို့ စစ်ခေါင်းဆောင်ပြော
စစ်တပ်က ဖေဖော်ဝါရီလ ၁ ရက်မှာ အာဏာသိမ်းမှုဖြစ်အပြီး စစ်ကောင်စီတပ်ဖွဲ့ဝင်တွေကြောင့် သေဆုံးသူအရေအတွက်ဟာ ၃၀၀ နီးပါးပဲရှိတယ်လို့ စစ်ကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ထုတ်ပြောလာပါတယ်။
အာဏာသိမ်းမှုပြီးကတည်းက မီဒီယာနဲ့ပထမဆုံး ထိတွေ့ဆက်ဆံမှုအဖြစ် မြင်နိုင်တဲ့ တရုတ်ရုပ်သံဌာန ဖီးနစ်နဲ့တွေ့ဆုံမေးမြန်းမှုမှာ စစ်ခေါင်းဆောင်က အခုလို ပြောလာတာပါ။
'' စာရင်းမရှိ၊ အင်းမရှိနဲ့ပြောကြတဲ့ ဒီ ၇၀၀ လောက်သေကြတဲ့ကိစ္စကို ထည့်ပြောတာက မျှတမှုမရှိဘူးလို့ ကျွန်တော်တို့ပြောလိုတာ။ တကယ်သေတာကတော့ ၃၀၀ နီးပါး လောက်ရှိပါတယ်။ ရဲမှာလည်း သေတဲ့သူအများကြီးရှိပါတယ်။ ရဲမှာလည်း ၄၇ ယောက်သေခဲ့တယ်။ ၂၀၀ ကျော် ဒဏ်ရာရတယ်'' လို့ စစ်ကောင်စီဥက္ကဋ္ဌက ရုပ်သံမေးမြန်းခန်းမှာ ပြောခဲ့ပါတယ်။
ဖေဖော်ဝါရီလ ၁ ရက်နောက်ပိုင်း စစ်ကောင်စီတပ်ဖွဲ့ဝင်တွေရဲ့လက်ချက်ကြောင့် သေဆုံးရတဲ့အပြစ်မဲ့ပြည်သူ ၈၀၀ ကျော်ရှိပြီး ဒါဟာ စာရင်းကောက်ယူမှု အချက်အလက်အရကြောင့်သာသိရတာဖြစ်သလို တကယ့်မြေပြင်မှာ သေဆုံးသူ ဒီ့ထက်များနိုင်တယ်လို့ ကုလသမဂ္ဂနဲ့ အရပ်ဘက်သုတေသနအဖွဲ့အစည်းတွေက ပြောနေကြချိန်မှာ စစ်ခေါင်းဆောင်က အခုလိုပြောလာတာပါ။
ဓာတ်ပုံ ရင်းမြစ်, AFP
ဓာတ်ပုံ ပုံစာ, ၂၀၁၈ ခုနှစ်မှာပြုလုပ်တဲ့ အာဏာနည်နေ့အခမ်းအနားကို တက်လာတဲ့ ဗိုလ်ချုပ်မှူးကြီး မင်းအောင်လှိုင်
၂၅ မေ ၂၀၂၁ဒေါ်အောင်ဆန်းစုကြည်၊ ဦးဝင်းမြင့်နဲ့ ဒေါက်တာမျိုးအောင်တို့ကို နေပြည်တော်ကောင်စီရုံးဝင်းထဲက အထူးတရားရုံးမှာ ရုံးထုတ်တယ်လို့ စစ်ကောင်စီရဲ့ သတင်းစာကြေညာ
နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ သမ္မတ ဦးဝင်းမြင့်နဲ့ နေပြည်တော်ကောင်စီဥက္ကဋ္ဌ ဒေါက်တာမျိုးအောင်တို့ကို နေပြည်တော်ကောင်စီရုံးဝင်းထဲကအထူးတရားရုံးမှာ ရုံးထုတ်စစ်ဆေးခဲ့တယ်လို့ စစ်ကောင်စီထိန်းချုပ်ထားတဲ့ နိုင်ငံပိုင်သတင်းစာတွေက ဒီနေ့ မေ ၂၅ ရက်မှာ ဖော်ပြထားပါတယ်။
သမ္မတဦးဝင်းမြင့်နဲ့ အတိုင်ပင်ခံဒေါ်အောင်ဆန်းစုကြည်တို့ကို စက်တင်ဘာ ၉ ရက်နေ့က NLD ပါတီရဲ့ လူ ၇၀၀ ကျော်ပါဝင်တဲ့ မဲဆွယ် ယာဉ်တန်းကို ကြိုဆိုနှုတ်ဆက်ခဲ့တာကြောင့် သဘာဝဘေးစီမံခန့်ခွဲမှုဥပဒေ ၂၅ နဲ့ အရေးယူထားတာဖြစ်တယ်လို့ ဖော်ပြထားပါတယ်။
ဒါ့အပြင် အတိုင်ပင်ခံကိုတော့ ရွှေကြာပင်ရပ်ကွက်မှာ တစ်အိမ်တက်ဆင်း မဲဆွယ်စည်းရုံးတာကြောင့်လည်း အဲဒီပုဒ်မနဲ့ ထပ်စွဲထားတယ်လို့ ဖော်ပြထားပါတယ်။ ဒါ့အပြင် အတိုင်ပင်ခံဟာ ဖေဖော်ဝါရီ ၁ ရက်က သူ့ရဲ့နေအိမ်မှာ တရားမဝင် ရေဒီယိုစကားပြောစက် ၁၀ လုံးနဲ့ ဂျန်မာ တစ်လုံးတို့ကိုလည်း သိမ်းဆည်းရမိတာကြောင့် ပို့ကုန်သွင်းကုန်ဥပဒေ ပုဒ်မ ၈၊ ဆက်သွယ်ရေးဥပဒေပုဒ်မ ၆၇ တို့နဲ့လည်း တရားစွဲထားတယ်လို့ ဆိုပါတယ်။
ဒါ့အပြင် အာဏာသိမ်းပြီးနောက် ဖေဖော်ဝါရီ ၇ ရက်နေ့မှာ NLD ပါတီ ဗဟိုအလုပ်အမှုဆောင်တွေက နိုင်ငံတကာသံရုံးတွေ၊ ဥရောပသမဂ္ဂနဲ့ နိုင်ငံတကာအဖွဲ့အစည်းတွေထံ အာဏာသိမ်းစစ်တပ်နဲ့ ပူးပေါင်းဆောင်ရွက်ခြင်းမပြုဖို့နဲ့ သမ္မတ ဦးဝင်းမြင့်သာ တရားဝင်သမ္မတဖြစ်ကြောင်း စာပေးပို့ခဲ့တာကြောင့်နဲ့ NLDပါတီက ထုတ်ပြန်တဲ့ ကြေညာချက် ၆/၂၀၂၁ ကြောင့် နိုင်ငံတော်ငြိမ်ဝပ်ပိပြားရေးကိုထိခိုက်စေတယ်ဆိုပြီး သမ္မတ၊ အတိုင်ပင်ခံနဲ့ ဒေါက်တာမျိုးအောင်တို့ကို ပုဒ်မ ၅၀၅ (ခ) နဲ့ တရားစွဲထားတယ်လို့ ဖော်ပြထားပါတယ်။
မနေ့ မေ ၂၄ ရက် ရုံးထုတ်ကိုတော့ နေပြည်တော်ကောင်စီရုံးဝင်းထဲမှာ အထူးတရားရုံး ပြုလုပ်ခဲ့ပြီး သူတို့ရှေ့နေတွေနဲ့လည်း သီးသန့်တွေ့ဆုံခွင့်ပေးခဲ့တယ်လို့ အဲဒီသတင်းက ဆိုပါတယ်။
မနေ့က ရုံးထုတ်စစ်ဆေးတဲ့တရားခွင်ကို ဘယ်နေရာမှာ ပြုလုပ်တယ်ဆိုတာကို မသိရကြောင်းနဲ့ သီးသန့်တွေ့ဆုံတဲ့နေရာဟာ ခြံဝင်းတစ်ခုဖြစ်ကြောင်း၊ တွေ့ဆုံတဲ့အခန်းထဲမှာ CCTV ကင်မရာတပ်ဆင်ထားကြောင်း ဒေါ်အောင်ဆန်းစုကြည်ရဲ့ရှေ့နေအဖွဲ့ထဲက တရားလွှတ်တော်ရှေ့နေ ဒေါ်မင်းမင်းစိုးက ပြောကြားထားပါတယ်။
ဒေါ်အောင်ဆန်းစုကြည်ကတော့ မနေ့က အဲဒီရုံးချိန်းမတိုင်ခင်သူ့ရှေ့နေတွေနဲ့ တွေ့ဆုံရာမှာ နာရီဝက်သာ တွေ့ခွင့်ပေးတဲ့အပေါ် အချိန်မလုံလောက်ကြောင်း၊ ပြည်သူတွေ ကျန်းမာရေးဂရုစိုက်ဖို့နဲ့ NLD ပါတီဟာ ပြည်သူအတွက်ထောင်ထားတာမို့ ပြည်သူရှိသရွေ့ ပါတီတည်ရှိမယ်လို့ပြောကြားခဲ့ပါတယ်။
ဓာတ်ပုံ ရင်းမြစ်, Global New Light of Myanmar
၂၄ မေ ၂၀၂၁Frontier Myanmar အယ်ဒီတာ လေဆိပ်မှာ ထိန်းသိမ်းခံရ
ရန်ကုန်မြို့ အခြေစိုက် Frontier Myanmar သတင်းဌာနရဲ့ သတင်းခန်းအုပ်ချုပ်မှု အယ်ဒီတာ ဒန်နီ ဖန်စတာ ကို ရန်ကုန်လေဆိပ်မှာ အာဏာသိမ်း စစ်ကောင်စီက ထိန်းသိမ်းလိုက်ပါတယ်။
ကွာလာလမ်ပူမြို့ကို ထွက်ခွာမယ့် မစ္စတာ ဒန်နီ ဖန်စတာကို လေယာဉ်ခရီးစဉ်မတိုင်မီ လေဆိပ်မှာ ဖမ်းဆီးခေါ်ဆောင်သွားခဲ့တာ ဖြစ်ပြီး အခုအခါ သူ့ကို အင်းစိန်ထောင်မှာ ထိန်းသိမ်းထားတယ်လို့ သိရကြောင်း Frontier Myanmar ရဲ့ ထုတ်ပြန်ချက်မှာ ဖော်ပြထားပါတယ်။
မစ္စတာ ဒန်နီ ဖန်စတာဟာ မိသားစုနဲ့တွေ့ဖို့ နဲ့ ကိုဗစ်ဆေး ထိုးဖို့အတွက် အမေရိကန်နိုင်ငံကို အားလပ်ရက် ခေတ္တ ပြန်မှာ ဖြစ်တယ်လို့ Frontier Myanmar သတင်းဌာနရဲ့ အမှုဆောင်အရာရှိချုပ် ဦးဆန်နီဆွေက ဘီဘီစီကို ပြောပါတယ်။
မစ္စတာ ဒန်နီ ဖန်စတာဟာ မြန်မာနိုင်ငံမှာ တရားဝင် ပြည်ဝင်ခွင့်ဗီဇာနဲ့ နေနေတာ ဖြစ်ပြီး သူ့ကို ဘာ့ကြောင့် ထိန်းသိမ်းသွားတာလဲ ဆိုတာ မသိရသေးဘူးလို့ ပြောပါတယ်။
အမေရိကန်နိုင်ငံသား မစ္စတာ ဒန်နီ ဖန်စတာအတွက် လိုအပ်တာတွေကို ရန်ကုန်မြို့ အမေရိကန်သံရုံးက လိုက်ပါဆောင်ရွက်နေတယ်လို့ ဦးဆန်နီဆွေက ပြောပါတယ်။
မစ္စတာ ဒန်နီ ဖန်စတာဟာ စစ်ကောင်စီက အာဏာသိမ်းအပြီး မြန်မာနိုင်ငံမှာ အထိန်းသိမ်းခံရတဲ့ တတိယမြောက် နိုင်ငံခြားသား သတင်းသမား ဖြစ်ပါတယ်။
ဓာတ်ပုံ ရင်းမြစ်, Frontier Myanmar
ဓာတ်ပုံ ပုံစာ, Frontier Myanmar သတင်းခန်းအုပ်ချုပ်မှု အယ်ဒီတာ ဒန်နီ ဖန်စတာ
၂၄ မေ ၂၀၂၁ဒေါ်အောင်ဆန်းစုကြည် တရားရုံးထုတ် ရုပ်သံက ထုတ်လွှင့်
နိုင်ငံတော်သမ္မတ ဦဝင်းမြင့်၊ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ နေပြည်တော်ကောင်စီဥက္ကဋ္ဌ ဦးမျိုးအောင်တို့ ရုံးထုတ်တာကို စစ်ကောင်စီထိန်းချုပ်တဲ့ ရုပ်သံက ထုတ်လွှင့်သွားခဲ့ပါတယ်။
သူတို့ ၃ ဦးကို နေပြည်တော်ကောင်စီဝင်းအတွင်းက နေအိမ်တစ်ခုရဲ့ အခန်းတစ်ခန်းမှာ တွေ့ရပြီး သူတို့ရဲ့နောက်မှာရပ်နေတဲ့ ရဲတပ်ဖွဲ့ဝင်တွေကိုလည်း တွေ့ရပါတယ်။
ဒေါ်အောင်ဆန်းစုကြည်ဟာ ခိုပြာရောင်အင်္ကျီနဲ့ ဇင်းမယ်လုံချည် ဝတ်ထားပြီး စစ်အာဏာသိမ်းပြီးနောက် ရက်ပေါင်း ၁၀၀ ကျော်အတွင်း သူရဲ့ရုပ်ပုံကို ပထမဆုံး မြင်တွေ့ရတာ ဖြစ်ပါတယ်။
ပုဒ်မ (၅)ခုနဲ့တရားစွဲ ခံထားရတဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ဒီကနေ့မှာ ပထမ ဆုံးအကြိမ် လူကိုယ်တိုင် ရုံးထုတ် စစ်ဆေးခဲ့တာ ဖြစ်သလို သမ္မတဦးဝင်းမြင့်နဲ့ ဒေါက်တာမျိုးအောင်တို့ကိုလည်း ဒီကနေ့မှာပဲ ရုံးထုတ်စစ်ဆေးခဲ့တာ ဖြစ်ပါတယ်။
၂၄ မေ ၂၀၂၁မန္တလေး VOM အယ်ဒီတာချုပ်ရုံးထုတ် မိသားစုကတွေ့ခွင့်မရ
နိုင်ငံတော် အကြည်ညိုပျက်စေမှု ပုဒ်မ ၅၀၅ ကနဲ့ တရားစွဲဆိုခံထားရတဲ့ မန္တလေးအခြေစိုက် Voice Of Myanmar သတင်းဌာန အယ်ဒီတာချုပ် ကိုနေလင်းနဲ့ သတင်းထောက် ကိုရှိုင်းအောင်တို့ကို ဒီနေ့ အွန်လိုင်း ကနေတစ်ဆင့် ရုံးထုတ်ခဲ့ပါတယ်။
Video Conferencing နဲ့ ရုံးထုတ်တယ်လို့သာ သိရပြီး ဇွန်လ ၇ ရက်နေ့မှာ ဒုတိယအကြိမ် ရုံးချိန်းထပ်မံ ချိန်းဆိုတယ်လို့ ကိုနေလင်းရဲ့ ဇနီးဖြစ်သူက ဘီဘီစီကို ပြောပါတယ်။
လက်ရှိအချိန်ထိ မိသားစုနဲ့ တွေ့ခွင့်မရသေးဘဲ ကိုနေလင်းတို့ကို ဘယ်မှာ ထိန်းသိမ်းထားသလဲဆိုတာ တိတိကျကျ မသိရသေးဘူးလို့လည်း ဆိုပါတယ်။
VOM သတင်းဌာနက ကိုနေလင်းနဲ့ ကိုရှိုင်းအောင်တို့ကို စစ်ဆေးစရာရှိလို့ဆိုပြီး နေအိမ်ကနေ ဧပြီလ ၂၇ ရက်နေ့ကတည်းက စစ်တပ်က ဖမ်းဆီးခေါ်ဆောင်သွားတာ ဖြစ်ပါတယ်။
စစ်အာဏာသိမ်းပြီးနောက်ပိုင်း သတင်းထောက် ၈၀ နီးပါး ဖမ်းဆီးခံခဲ့ရပြီး အယောက် ၄၀ ကျော်ထက်မနည်း ဆက်လက်ထိန်းသိမ်းခံထားရဆဲ ဖြစ်ပါတယ်။
ဓာတ်ပုံ ရင်းမြစ်, ZNM
၂၄ မေ ၂၀၂၁ရေစကြိုမြို့နယ်က ဇီးတောရွာကို စစ်ကောင်စီတပ်တွေ ဝင်ရှာ
ဓာတ်ပုံ ရင်းမြစ်, CJ
ဓာတ်ပုံ ရင်းမြစ်, CJ
မကွေးတိုင်းဒေသကြီး၊ ရေစကြို-ချောင်းဦး ကားလမ်းဘေးမှာ ရှိတဲ့ ဇီးတောစံပြကျေးရွာကို စစ်ကောင်စီတပ်တွေက ဒီနေ့ မေလ ၂၄ ရက် နေ့လယ်ခင်း ၁နာရီခွဲခန့်မှာ ဝင်ရောက်ခဲ့ပြီး သေနတ်ပစ်ဖောက်၊ ဆဲဆိုကြိမ်းမောင်းပြီး နေအိမ်နဲ့ ဈေးဆိုင်တချို့ကို ဖျက်ဆီးသွားခဲ့တယ်လို့ ဇီးတောစံပြကျေးရွာ ဒေသခံတွေဆီက သိရှိရပါတယ်။
စစ်ကောင်စီတပ်တွေ ဝင်ရောက်လာခဲ့လို့ ကလေးသူငယ်တွေနဲ့ သက်ကြီးရွယ်အိုတွေပါမကျန် ကြောက်လန့်တကြား ထွက်ပြေးခဲ့ကြရတယ်လို့ ဒေသခံတွေက ပြောပါတယ်။
လူငယ်တွေ ထွက်ပြေးရာနောက်ကို လိုက်ပြီး သေနတ်တွေနဲ့ လိုက်ပစ်ခတ်ခဲ့တယ်လို့ ထွက်ပြေးခဲ့ရတဲ့ အမည်မဖော်လို လူငယ်တစ်ယောက်က ဘီဘီစီကို ပြောပြပါတယ်။
ဒီကျေးရွာက လူတွေဟာ စစ်ကောင်စီဆန့်ကျင်ရေး ဆန္ဒပြပွဲတွေမှာ ပါဝင်တယ်ဆိုပြီး ဒေသခံတစ်ဦးက သတင်းပေးတိုင်တာကြောင့် အခုလိုလာရောက် ပစ်ခတ်မှုတွေ လုပ်တာလို့ ဒေသခံတွေက ယူဆနေကြပါတယ်။
လက်ရှိမှာ ဇီးတောနဲ့ အနီးအနားမှာရှိတဲ့ ရွာတွေက ရွာသူ ရွာသားတွေလည်း ကြောက်လန့်ပြီးထွက်ပြေးခဲ့ကြရတယ်လို့ အမည်မဖော်လိုသူ ဒေသခံတစ်ဦးက ပြောပါတယ်။