ပါ့စ်ဝတ် နေရာ အစားထိုးဝင်မယ့် ပါ့စ်ကီး

အင်တာနက် သုံးတဲ့ လူတွေတိုင်း ကြုံရတတ်တာက ပါ့စ်ဝတ်ထည့်ရတဲ့ အလုပ်ပါ။ ဘယ်ဆိုက်ကိုပဲ ဝင်ဝင် ဘာပဲ ဝယ်ချင်ချင် အွန်လိုင်းပေါ်မှာ အလုပ်တခု ပြီးဆုံးဖို့ အရေး ပါ့စ်ဝတ်ပေးရတတ်တာ ထုံးစံပါ။ ဒီကြားထဲ ပါ့စ်ဝတ် မေ့သွားတယ်ဆိုရင်တော့ အစအဆုံး တခါပြန်လုပ်ရတဲ့ ပြဿနာပါ။ အခုတော့ ဂူဂဲလ်အပါအဝင် နည်းပညာကုမ္ပဏီကြီး တချို့က ပါ့စ်ကီးစ် ဆိုတာကို မိတ်ဆက်အသုံးပြုလာကြပါပြီ။ ပါ့စ်ဝတ် ထည့်ရတဲ့ အလုပ်တလုပ် ပြီးသွားဖို့ အဖြေတခု ထုတ်ပေးထားပါပြီ။ ဆိုက်ဘာ သတင်းထောက် ဂျိုး တိုက်ဒီရဲ့ သတင်းကို ကိုရင်မောင်က ပြောပြမှာပါ။