Mapiau meddwl

Cynnwys y wers hon

• Un fideo am ddatblygu syniadau mewn ffordd greadigol
• Cyflwyniad i dechneg creu map meddwl
• Un gweithgaredd cynllunio cyflwyniad

Lesson content

• One video on developing ideas creatively
• Introduction to mind mapping technique
• One activity planning a presentation

Fideo / *Video *

Mapiau meddwl

Un o’r syniadau yn y fideo yw map meddwl. Beth felly yw map meddwl?

Mae'r dechneg o greu mapiau meddwl yn ffordd dda o gofio ffeithiau wrth adolygu.

Mae mapiau meddwl hefyd yn ffordd effeithiol i dy helpu i feddwl yn greadigol. Felly os wyt ti’n ceisio creu poster neu ffeithlun trawiadol neu eisiau datblygu cymeriad ar gyfer stori, gall map meddwl fod yn dechneg dda i’w defnyddio.

Darlun o sawl darn o wybodaeth yw map meddwl, ac mae'r dechneg yn cysylltu gwahanol syniadau gyda'i gilydd. Trwy wneud cysylltiadau rhwng y syniadau hyn, mae modd creu syniadau newydd.

Enghraifft

Mae angen dilyn cyfres o gamau er mwyn creu map meddwl.

Dychmyga dy fod angen creu taflen i godi ymwybyddiaeth o lygredd dŵr yn dy ardal di. Gall dilyn y pump cam isod i lunio map meddwl dy helpu i ddod o hyd i syniad:

Cam un

Yng nghanol y dudalen, tynna lun neu ysgrifenna beth yw’r thema, er enghraifft, sut i godi ymwybyddiaeth o lygredd dŵr.

Cam dau

Tynna ychydig o linellau neu ‘ganghennau’ trwchus sy’n ymestyn o’r brif thema. Dylai'r llinellau hyn dy helpu i drefnu dy feddyliau.
Er enghraifft, gallai dy ganghennau gynnwys rhai o’r ffyrdd gwahanol o godi ymwybyddiaeth pobl at lygredd dŵr, ee posteri, taflenni gwybodaeth, cyflwyniadau, ymgyrchoedd a cherddi.

Cam tri

Ym mhen draw pob cangen drwchus, gwna ganghennau teneuach yn nodi beth bynnag sy’n dod i dy feddwl.

Er enghraifft, gallai canghennau teneuach oddi ar air fel ‘taflenni’ gynnwys syniadau o beth sydd angen bod ar daflen a ble i ddosbarthu’r taflenni. Gallet ddefnyddio delweddau a lluniau yn ogystal â geiriau yma.

Cam pedwar

Ar ôl nodi dy holl syniadau, edrycha ar dy fap meddwl unwaith eto. Oes unrhyw gysylltiadau rhwng y syniadau? A oes modd ychwanegu saethau i gysylltu gwahanol rannau o dy fap meddwl?

Cam pump

Beth sy’n sefyll allan? Pan fyddi di’n gallu ateb y cwestiwn hwn, byddi di'n gallu cynnig syniad ar gyfer pecyn codi ymwybyddiaeth.

Gweithgaredd / *Activity *

Llunia gyflwyniad ar gyfer disgyblion Blwyddyn 6 a fydd yn ymuno â dy ysgol ym mis Medi. Pa bethau pwysig sy’n rhaid iddyn nhw ei wybod?

Beth am lunio map meddwl i gasglu syniadau?

Pa beth y bydd angen i’r disgyblion Blwyddyn 6 ei wybod am dy ysgol di? Manyla ar dy fap meddwl gan weld os oes cysylltiadau rhwng dy syniadau.

Ar ôl casglu dy holl syniadau, rwyt yn barod i greu dy gyflwyniad. Wyt ti am greu poster, blog, gwefan neu bamffled? Cofia fod angen i dy wybodaeth fod yn ddefnyddiol, yn ymarferol ac yn eglur.

Dilyna’r pump cam uchod er mwyn creu map meddwl i drefnu dy syniadau. Mae enghraifft isod i dy helpu.

Nodiadau i rieni

Ar ôl gorffen y wers, bydd disgyblion yn gallu:

• deall beth yw map meddwl
• creu map meddwl effeithiol a defnyddiol

Notes for parents

After completing the lesson, students will be able to:

• understand what a mind map is
• create an effective and useful mind map