Atakama humanoidinin insan olduğu təsdiqləndi

Çilidə tapılmış kiçicik mumiyalaşmış skelet üzərində aparılan testlər onun genetik mutasiyaya məruz qalan insan qalıqları olduğunu təsdiqləyib.

Hündürlüyü təqribən 15 santimetr olan mumiya 2003-cü ildə Çilinin Atakama regionundakı La-Noriya şəhərində aşkar olunub.

Tapıldığı yerə görə ona "Atakama humanoidi" (qısaca olaraq - Ata) adı verilib.

Uzunsov başı olan mumiyanın adi insanlardan fərqli olaraq 12 yox, 10 qabırğası var.

Onun qeyri-adi görünüşü, skeletin yadplanetlilərə aid olduğu barədə müxtəlif nəzəriyyələrə zəmin yaratmışdı.

Son araşdırma Ata-nın doğuşdan dərhal sonra ölən qız uşağı olduğunu müəyyən edib.

Tədqiqatın nəticələri Genome Research jurnalında dərc olunub.