You’re viewing a text-only version of this website that uses less data. View the main version of the website including all images and videos.
Rusiyanın Ukraynada genişmiqyaslı hərbi əməliyyatları davam edir. Prezident Putin müraciətində Ukraynanın şərqindəki ukraynalı əsgərləri silahları yerə qoymağa və evlərinə qayıtmağa çağırıb. Hazırda rus əsgərləri Kiyevin yaxınlığındadır.
Bir daha salam, canlı səhifəmizdə Rusiya Prezidenti Vladimir Putinin bu elanından sonra Rusiyanın Ukraynaya hücumuna dair xəbərləri oxudunuz.
Bu səhifəni bağlasaq da, saytımızda Ukraynadan xəbərlər verməyə davam edəcəyik.
Səhifəmizi izlədiyiniz üçün təşəkkür edirik.
Hörmətlə, BBC News Azərbaycanca komandası.
Rusiyanın hərbi müdaxiləsi nəticəsində 57 ukraynalı həlak olub, 169 nəfər yaralanıb, Ukraynanın səhiyyə naziri təsdiqləyib.
İnterfaks-Ukrayna xəbər agentliyi xəbər verir ki, Viktor Lyaşko ölkənin səhiyyə sisteminin hazırda stabil olduğunu bildirib. Bununla belə, ambulator yardım ala bilən insanlara xəstəxana çarpayılarını boşaltmaq tövsiyə olunub.
Moskvadan çəkilmiş kadrlarda Kremlə yaxın yerdə böyük izdiham görünür.
Müxalifətin mitinqlərindəki həbsləri izləyən OVD-İnfo-nun məlumatına görə, bu gün Rusiyada keçirilən etirazlarda azı 735 nəfər, o cümlədən Moskvada 330-dan çox adam həbs edilib.
MAFP xəbər agentliyi xəbər verir ki, Moskvanın Puşkin meydanı yaxınlığında 2000, Sankt-Peterburqda isə 1000-ə qədər insan toplaşıb.
Azərbaycan xarici işlər nazirinin müavini Araz Əzimov ATƏT-in Daimi Şurasının xüsusi iclasında “Ukraynada və ətrafındakı vəziyyətin ciddi narahatlıq doğurduğunu” qeyd edib.
Azərbaycan XİN-in yaydığı məlumatda deyilir ki, onlayn iclasda vəziyyətin “beynəlxalq hüququn norma və prinsiplərinə uyğun olaraq, o cümlədən dövlətlərin suverenliyi, ərazi bütövlüyü, sərhədlərin toxunulmazlığı, habelə ATƏT məkanında təhlükəsizliyin bölünməzliyi əsasında dinc və diplomatik yollarla həllinin vacib olduğu” vurğulanıb.
Qeyd olunur ki, iclasda vəziyyətin daha da pisləşməsinin qarşısının alınması üçün təxirəsalınmaz dialoqa çağırış edilib.
BBC müxbiri Nina Axmeteli xəbəri verir ki, Gürcüstanda müxalif "Droa" ("Zaman gəldi") partiyası olduqca genişmiqyaslı bir nümayiş keçirib. Digər müxalifət partiyaları, fəallar və yüzlərlə adi sakin də mitinqə qatılıblar. Oxşar tədbirlər Gürcüstanın digər şəhərlərində də keçirilib.
Azərbaycan Dövlət Neft Fondu (ARDNF- SOFAZ) 2013-cü ildə VTB Bank ASC tərəfindən yeni emissiya edilmiş 500 milyon ABŞ dolları həcmində səhmləri alıb və bankın ümumi səhm kapitalında 2,99%-lik paya sahib olub.
ARDNF-in saytında 2019-cu ilə aid bir xəbərdə deyilir ki, Fond həmin il bu banka pul qoymasına görə tənqid olunub.
İqtisadçı Qubad İbadoğlu Facebook hesabında yazıb ki, "Böyük Britaniya VTB-yə sanksiya elan edən kimi Bankın səhmləri 41% dəyər itirdi."
Polşa Rusiyanın hərbi müdaxiləsində yaralanan ukraynalıları gətirmək üçün bu ölkəyə qatar göndərəcəyini açıqlayıb.
Reuters agentliyinin xəbərinə görə, Polşanın səhiyyə naziri Adam Niedzielski yaralılar da daxil olmaqla, Ukraynadan gələn miqrantları qəbul edəcəklərini bildirib.
O, ukraynalıların müalicəsi üçün 120 xəstəxanadan ibarət siyahı hazırladıqlarını qeyd edib.
"Bu mərhələdə bir neçə min ukraynalı yaralını qəbul edəcək vəziyyətdəyik" - Niedzielski belə deyib.
Bu gün Moskvada və Sankt-Peterburqda Rusiyanın Ukraynanı işğal etməsinə etiraz olaraq aksiyalar keçirilib. Bu foto polislərin Moskvada aksiya iştirakçısını həbs etməsini göstərir.
Rusiya Prezidenti Vladimir Putin cümə axşamı günü Ukraynaya qarşı genişmiqyaslı hərbi əməliyyata başlayıb.
Onlarla insanın ölümünə səbəb olan Rusiyanın başlatdığı müharibə, qərb liderlərini Kremlə qarşı misli görünməyən sanksiyalar qəbul etməyə məcbur edib.
Rusiyanın hava qüvvələri Ukraynanın hərbi bazalarını vurduğu müddətdə quru qoşunları ölkənin şimal, cənub və şərq istiqamətindən hücuma keçib. Nəticədə çoxlu sayda ukraynalı bombalardan qaçmaq üçün evlərini tərk etməyə məcbur olub.
Çernobıldakı keçmiş nüvə stansiyası ətrafında şiddətli döyüşlər gedir.
Ukraynanın prezident köməkçisi Mixaylo Podolyak deyir ki, stansiyanın dağılıb-dağılmadığını bilmirlər.
BBC-nin əldə etdiyi videoda görünür ki, Rusiya tankları keçmiş nüvə stansiyasının yanındadır.
Əksəriyyəti qadın və uşaqlar olmaqla 4 mindən çox ukraynalı sərhədi keçərək Moldovaya axın edib.
Hələlik onların bu ölkədə qalacağı, yoxsa Rumıniyaya gedəcəyi məlum deyil.
Ölkəni tərk edənlər arasında qadın və uşaqların üstünlük təşkil etməsi onu deməyə əsas verir ki, Ukrayna hökuməti hərbi xidmət yaşında olan kişilərin ölkədən çıxışının qarşısını alır.
Lakin hələlik bu iddianı təsdiq edən heç bir fakt yoxdur.
Böyük Britaniyanın Baş naziri Boris Johnson Parlament qarşısında çıxışı zamanı Rusiyaya qarşı yeni sanksiyalar barədə danışıb.
Hökumət rəhbərinin sözlərinə görə, iqtisadi qadağalar Rusiyanın dövlət şirkətləri olan VTB bank və Aeroflota (Rusiyanın Hava Yolları şirkəti) da şamil olunacaq.
Boris Johnson bildirib ki, Aeroflot və Rusiya bankı daha Böyük Britaniyada fəaliyyət göstərə bilməyəcək.
O, adı çəkilən bankın Birləşmiş Krallığın maliyyə sistemindən tamamilə çıxarılacağını bəyan edib.
Baş Nazir eynisanksiya tədbirlərinin Belarusa qarşı da tətbiq ediləcəyini açıqlayıb.
“Londonda olan oliqarxlar gizlənməyə yer tapa bilməyəcəklər”, o əlavə edib.
Moskvada Nikitskaya küçəsi boyunca yürüş müşahidə edilir.
Hadisəni izləyən BBC müxbiri deyir ki, insanların sayı bir neçə yüz nəfər - min nəfərədək ola bilər. Onlar “Müharibəyə yox” şüarını səsləndirir və Kremlə tərəf gedirlər.
Rus paraşütçülərinin bu gün səhərdən etibarən Kiyevdən 25-30 kilometr aralıda yerləşən Antonov aviabazasına nəzarət etdiyini bilirik.
CNN-nin hadisə yerindən olan canlı yayımında ətrafda paraşütçülər aydın görünür.
Ukrayna Milli Qvardiyası əks-hücuma başladığını bildirib. Qərb kəşfiyyatının proqnozlaşdırdığı kimi, bu hücum sürətlə baş verib, ehtimal ki bu, onların gözlədiklərindən daha sürətli olub.
Rusiya zirehli kolonları Belarusla sərhəddən cənuba və Krım yarımadasından şimala doğru sürətlə irəliləyib.
Ruslar bundan sonra nə edəcəklər?
Əməliyyat bazasının yaradılması paraşütçülərə imkan verir ki, Kiyevi vursunlar və ya onlar indi irəliləyən rus zirehlilərini gözləyə bilərlər. Hər iki ssenari tezliklə baş verə bilər.
Sankt-Peterburqda müharibəyə etiraz olaraq keçirilmiş aksiyada saxlananlar var.
BBC News Rusca xəbər verir ki, polis saat 17:00-dan etibarən "Müharibəyə yox" plakatları olan insanları saxlayır, indiyədək 10-a yaxın adam saxlanılıb.
Prezident Zelenski canlı yayımda deyib ki, Ukrayna Silahlı Qvvələri Donbasda əla işlər görür:
“Xarkov istiqaməti - şəhəri etibarlı şəkildə qoruyub, saxlayır. Ən problemli vəziyyət cənubdadır.
Qoşunlarımız Xerson şəhərinin ətrafında gərgin döyüşlər aparır.
Düşmən işğal altındakı Krımdan sıxışdırılır, Melitopola doğru irəliləməyə çalışır.
Ölkənin şimalında düşmən Çerniqov vilayətinə doğru yavaş-yavaş irəliləyir, amma orada da onu saxlayanlar var.
Jitomir vilayəti yaxşı müdafiə olunur. Düşmənin desantları Qostomeldə əngəlləndi, qoşunlar məhv etmək əmrini alıb."
