Punonjës të huaj presin të evakuohen nga Libia

Agjencia tha se shtetasit e huaj që po ikin nga dhuna në Libi po vazhdonin të arrinin në kufi; të hënën numri kishte shkuar në 14 mijë vetë, shifra kjo më e lartë deri tani brenda një dite të vetme.

Një zëdhënëse e agjencisë, Melissa Fleming tha se kjo shifër mund të kapërcehet sot dhe se shumë refugjatë kishin pritur deri shtatëdhjetë e dy orë në radhë për të kaluar.

Një korrespondent i BBC-së thotë se temperaturat gjatë natës shënojnë rënje të thellë dhe se ai kishte parë trupin e një të riu që siç duket kishte vdekur nga të ftohtët.

Nga ana e saj, Organizata Ndërkombëtare për Migracion (IOM) po organizon një program evakuimi si pjesë të përpjekjeve për të ndihmuar dhjetëra mijëra punonjës migrantë që po largohen nga Libia.

Zëdhënësi i saj tha se qëllimi ishte lehtësimi i presionit në zonat e kufirit për të mos lejuar që situata me refugjatë të bëhet e pamenaxhueshme.

Janë angazhuar anije për të bartur egjiptianët deri në Aleksandri ndërsa punonjës nga Bangladeshi po barten me aeroplanë në atdheun e tyre; po bëhen përgatitje për të pranuar edhe migrantët afrikanë që po kalojnë në Niger.

Sipas vlerësimeve, një milion e gjysëm migrantë të huaj ishin duke punuar në Libi para se të shpërthenin trazirat por IOM thotë se beson që shumë prej tyre mund të mos jenë në gjendje të largohen për shkak se situata është aq jostabile.