Opozita ka thënë se do ta sfidojë ligjin brenda dhe jashtë parlamentit

Ky ligj që hyri në fuqi me vitin e ri, ka krijuar një autoritet të ri me fuqi për të monitoruar dhe vendosur gjoba mbi median.

Disa politikanë europianë dhe gazeta kanë shprehur shqetësimin se këtij rregullatori të ri i mungon pavarësia.

Por Hungaria që sapo ka marrë presidencën e BE-së, thotë se këto shqetësime janë të pabaza.

Në bazë të ligjeve të reja, Autoriteti i Hungarisë për Median (NMHH), mbikëqyr të gjitha produksionet e lajmeve dhe ka fuqinë për të gjobitur radio-televizionet dhe gazetat për shkeljen e "interesit publik, moralit publik apo të rendit".

Kritikët thonë se autoriteti dominohet nga njerëz që janë besnikë të partisë së qendrës së djashtë Fidesz, të cilës i përket kryeministri Viktor Orban.

Vendet e BE-së, ku bëjnë pjesë Britania, Gjermania dhe Luksemburgu kanë shprehur shqetësimet e tyre se ligji kufizon lirinë e medias.

Lidhur me këtë, zv/presidenti i Komisionit Europian, Neelie Kroes ka dërguar një letër në Budapest në fund të dhjetorit, përmes së cilës kërkon më shumë informacione lidhur me përmbajtjen e ligjit.

Gazetat hungareze me prirje të majta e kanë denoncuar ligjin.

Njëra prej tyre, Nepszabadsag, deklaroi në faqen e saj të parë të edicionit të fundit: "lirisë së shtypit në Hungari i erdhi fundi."

Akuza 'absurde'

Në një deklaratë të postuar në faqen e internetit të Administratë Publike dhe Ministrisë së Drejtësisë, qeveria hungareze kundërshtoi kritika të ndryshme të bëra nga zyrtarë evropianë dhe gazeta të huaja.

Në deklaratë thuhet se një tipar i zakonshëm i opinioneve të shprehura ishte fakti se "ato kishin mungesë njohurie të thellë për ligjin e ri."

"Në vend që të formulojnë kritika specifike, ato janë një përmbledhje akuzash të pabaza dhe me të vërtetë absurde," thuhet në deklaratë.

"Qeveria hungareze mbetet e angazhuar për lirinë e shtypit dhe në asnjë mënyrë nuk dëshiron t'u mbyllë gojën kritikave të opozitës."

Në deklaratë thuhet se anëtarët e Autoritetit të Hungarisë për Median (NMHH), nuk kanë "lidhje zyrtare apo jo zyrtare me partinë në pushtet.

"Autoritetet me një pavarësi më të vogël prej qeverisë nuk janë një gjë e pazakontë në mbarë Europën," shton deklarata.