Arbër Vllahiu BBC - Prishtinë

	Zoti Mustafa i bëri këto komente në një intervistë për BBC-në

Në një intervistë ekskluzive për BBC-në zoti Mustafa tha se LDK-ja do të duhej të ishte në opozitë dhe të ndikonte më fuqishëm për ndërtimin e një shtetit ligjor.

Ai tha se do të angazhohet për ndërprerjen me çdo kusht të fuksionimit të koalicionit qeverisës, i cili sipas tij, është jofunksional dhe i pamundëson partisë së tij realizimin e programit dhe detyrave të veta.

Isa Mustafa, ka fituar mandatin e dytë në zgjedhjet lokale në Prishtinë në nëntor të vitit të kaluar.

Kryetari i komunës së Prishtinës, Isa Mustafa, i ka deklaruar BBC-së se i takon udhëheqjes, siç e ka quajtur, relevante të partisë që të përcaktojë kandidatin për kreun e LDK-së dhe mënyrën e zgjedhjes, në rast të një vendimi të Gjykatës Kushtetuese kundër ngrirjes së postit të kryetarit Sejdiu.

Por zoti Mustafa, tani për tani, e ka përjashtuar mundësinë që të kandidohet për kryetar të LDK-së dhe ka thënë se nuk do të rreshtohet në krah të asnjërit kandidat aktual për kryetar të partisë.

Arbër Vllahiu i BBC-së zhvilloi një bisedë me zotin Mustafa dhe i kërkoi një vlerësim për procesin zgjedhor brenda LDK-së.

Z. Mustafa: Unë e vlerësoj si një proces shumë të rëndësishëm sepse pres që në këtë proces zgjedhor LDK-ja të rigjenerohet për së brendshmi. Ky rigjenerim, sipas meje, nënkupton se LDK-ja duhet ta ruajë strukturën, thelbin ose substancën që në një formë e reflekton vazhdimësinë e LDK-së dhe politikave që ajo i ka ndërtuar gjatë këtyre periudhave. Mirëpo ajo, domosdoshmërisht, duhet të bëhet shumë më e hapur për anëtarë të rinj dhe politika të reja si dhe për proceset nëpër të cilat po kalojmë pas ndërtimit të shtetit të Kosovës, meqë duhet të ndërrojmë shumë në sjelljen tonë, në organizimin por edhe në qeverisjen e LDK-së.

BBC: Kjo që thoni për forca të reja dhe për rigjenerim të partisë, a nënkupton se ju jeni të pakënaqur me rrjedhat brenda LDK-së?

Z. Mustafa: Unë kam vlerësuar dhe ende e mbaj përshtypjen time se LDK-ja ka qenë e mbyllur shumë gjatë, se në LDK janë zbatuar më shumë klishetë nga e kaluara, si reminishenca të një sjelljeje që ka patur vlerë për të kaluarën por jo për të tashmen, sepse ne duhet tani të marrim vendime ditore, meqë çdo ditë po ndryshojnë rrethanat dhe çdo ditë po përballemi me sfida të reja edhe në ndërtimin e shtetit të Kosovës por edhe në sfida në të cilat LDK-ja, si parti, duhet t’u përshtatet nevojave dhe kërkesave të qytetarëve dhe të anëtarësisë së vet. Konsideroj se LDK-ja ka qenë mjaft e mbyllur për të rinjtë, për njerëzit e tjerë që kanë interesim që të bashkëngjiten në LDK dhe në një formë, një pjesë e anëtarësisë së LDK-së ka vlerësuar se këtu duhet të shkohet me logjikën e përvojës dhe me logjikën që LDK-ja duhet domosdoshmërisht të transformohet në një parti e cila do të jetë e hapur për të tjerët dhe një parti e cila mund të përballet me kërkesat e anëtarësisë së saj dhe me kërkesat e qytetarëve.

BBC:Kush duhet ta bëjë këtë reformë, kur udhëheqja e deritashme ka zbatuar, siç thoni, klishetë? Kush duhet ta bëjë reformën e brendshme?

Z. Mustafa: Unë vlerësoj se reforma duhet të fillojë nga baza. Ka mendime të ndryshme se duhet të fillohet nga koka, por në këtë proces zgjedhor ne reformën duhet ta fillojmë nga aktivet e LDK-së në mënyrë që ato të jenë krejtësisht të hapura për njerëz të rinj. Kur them të rinj, mendoj për njerëz të rinj edhe për nga mosha por edhe që nuk kanë qenë në LDK ose që duan t’i rikthehen LDK-së. Duhet gjithashtu të bëhet edhe në nivel të degëve dhe nëndegëve, në mënyrë që ato të zgjedhin si përfaqësues të tyre edhe në Kuvendin zgjedhor të LDK-së, por edhe më vonë në Këshillin e Përgjithshëm të partisë, njerëz që do të jenë përfaqësues të denjë të LDK-së dhe njerëz që do të jenë në gjendje ta avancojnë programin e partisë, që atë të mos e interpretojnë në mënyrë statike, por ta interpretojnë në mënyrë dinamike dhe ta avancojnë në mënyrë dinamike, për arsye se gjërat po ndryshojnë shumë shpejt dhe duhet të sillemi në përputhje me dinamikën.

BBC: Ju jeni njeriu, anëtari, më i votuar i LDK-së. Mund ta bëni ju reformën e partisë?

Z. Mustafa: Unë i kam vënë vetes detyrë që të inkuadrohem në këtë reformë. Kam qenë i inkuadruar edhe deri më tani në hartimin e projekteve dhe gjetjen e zgjidhjeve se si të bëhet reforma e partisë. Nuk e vlerësoj se një individ, qoftë unë apo dikush tjetër, mund ta bëjë sepse duhet të punojnë ekipe të tëra që partia të reformohet. Unë ato vota që kam marrë nuk e vlerësoj se janë vetëm të LDK-së, por kam marrë vota të qytetarëve, por ata ma kanë dhënë besimin që unë të udhëheq në Prishtinë dhe u jam mirënjohës për këtë. Por, asesi nuk dua që këto vota t’i shfrytëzojë si kredi për LDK-në. Unë vlerësoj se Prishtina e ka ndalur rënien e LDK-së, sepse në Prishtinë është ndërprerë rënia e partisë edhe në vitin 2007 por edhe në vitin 2009. Ky nuk është vetëm kontribut imi por i degëve të LDK-së në Prishtinë dhe një pune të përbashkët që kemi bërë dhe kemi arritur që ta dyfishojmë votën për LDK-në për dy vite në Prishtinë. Ky mund të jetë një shembull shumë i mirë edhe për komunat e tjera dhe për Kosovën në tërësi.

BBC: A ka ardhur koha që LDK-ja, pas një udhëheqësi të saj historik, presidentin e ndjerë Rugova, ta ketë një udhëheqës tjetër, një njeri si ju p.sh?

Z. Mustafa: Unë nuk e konsideroj se ne tani e kemi shumë problemin e udhëheqësit. Unë vlerësoj se problemi është më shumë në organizimin e tërësishëm të LDK-së dhe në këtë organizim ne ta përcaktojmë dhe ruajmë pozitën e udhëheqësit. Unë e respektoj kryetarin e tashëm të LDK-së, zotin Fatmir Sejdiu, dhe unë besoj se do ta gjejmë zgjidhjen edhe sa i përket udhëheqjes së partisë. Por ajo që më shumë më intereson është që ne të hapemi, që krahas ruajtjes së substancës të LDK-së, të pranojmë njerëz të rinj dhe që LDK-ja të jetë një prej forcave relevante në zgjedhjet e ardhshme. Kjo për arsye se njerëzit kërkojnë një alternativë e cila do ta ndërtojë Kosovën në bazë të kërkesave të sotme për një shtet ligjor, për një shtet të zhvilluar ekonomikisht, për një shtet i cili do të integrohet, me të cilin do të ketë sa më pak probleme bashkësia ndërkombëtare. Unë këtu e shoh garancinë e LDK-së në qoftëse, natyrisht, LDK-ja do të shprehë interesimin për vetveten krahas asaj çfarë është interesimi i rrethit për LDK-në.

BBC: Zoti Mustafa, ka dy kandidatë për kryetar të LDK-së aktualisht. Për njërin, pra për Fatmir Sejdiun, pritet një vendim i Gjykatës Kushtetuese. Ku do të rreshtohet Isa Mustafa në këtë mes?

Z. Mustafa: Unë do të mbetem i parreshtuar, sepse nuk dua që paraprakisht të marrë anën e njërit ose kandidatit tjetër. Tani për tani është paraqitur zoti Bukoshi si kandidat, kurse zoti Sejdiu ende nuk është paraqitur formalisht, për arsye se është një marrëveshje në LDK që ajo të ndodhë në kuvendin e partisë ose pak para kuvendit. Unë vlerësoj se deri atëherë do të sqarohen shumë gjëra. Deri atëherë ndoshta LDK-ja mund të ketë edhe kandidatë të tjerë, të cilët do të shprehnin interesimin e tyre. Mendoj se është e natyrshme të kemi më tepër njerëz sepse LDK-ja në këtë formë do të gjente një zgjidhje shumë më të mirë dhe të pasuruar dhe ai që bëhet kryetar në të ardhmen, do ta ketë legjitimitetin shumë më të madh në një konkurrencë të mirëfilltë. Kjo asesi nuk duhet ta frikësojë LDK-në, ose dikë brenda saj, por duhet të jetë një pasuri që duhet ta kultivojë LDK-ja.

BBC: Më saktësisht, a jeni ju kandidat i LDK-së për kryetar të partisë?

Z. Mustafa: Jo unë nuk jam kandidat.

BBC: Do të jeni kandidat?

Z. Mustafa: As nuk mendoj të jem kandidat. Proceset të cilat do të zhvillohen pastaj do të tregojnë dhe do ta qesin në pah interesimin. Unë jam tani për tani kandidat që të pasurohet LDK-ja, të reformohet partia, që të shtyj dhe të përkrah këto procese. Në qoftëse këto procese nuk shkojnë në drejtimin që unë e mendoj, atëherë nuk e shoh veten as në mes as në krye të partisë, por do të mbetem në LDK si një opozitë e fortë brenda saj.

BBC: Nëse Gjykata Kushtetuese vendos se presidenti Sejdiu ka shkelur Kushtetutën me ngrirjen e postit të tij, që nënkupton se nuk mund të kandidohet për një mandat të ri në parti, ju thoni se nuk jeni në asnjë rrethanë kandidat për partinë. Mos po e mbani peng partinë me këtë qëndrim që nuk po futeni në garë, duke pritur presidentin?

Z. Mustafa: Në bazë të bisedave që kam patur me juristët që kanë marrë pjesë në hartimin e Kushtetutës, pjesa më e madhe e tyre thonë se sjellja e deritashme e presdentit nuk është dhe s’ka qenë në përplasje me Kushtetutën për arsye të formulës dhe formulimeve kushtetuese për këtë. Por, nuk e paragjykoj vendimin e Gjykatës Kushtetuese. E kam thënë edhe më herët, por po e përsëris, se llogaris që ajo periudhë pastaj do të jetë periudhë e marrëveshjeve të brendëshme lidhur me zgjedhjen që do të bëhet. Në këtë marrëveshje të brendëshme, të gjithë ne do të inkuadrohemi që të gjejmë zgjidhjen më të mirë. Mendoj se atëherë i takon presidentit Sejdiu dhe pjesës përgjegjëse të LDK-së dhe këtu nënkuptoj pjesën që ka peshë reale në LDK dhe jo vetëm që kanë peshë formale, që të përcaktohen qoftë për njerëzit që nesër do të jenë konkurrentë për kreun e LDK-së, qoftë edhe për mënyrën e zgjedhjes së tyre.

BBC: Ju keni qenë një prej kritikëve më të mëdhenj të koalicionit qeverisës LDK-PDK. Vazhdoni ta mbani këtë kritikë ndaj koalicionit?

Z. Mustafa: Unë jam plotësisht i bindur në qëndrimin tim të mëhershëm se me të drejtë i kam bërë vërejtjet dhe qëndroj prapa tyre. Vlerësoj se një koalicion i tillë është jofunksional dhe, gjithashtu, vlerësoj se LDK-ja është dashur të ulet dhe ta shqyrtojë këtë dhe jo që përfaqësues të caktuar të LDK-së ta intepretojnë këtë si një qëndrim individual. Ai nuk ka qenë qëndrim imi individual për arsye se në mjediset ku unë kam marrë vota, njerëzit e kanë përkrahur këtë qëndrim. Vlerësoj se LDK-ja do të duhej të kishte dhe të ketë një konsideratë të veçantë ndaj kësaj, sepse ne me këtë koalicion nuk i bëjmë dëm vetëm vetvetes, pra LDK-së, por nuk i kontribojmë as forcimit të pushtetit të Kosovës dhe nuk i ndihmojmë as PDK-së, sepse edhe ajo do të ishte shumë më e përgjegjshme sikur ta kishte vetë përgjegjësinë për qeverisjen e Kosovës, ndërkohë që LDK-ja do të rirnte në një opozitë dhe do të ushtronte një ndikim të fuqishëm për një shtet ligjor të Kosovës.

BBC: Mirëpo koalicioni ka përgjegjësitë dhe obligimet për Kosovën dhe proceset nëpër të cilat po kalon ajo. Vlerësoni se LDK-ja nuk po i kryen përgjegjësitë e saj brenda koalicionit, apo është e kundërta?

Z. Mustafa: Unë e shoh se LDK-ja është në një pozitë krejtësisht inferiore brenda këtij koalicioni. LDK-ja nuk pyetet ose pyetet shumë pak vetëm për ato çështje për të cilat vlerësohet se mund të mbetet një arsye se po bashkëpunon me partnerin e koalicionit. LDK-ja nuk pyetet fare se çfarë po ndodh me kompanitë publike në Kosovë, a duhet të privatizohen apo jo. LDK-ja nuk pyetet fare se në çfarë borxhi po hyn sot Kosova dhe si do të kthehet ky borxh, si dhe kush do ta bartë përgjegjësinë nesër për gjeneratat që vijnë për detyrimet shtetërore ose ndërshtetërore që i merr Kosova. LDK-ja nuk pyetet për hapat strategjikë të zhvillimit të Kosovës. Prandaj në këtë aspekt e shoh nevojën që LDK-ja duhet ta shqyrtojë pozitën e saj në qeverisje dhe të marrë përgjegjësitë për aq sa ajo pyetet dhe për aq sa asaj i takon. Përkatësisht, LDK-ja nuk duhet të jetë fare aty, sepse ajo tani nuk ka fuqi, në këtë konstelacion të forcave, të realizojë programin e vet dhe detyrat e veta.

BBC: Po nëse hipotetikisht themi se Isa Mustafa do të zgjidhet kryetar i LDK-së, ose do të jetë në strukturat udhëheqëse të partisë, do të kërkoni daljen e partisë nga koalicioni aktual qeverisës?

Z. Mustafa: Pa hyrë në pyetje ose përgjigje hipotetike, unë po ju them se jo vetëm po të jetë Isa Mustafa në krye të LDK-së, por edhe po të jetë Isa Mustafa në forumet e LDK-së që vendosin për këtë, unë do të angazhohem me çdo kusht që ky koalicion të ndërpritet. Dhe këtë do ta bëj. Unë nuk dua të sillem në mënyrë të dyfishtë ose dyfytyrëshe me opinionin, me anëtarët e LDK-së dhe me qytetarët sepse atë që e kam thënë, nuk e kam thënë vetëm për konsum elektoral që të përfitojë përkrahjen e qytetarëve, por e kam thënë si një bindje të plotë timen. Prapë e nënvizoj se është bindja ime e plotë se, pavarësisht nga proceset nëpër të cilat po kalon Kosova, LDK-ja duhet ta rishqyrtojë pozitën e vet dhe duhet të shkëputet nga ky koalicion dhe sa më shpejt të mbahen zgjedhjet e përgjithshme sepse edhe këto vërejtje që po jepen nga ndërkombëtarët dhe nga qytetarët e Kosovës për mënyrën e qeverisjes së Kosovës, ne nuk duhet të vazhdojmë edhe më tutje të qeverisim në formën e tillë.