Zonja Merkel thotë se përjashtimi është vetëm mjet i fundit

Në një fjalim në parlamentin gjerman, Kancelarja Merkel tha se traktati duhet të parashikojë edhe përjashtimin e një vendi, duke marrë shkak nga kriza e rëndë në të cilën ndodhet Greqia.

"Në të ardhmen traktati duhet të përfshijë edhe një klauzolë që mundëson përjashtimin e një vendi nga zona e euros, si një mjet i fundit, nëse ky vend nuk plotëson kushtet në mënyrë të përsëritur për një periudhë afatgjatë. Përndrysdhe bashkëpunimi është i pamundur", tha Kancelarja Merkel duke folur në parlamentin gjerman.

Ajo tha se rregullat ekzistuese të Bashkimit Evropian 'nuk ishin aq të forta' sa për të trajtuar krizën aktuale, të cilën ajo e përshkroi si sfidën më të madhe që ka përjetuar monedha evropiane, euro.

Është e qartë që Gjermania, ekonomia më e madhe e Eurozonës dhe eksportuesja e dytë më e madhe në botë pas Kinës, është e përgatitur të mendojë të paimagjinueshmen për të garantuar stabilitetin e monedhës evropiane.

Papandreu në Bruksel

Kryeministri grek, Jorgos Papandreu, ishte në Bruksel të mërkurën për bisedime të tjera lidhur me krizën e rëndë në të cilën ndodhet Greqia.

Në axhendën e bisedimeve ishte një takim me Presidentin e Komisionit Evropian, Jose Manuel Barroso, dhe një njohja e deputetëve të parlamentit evropian me planet e qeverisë së tij për shkurtimin e borxhit të thellë të Greqisë.

Të martën ministrat e financave të Bashkimit Evropian, i mbështetën planet për ta ndihmuar Greqinë, nëse ajo kërkon ndihmë financiare.