Dy kandidatët presidencialë kanë kërkuar garanci për taksapaguesit

Gjatë një seance në Komisionin e Senatit për Sistemin Bankar, një komision ky me ndikim, udhëheqësi republikan dhe ai demokrat, shprehën skepticizëm.

Kreu i Komisionit, demokrati Chris Dodd, e cilësoi planin të papranueshëm.

Kreu i grupit të republikanëve Richard Shelby, tha se nuk do ta vinte vulën në të.

Plani, i hartuar nga autoritetet pas krizës financiare, është më i madhi i llojit të vet në historinë e SHBA.

Rezerva

Ai parashikon krijimin e një fondi në vlerë 700 miliardë dollarë për të ndihmuar institucionet financiare në vështirësi.

Kreu i Rezervës Federale, Ben Bernanke, dhe sekretari për Thesarin, Henry Paulson, i ka bërë thirrje Kongresit që ai të miratohet sa më shpejt.

Të dy partitë po i kërkojnë qeverisë që të sigurojë se plani nuk do të ndihmonte institucionet financiare të Wall Street-it, në kurriz të taksapaguesve amerikanë.

Ndërsa Kongresi vazhdon të shprehë rezerva të mëdha për planin dy kandidatët presidencialë kanë lënë të kutohen se e mbështesin atë me rezerva.

Ata kërkuan garanci për planin, por nuk e hodhën poshtë.

Garanci

Kandidati demokrat, Barack Obama, kërkoi që në planet e qeverisë të parashikohet dhënia e ndihmës për amerikanët që kërcënohen të humbasin shtëpitë si rezultat i krizës financiare.

"Ajo që presin me të drejtë populli amerikan e taksapaguesit, është që të ketë kërkim llogarie, se ky nuk do të jetë program ndihmash për drejtorët e korporatave, se ata do të mbrohen, apo se të paktën, kriteret dhe struktura e këtyre programeve, do t'i ndihmojë ata sa të jetë e mundur," tha ai.

Kandidati republikan, John McCain, bëri thirrje që të merreshin masa që paratë e taksapaguesve amerikanë të mbikqyreshin dhe të mos shpenzoheshin kot.

"Duhet të ekzistojë një mënyrë që taksapaguesit të marrin paratë që janë futur në këtë fond, " tha ai.

"Është një shumë e paprecedent parash dhe ajo thjesht, nuk mund të shkojë në një gropë të zezë borxhesh të këqija pa siguruar një mënyrë për ta marrë mbrapsh," tha ai.