Militantët e Ushtrisë Mahdi po bëjnë rezistencë në Basra

"Unë do të thosha se ky është një moment përcaktues në historinë e Irakut të lirë. Ka pasur edhe momente të tjera përcaktuese, por edhe ky i tanishmi është një i tillë", tha presidenti Bush.

"Vendimi për të dërguar trupat irakiane në Basra flet për rolin udhëheqës të kryeministrit Nuri al Maliki. Njëra nga pyetjet e para që unë kisha kur ai u zgjodh kryeministër ishte nëse ai do të kishte vullnetin e duhur për t'u ballafaquar me elementët kriminelë, qofshin këta shiitë apo sunitë", tha zoti Bush.

Duke folur pasi avionët luftarakë të forcave të koalicionit, që po mbështesin trupat irakiane, bombarduan pozicionet e militantëve, zoti Bush tha se Shtetet e Bashkuara do të vazhdonin të ruanin një prani të fortë ushtarake në Irak për të garantuar suksesin.

Kryeministri al Maliki iu ka ofruar shpërblim militantëve që dorëzojnë armët.

Megjithatë, edhe pas katër ditë luftimesh, militantët, kryesisht të Ushtrisë Mahdi të klerikut radikal shiit, Moqtada al Sadr, kontrollojnë pjesën më të madhe të Basrës.