Fatos Ahmati korrespondent i BBC-së Tiranë

Ata i shtohen listës prej disa dhjetra hidrocentralesh të vegjël që kabineti Berisha ka njoftuar se i ka dhënë me koncesion, në një përpjekje për të zbutur efektet e krizës energjitike që ka përfshirë prej kohësh vendin.

Në Shqipëri janë të paktën 80 hidrocentrale të vegjël, pjesa më e madhe jashtë shfrytëzimit për shkak të degradimit jo vetëm teknologjik.

Por specialistë të ndryshëm, ndonëse në parim shprehen dakord, shikojnë një masë të tillë të ndërmarrë nga qeveria vetëm si propagandistike.

Kufizime në energji

Ndërkohë kufizimet në furnizimin me energji elektrike në Shqipëri vazhdojnë.

Ato janë nga 4-15 orë në ditë ndërsa specialistët parashikojnë që kriza të vazhdojë.

Në këtë situatë u njoftua se komisioni i kontrollit të lartë të shtetit ka ngritur padi ndaj ish drejtorit të KESH-it Andi Beli i shkarkuar pak muaj më parë për shkelje të ligjit në tenderat për blerje të energjisë, shkelje që i ka kushtuar korporatës një humbje prej rreth 15 milionë eurosh.