Në Asamblenë e re të Partisë mungojnë disa figura të njohura

Asambleja është forumi më i lartë vendimmarrës mes dy kongresve.

Në prurjet e reja për Asamblenë Kombëtare të PS bien në sy emrat e mbështetësve të njohur tashmë të kryetarit socialist Edi Rama si Dashamir Peza, Eduard Shalësi, Mimi Kodheli, Auron Tare, Artan Lame apo Saimir Tahiri e Valbona Sulçe.

Mungojnë ndër të zgjedhurit ish ministrat e brendshëm Spartak Poçi, Igli Toska apo Luan Rama si dhe emrat e tjerë të njohur, ish ministrat e deputetët si Anastas Angjeli, Makbule Çeco, Bardhyl Agasi, Hamdi Jupe, Gjergj Koja, Sherif Bundo, Luiza Hoxha, Zamira Çaka etj.

Asambleja Kombëtare e socialistëve do të ketë 160 anëtarë, ndërsa nga votimet e të dielës dalin direkt vetëm 60 anëtarë.

Pjesa tjetër do të plotësohet me emrat e 42 deputetëve socialistë si dhe të ish drejtuesve të lartë të partisë dhe të shtetit të cilët futen në asamble automatikisht.

Në mediat e Tiranës ka spekulime se të përjashtuarit nga drejtimi i partisë socialiste po grupohen për t’u rikthyer sërish në drejtimin e partisë apo për t’ju bashkuar ish kryetarit socialist Fatos Nano, nëse ai nuk fiton postin e Presidentit të Republikës dhe krijon një parti të re.