Zoti Ruecker i ka thënë BBC-së se misioni i ri civil e ushtarak ndërkombëtar, së bashku me udhëheqjen kosovare do të sigurojnë që plani Ahtisaari, i pranuar me Rezolutë, të zbatohet në gjithë territorin e Kosovës, përfshirë edhe veriun e saj.

Sipas tij qytetarët e kanë kuptuar drejt procesin që po zhvillohet në Nju- Jork dhe ata do të kenë durim deri në miratimin e Rezolutës së re.

Ruecker ka kundërshtuar planin B për Kosovën, që parashikon shpalljen e njëanshme të pavarësisë së Kosovës në Kuvendin e saj.

Takimi i G-8

Ministrat e jashtëm nga vendet e G8 duket se nuk kanë bërë shumë progres në ngushtimin e hendekut në pikëpamjet mbi Kosovën.

Ministri i jashtëm rus, Sergei Lavrov, vazhdoi me qëndrimin e Moskës se e ardhmja e Kosovës duhet të zgjidhet me bisedime direkte midis Beogradit dhe Prishtinës dhe jo me një rezolutë të Këshillit të Sigurimit të OKB.

Fuqitë perëndimore të drejtuara nga Sekretarja Amerikane e Shtetit, Condoleezza Rice, vazhduan me këmbënguljen e tyre se plani i OKB që rekomandon pavarësi me mbikqyrje ndërkombëtare për Kosovën është rruga përpara.