Shpërthim në një autobus në Iran

Agjencia e lajmeve IRNA thotë se shpërthimi ndodhi në qytetin Zahedan, pranë kufirit me Pakistanin dhe Afganistanin.

Njoftimet thonë se një makinë e mbushur me lëndë plasëse ndaloi para një autobusi që transportonte rojat kufitare para se të shpërthente.

Personat që gjetën vdekjen nga shpërthimi në autobus po udhëtonin për në punë. Ata ishin pjesëtarë të Rojave Revolucionare dhe të një grupi vullnetar paraushtarak Basij.

Agjencia iraniane e lajmeve thotë se një veturë e vogël parakaloi autobusin dhe ndaloi para tij duke pretenduar se kishte defekt.

Sipas njoftimeve, pasagjerët e veturës u morën nga disa motoçikleta para se të shpërthente makina-bomba.

Agjencia e lajmeve thotë se autorët e këtij "akti terrorist" janë arrestuar.

Në rajonin e Baluçistanit ka pasur një sërë sulmesh, vrasjesh e rrëmbimesh dhe Irani ka fajësuar grupin sunit Jundollah, i cili vepron në rajonin kufitar midis Pakistanit, Afganistanit dhe Iranit.