Zgjedhjet në Tiranë shihen si shumë të rëndësishme

Me arritjen e marrëveshjes edhe mes partive të majta, gara zgjedhore ka marrë pamjen e përballjes mes dy aleancave të mëdha.

Në Komisionin Qendror të Zgjedhjeve janë të shqetësuar se afatet ligjore është e vështirë që të arrihen.

Tashmë gara elektorale është e hapur dhe shtabet e kandidatëve dhe të partive i kanë ndezur motorët e propagandës.

Dy drejtuesit kryesorë të politikës, Kryeministri Sali Berisha dhe Kryetari i Partisë Socialiste, Edi Rama, ishin të enjten në mbrëmje në të njëjtën orë në studiot e televizioneve më të shikuar.

Dallohej qartë se çdo frazë e tyre ishte e llogaritur me kujdes në shërbim të fushatës zgjedhore të 18 shkurtit.

Kampi i djathtë, me në qendër Partinë Demokratike është grumbulluar nën siglën 'Aleanca e Madhe', kurse kampi i majtë rreth PS-së, ka zgjedhur siglën 'Bashkimi për të Ardhmen'.

Bashkë me fushatën po nis edhe gara e sondazheve për popullaritetin e kandidatëve, sidomos për Tiranën.

Kandidati demokrat Sokol Olldashi e ka filluar fushatën me dorëheqjen nga posti i ministrit të brendshëm.

Pritet që zemra e zgjedhjeve të jetë Tirana.

Jo vetëm sepse këtu jeton pothuajse gjysma e popullsisë së Shqipërisë, por edhe sepse në garë është kryetari i partisë më të madhe të opozitës, Edi Rama.

Fitorja apo humbja e tij do të ndikojë dukshëm mbi zhvillimet politike të këtij viti.

Në muajin maj në Shqipëri do të jetë koha për të zgjedhur presidentin e ri të republikës, prandaj dy kampet kryesore politike i kanë ndërtuar strategjitë e tyre edhe në funksion të kësaj ngjarjeje.

Në rastin e mosarritjes së votave të duhura në parlament për zgjedhjen e presidentit, sipas kushtetutës, Shqipëria do të hynte në zgjedhje të përgjithshme të parakohëshme.

Për momentin, vëmendja është e përqëndruar te gara e 18 shkurtit, i cili është shumë afër.

Zyrtarë të Komisionit Qendror të Zgjedhjeve janë të shqetësuar se disa afate të infrastrukturës zgjedhore janë shumë vështirë për t'u arritur.