Takimi do të ndalet në problemet e energjisë

Në fund të takimit të zhvilluar në Moskë, ministrat thanë se mekanizmat e tregut ishin me rëndësi jetike për funksionimin efektiv të sistemit global të energjisë.

Organizatore e takimit për herë të parë ishte Rusia që ka presidencën e G8-ës.

Moska po promovon veten si një furnizuese e besueshme energjie, por korrespondentët thonë se që nga koha kur vendi ndërpreu furnizimin me gaz të Ukrainës muajin e kaluar shumë në perëndim kanë shprehur shqetësim për shkallën e kontrollit që ushtron shteti mbi industrinë dhe i kanë bërë thirrje presidentit Putin të lejojë më shumë investime të huaja.

Por nga ana tjetër, vështirësitë në sigurimin e rezervave energjitike, e bëjnë të vështirë që Evropa të shmangë varësinë e saj nga karburantet që vijnë nga Lindja.

Ministri japonez i energjisë, Sadakazu Tanigaki tha se vendet e industrializuara duhet të mendonin se si të siguronin burime të qëndrueshme për furnizimin me energji në kushtet e çmimit të lartë të naftës.