Autoritetet fajësojnë mungesën e kontrollit dhe vonesat

Kina ka konfirmuar gjithashtu rastin e tetë të prekjes së njerëzve nga ky virus.

Ministria e shëndetësisë ka fajësuar mungesën e kontrollit dhe vonesat në njoftimin e rasteve të shfaqjes së epidemisë te shpendët.

Deri tani Kina ka njoftuar tetë raste të prekjes së njerëzve nga gripi i shpendëve.

Pesë prej pacientëve kanë vdekur. Rasti i fundit është një djalë 6 vjeç në provincën qëndrore Hunan, dhe ai është në gjendje kritike.

Mendohet se viktima e fundit u infektua nga shpezët që mbante familja e tij, megjithëse nuk është konfirmuar përhapja e virusit të gripit tek shpendët në këtë zonë.

Mangësi

Ministria kineze e shëndetësisë po e pranon se sistemi i tanishëm nuk funksionon, duke fajësuar për këto raste mungesën e kontrollit të përshtatshëm dhe vonesat një njoftimin e rasteve të shfaqjes së gripit tek shpezët.

Gazeta China Daily thotë se vetëm dy të tretat e spitaleve që ndodhen në qytetet e Kinës janë përfshirë në rrjetin që monitoron dhe njofton për rastet e shfaqjes së virusit të gripit të shpendëve.

Një zëdhënës i ministrisë së shëndetësië i tha kësaj gazete se shpesh rastet e shfaqjes së këtij virusi tek njerëzit diagnostikohen gabimisht si pneumoni.

Në Kinë deri tani janë zbuluar 30 vatra të shfaqjes së virusit të gripit të shpendëve.

Në rastin e fundit, 16 mijë pëllumba të egër kanë ngordhur në provincën jugperëndimore Gui Zhou dhe janë therur 40 mijë shpezë.