KE-ja pret rezultatin e analizave të virusit në Rumani

Të enjten u konfirmua se gripi i shpendëve, i gjetur në shpezët në Turqi ishte i tipit vdekjeprurës H5N1.

Ky lloj ivirusi ka shkaktuar 60 viktima në mesin e njerëzve në Azi.

Komisioni evropian ndërkohë po pret që të mësojë nëse virusi i gjetur në mesin e shpezëve në një vend tjetër evropian, Rumani, ishte i të njëjtit tip.

Masa

Si në Turqi, ashtu dhe në Rumani, shpezët e infektuara me virusin e shpendëve, kanë qenë pranë vendeve të preferuara të zogjve shtegtarë.

Për këtë arsye, BE-ja po përpiqet të pakësojë mundësinë e kontakteve mes zogjve shtegtarë dhe shpendëve shtëpiakë në zonat me rrezik më të madh.

Kjo mund të thotë edhe se disa nga shpezët duhet të mbahen në mjedise të mbyllura.

Ekspertët e veterinarisë priten të dalin nga takimi i së premtes me rekomandime rreth rrezikut që ekziston për njerëzit që mund të bien në kontakt me zogjtë shtegtarë.

Rezultati i Rumanisë

Komisioni Evropian nga ana e tij pritet të mësojë të premten nëse gripi i shpendëve që u gjet tek shpezët në Rumani, ishte apo jo virus i tipit vdekjeprurës H5N1.

Një korrespondent i BBC-së në Bruksel thotë se zyrtarët evropianë presin të dëgjojnë lajmin më të keq.

Organizata Botërore e Shëndetësisë tha të enjten se mundësia që shpendët e infektuara në Rumani të kishin virusin vdekjeprurës, ishte shumë e lartë.