Bliadhna nan ÒranYear of Song

Màiri Hamilton

Rugadh Màiri Chaimbeul anns an t-Srùigh ann a' Srath Ghlais air 14 Dùbhlachd, 1888. B' e geamair a bha na h-athair, Raibeart, a bhuineadh do Ghleann Chanaich agus a bha ainmeil mar phìobaire agus mar sheinneadair.

Nuair a bha i glè òg, ghluais an teaghlach gu bonn Beinn Dronnaig, ann an Atadal ann an Loch Aillse. Tha an dachaigh a bha aca an sin an-duigh air a chleachdadh na bhothan le luchd coiseachd nam beann.

Nuair a bha i naoi bliadhna a dh'aois ghluais iad gu ruige Cill Fhaolain an Ceann Tàile agus ceithir bliadhna an dèidh sin ghluais iad dhan Dòrnaidh.

Chaidh Màiri do Sgoil Ghlinn Urchadain agus an dèidh an sgoil fhàgail chaidh i don Normal School airson trèanadh luchd-teagaisg ann an Cowcaddens ann an Glaschu. Nuair a chrìochnaich i a trèanadh fhuair i obair ann a' Foithear, ri taobh Loch Nis. Bha i ag obair ann a' Shotts, faisg air Glaschu, an dèidh sin.

B' ann aig an àm sin a choinnich i agus a phòs i Gavin Hamilton. B' e bancair a bh' ann agus bha an dachaigh aca ann a' Shotts airson greis mus do ghluais iad dhan Chuimrigh.

Bha dithis nighean aca, Seasaidh agus Betty, a rugadh anns a' Chuimrigh, dà bhliadhna mus do thill an teaghlach a dh'Alba. Chaidh iad an toiseach gu Coatbridge agus an dèidh sin gu Tobar na Màthar, far an robh Màiri airson an còrr de beatha.

B' i Màiri bu shine dhan teaghlach. Chaidh a bràithrean, Uilleam is Dòmhnall, a Chanada. Choisinn bràthair eile, Seumas, Bonn Òr a' Chomuinn Ghàidhealaich ann an 1928 agus Beasaidh, a b' òige dhen teaghlach, a' bhliadhna an dèidh sin.

Ged a b' ann aig deas a chuir Màiri seachad a' mhòr-chuid dhe beatha bhiodh i fhèin agus a' chlann a' tilleadh dhan Dòrnaidh airson sia seachdainnean a h-uile sàmhradh.

Chaochail Màiri ann an 1953, aig aois trì fichead 's a ceithir, an aon bhliadhna a chaidh a clàradh leis a' BhBC.

Tha sinn an comain Betty Lockhart, nighean Màiri, ann am Maidens ann an Siorrachd Inbhir Àir, airson an fhiosrachaidh seo.