Bliadhna nan ÒranYear of Song

Mairead Hulse

Rugadh Mairead Hulse air an t-siathamh làtha den Damhair, 1934, ann an Stèornabhagh. 'S ann à Tolastadh bho Thuath a bha a màthair, Mairead Iain Aonghais Saighdeir, agus 's ann ann a' Lacasdal a rugadh a h-athair, Seumas Crockett, ged a thogadh e ann an Ceann a' Bhàigh, Steòrnabhagh. Bha ceangal aige, air taobh a mhàthair, ri sgìre Nis.

Bha seachdnar anns an teaghlach, triùir nighean agus ceathrar bhalach, agus 's i Mairead as òige.

An dèidh an sgoil fhàgail bha i ag obair ann am Muileann Kemp, ann an Steòrnabhagh, agus aig Daibhidh Tolmie, air Sràid Fhrangain anns a' bhaile, companaidh a bha cuideachd an sàs ann an gnìomhachas nan clòithtean.

Ann an 1960 phòs Mairead agus Lennox Hulse, à Obar Dheathain.

Bha Mairead a' frithealadh Mhòdan bho bha i na nighean sgoile. Na h-inbheach bha i na ball de Chòisir Ghàidhlig Lacasdail. Thòisich buill a' chòisir, gu h-àraidh Màiri NicLeòid à Brù, a bha na stiùiriche air a' chòisir, agus Iain MacArtair, Lofty, ga piobrachadh airson feuchainn air a' Bhonn Òr.

Rinn i sin airson a' chiad uair ann an 1963 agus choisinn i am Bonn Òr, aig Mòd Dhùn Omhain, ann an 1968.

Ann an 1974 thòisich Mairead ag obair na neach-teagaisg ciùil, a' dol timcheall sgoiltean air feadh Leòdhais, obair anns an robh i an sàs fad fichead bliadhna.

Nuair a thòisich i thuig i nach robh mòran stuthan sgrìobhte airson a cuideachadh a' teagaisg na cloinne, 's le sin thòisich i fhèin air sgrìobhadh, mar eisimpleir:

Aig an aon àm bha cuid den luchd-teagaisg ag iarraidh oirre stuth a' sgrìobhadh a b' urrainn dhaibh fhilleadh a-steach do phròisectean a bha iad a' dèanamh, chionns nach robh mòran ann an Gàidhlig a bha freagarrach.

Ann an Sgoil Lacasdail, gu sònraichte, bha Ceannard na sgoile, Ciorstag Anna NicDhòmhnaill a' cur mòran sgoilearan air adhart airson co-fharpaisean a' Mhòid. Bhiodh Mairead a' sgrìobhadh rannan, dealbhan-chluich agus gnìomh-òrain dhaibh:

Nochd a' chiad chruinneachadh de dh'obair Mhairead anns an leabhar Caoran ann an Cliabh, air fhoillseachadh le Acair ann an 1986. Choisinn e dhith duais litreachais aig Mòd Shruighlea, ann an 1987.

Chaidh Trobhadaibh A-steach fhoillseachadh le Acair ann an 1989 agus nochd Trealaich agus Tuilleadh Trealaich ann an 1998.

Tha na rannan eirmseach aig Mairead rin cluinntinn aig Mòdan, ionadail agus nàiseanta, a h-uile bliadhna: