Bliadhna nan ÒranYear of Song

Kirsteen Ghrannd

Rugadh Kirsteen Ghrannd ann an Glaschu, nighean le Mairead NicAonghais agus Dòmhnall Grannd à Camas Cros as an Eilean Sgitheanach. Tha bràthair aice, Aonghas.

Chaidh a h-athair, Dòmhnall, a chrùnadh mar Bhàrd a' Chomuinn Ghàidhealaich ann an 1935 agus, ged a bha obair làn-ùine aige mar cheannard-sgoile, bha e aig amannan eadar-dhealaichte na neach-deasachaidh air an iris An Gàidheal agus na Cheann-suidhe air a' Chomunn Ghàidhealach agus gu mòr an sàs ann an Comann Sgitheanach Ghlaschu. A bharrachd air bàrdachd, bhiodh e a' sgrìobhadh dealbh-chluichan agus sgeulachdan goirid.

Fhuair Kirsteen a h-oideachadh ann an ceòl agus cuspairean ealain an Oilthigh Ghlaschu mus do lean i oirre le foghlam aig Acadamaidh Rìoghail Ceòl is Dràma na h-Alba, an RSAMD. Fhuair i an tuilleadh ionnsachadh anns an Eadailt agus ann an Lunnainn. Choisinn i Sgoilearachd Caird a chuidicheas luchd-ciùil a dhol gu àitichean air falbh bhon dachaigh airson ionnsachadh fhaighinn aig àrd-ìre.

Tha Kirsteen, a tha pòsta aig Iain MacIllEathain à Bhatarnais san Eilean Sgitheanach, air a bhith a' teagasg ann an Sgoil-chiùil Douglas Academy ann am Muileann Dhaibhidh air iomall Ghlaschu, sgoil a tha na sàr ionad-ciùil nàiseanta. Tha i tric air a bhith na britheamh aig iomadh fèis ciùil.

Tha Kirsteen dèidheil air a bhith a' seinn ann an iomadh stoidhle eadar-dhealaichte, opara agus oratorio nam measg, ach aidichidh i fhèin gur e òrain Ghaidhlig is cudromaiche dhith, co-dhiù tha i a' seinn leatha fhèin no a' stiùireadh còisir.

Choisinn i an t-Aigeallan Airgid aig Mòd 1963 agus Bonn Òr a' Chomuinn aig Mòd Obar Dheathain ann an 1964, agus tha i air a bhith a' stiùireadh Còisir Ghàidhlig Ìleach Ghlaschu, tè de phrìomh chòisirean na Gàidhlig, bho 1991.

Fo a stiùir ghlèidh iad prìomh dhuais nan còisirean, Sgiath MhicShimidh agus Mhorair Thulaich Bhàrdain ann an 1997, 2001 agus 2003. Tha iad air a bhith a' seinn aig an Eisteddfod Eadar-nàiseanta an Llangollen, aig an Fhèis Phan-Ceilteach an Èirinn agus aig Mòd Bhancoubhar.