Bliadhna nan ÒranYear of Song

Iseabail Nic an t-Sagairt

Rugadh agus thogadh Iseabail Nic an t-Sagairt ann an Ìle, air fearann an teaghlaich aig Ceann Tràigh, san Odh'.

Rinn a pàrantan, Mairead Anna à Leòdhas agus Hamish Mac an t-Sagairt cinnteach gum biodh Gàidhlig aig an cuid chloinne, agus tha Iseabail, agus a bràthair, Seumas, agus a piuthar, Deirdre air a bhith a' seinn aig Mòdan bho bha iad beag.

Bhuannaich Iseabail am Bonn Òr aig Mòd Pheairt ann an 2004, ceithir bliadhna às dèidh dha Deirdre a chosnadh aig Mòd Dhùin Omhain.

Tha an teaghlach gu lèir air a bhith an sàs ann an còisirean air feadh na dùthcha, agus, bho thill i a dh'Ìle ann an 2006, tha Iseabail air a bhith a' stiùireadh Còisir Ghàidhlig Ìle. Tha i cuideachd a' cur taic ri Còisir Òg Ghàidhlig Ìle agus Còisir Bun-sgoil na Cille. Tha air soirbheachadh le Còisir Ghàidhlig Ìle thar nam bliadhnaichean agus ann an 2009 bhuannaich iad duais Sheriff McMaster aig a' Mhòd san Òban.

Cheumnaich Iseabail ann am Mandarin agus Iapaneis agus chuir i mòran ùine seachad ann an Sìona, na h-oileanach, agus ag obair na tè-lagha. Chaidh i an uair sin dhan BhBC far an robh i mu dheireadh aig BBC Radio 5 Live.

Lean i dreuchdan ann an conaltradh, ach nas fhaisg air an taigh, le companaidh uisge-beatha, Morrison Bowmore Distillers. Mu dheireadh bha i os cionn taigh-staile Bhogha Mhòir ann an Ìle.

Tha Iseabail a-nis aig an taigh ann an Ceann Tràigh a' togail an ath ghinealach an sin - an dithis chloinne, Ailig agus Maeve - leis an duine aice, Andy Dòmhnallach.