Bliadhna nan ÒranYear of Song

Dànaidh K. MacLeòid agus Calum A. MacLeòid

'S ann san Iuchar sa bhliadhna 1970 a chlàradh an t-òran Dh'Èirich Mi Gu Moch Ro Latha, anns an taigh aig Dànaidh K. MacLeòid, Dànaidh Cheanaidh, air a' Chladach a Tuath air Eilean Cheap Breatainn.

A' seinn còmhla ri Dànaidh tha Calum A. MacLeòid à Sgeir Dhubh, baile beag ri oir na mara an Siorrachd Victoria, beagan is fichead mìle an ear thuath air St Anns.

Thàinig cuideachd Chaluim air taobh athair às na Hearadh agus air taobh a mhàthar às Caolas Scalpaigh. Rugadh e air 29 Sultain, 1898, agus bha e 71 nuair a chaidh an t-òran a chlàradh.

Aig amannan eadar-dhealaichte bha e ag obair a' glacadh bheathaichean airson am bian; bha e ri iasgach ghiomach agus ri obair fearainn. Bha e na èildear san Eaglais agus tric 's e a bhiodh an ceann an t-seinn a' cur a-mach na loidhne nuair a bhite a' seinn nan sailm.

Bha e fad iomadh bliadhna na bhall den chòmhlan sheinneadairean ainmeil, na North Shore Singers. Tha sgeulachd air innse mu chuairt a ghabh e fhèin is Dànaidh agus dithis eile, Tommy Peggy agus Dan Moireasdan, a sheinn ann an theatre ainmeil ann a' Harvard ann an 1955.

Às dèidh làimh tha e coltach gun d' thuirt Dan, "We could get Hollywood interested in our singing next!" Ach 's e freagairt a fhuair e bho Chalum, "You better get your hay in first!"

Sheinn iad cuideachd aig an Fhèis ainmeil ann an Newport ann an 1965, an aon latha agus a nochd Bob Dylan airson a' chiad turas riamh le còmhlan a bha cluiche innealan-ciùil dealain.