Bliadhna nan ÒranYear of Song

Aonghas Dòmhnallach

Rugadh Aonghas Dòmhnallach, Aonghas Ruaraidh Eòghainn, ann an Cliuthar, ann am Bàigh na Hearadh, air 11 Sultain, 1948. B' i Mòrag Aonghais Dhòmhnaill à Cùl na h-Àirde, ann an Àird Àsaig, a mhàthair agus bha aon phiuthar aige, Seasaidh, a tha an-diugh pòsta ann an Colam.

Bha athair Aonghais, Ruaraidh Eòghainn, e fhèin math air seinn agus bha e fìor eòlach air òrain na sgìre. Bhiodh e tric a' seinn aig bainnsean agus anns na taighean cèilidh agus chaidh a chlàradh le Sgoil Eòlais na h-Alba agus leis a' BhBC. B' ann bhuaithe-san a fhuair Aonghas a' chiad ionnsachadh air òrain nam bàird Hearach.

Chaidh Aonghas do Bhun-sgoil Chaolas Stocanais agus às an sin do Sgoil Sir E. Scott air an Tairbeart. An dèidh an sgoil fhàgail chaidh e do Cholaiste an Àiteachais, ann am Baile Mac Ara, airson trì bliadhna.

Thill Aonghas air ais do na Hearadh agus bha e greis ag obair còmhla ri companaidh a bha togail thaighean-comhairle air an Tairbeart. An dèidh sin bha e ag obair an cois fear eile mar pheantair agus a' cumail suas nan taighean-sgoile anns na Hearadh. Chaidh e an uair sin a dh'obair a dh'Inbhir Nis, far an robh e an ceann a chosnaidh mar fhear-reic vending machines.

Bha iarraidh mhòr air Aonghas mun àm seo aig cèilidhean anns gach àite air feadh na Gàidhealtachd agus anns na bailtean mòra. Bha e tric ri chluinntinn air rèidio agus bha e air nochdadh air a' phrògram telebhisean, 'S e Ur Beatha.

Chaochail Aonghas ann an Ospadal na Rathaig Mhòir, ann an Inbhir Nis, air 20 Gearran 1976, aig aois 27, an dèidh a bhith ann an tubaist carbaid. Bha e air a chaoidh gu mòr, fiù 's le feadhainn nach robh eòlach air.

Bha guth làidir, ceòlmhor aige agus bha gach facal anns gach òran cho soilleir dhan fheadhainn a bha na èisteachd ri bhith gam faicinn sgrìobhte air pàipear mun coinneamh. Bha stoidhle aige a bha sònraichte dhà fhèin agus bha e blàth, càilear, eirmseach, mar dhuine.