Bliadhna nan ÒranYear of Song

Sèist / Chorus

Fire, faire, feadh a' bhaile aig na mnathan aosda,
Cha chreid iad nach e breitheanas tha 'n dèidh tighinn an taobh seo,
Coidseachan gun ghearrain air an talamh tarraing dhaoine,
Saoil sibh nach nach e 'n t-Aonadh thug saorsa dhan nàmhaid!

Gur mise ghabh an t-eagal, 's cha bu bheag a ghabh mi dh'uabhas,
Nuair chunnaic mi chùis-eagail, rinn e fead aig Guala Shuarbi,
Chan fhanadh e ri bheannachadh, dol seachad aig taigh Ruaraidh,
'S chan fhaca mi cho luath ris dol suas a' Chlach Àrd.

Tha fear dhiubh ann a' Sgèabost 's gur aighearach iad fèin leis,
Na faiceadh sibh na h-innealan nis an dèidh an gleusadh,
Là thug iad Lachlainn leotha choimhead air taigh Ghèsto
Cha tilleadh esan dhachaidh ann, ged gheibheadh e dha fhèin e.

Sin nuair thuirt Lachlainn ris, "Mo thruaighe mar a dh'èireas!
A Choinnich, nì thu marbhadh, chan fhalbhainn chon na fèill leat.
Innealan gun tùr, gur e ùilleadh tha gan gleusadh,
B'fheàrr leam na brùidean bhiodh ùr bhàrr an t-slèibhe."

'S ann bhios gach cailleach fhearaideach gu h-ealamh dhìom a' faighneachd,
"Cò ris a tha e coltach, na 'm bi e muigh san oidhche?"
Nach iongantach na Sasannaich, gach fear a thèid na bhroinn dhiubh,
'S ann chualas a-raoir gur ann san Fhraing rinneadh àd.

Chan urrainn mis' a choltas a chuir idir ann an clò dhuibh
Tha e air ceithir chuibhlichean grinn agus ròb orra;
Strìochagan de pheanta tarsainn air an t-sròin aige,
Cha b' urrainn mi ga aithneachadh, chan fhanadh e rium dòigheil.

'S e ainm ta air an uidheam sin ta siubhal leoth' gu h-èibhinn
Thig i mar an dealanach à Sasann do Dhùn Èideann;
Thèid i don a h-uile àit', nam b' urrainn i san fhèithe
Gur e motor-càr a their càch ris sa Bheurla.

Sìos Cille Mhoire, thàinig Cron a-mach à saibheir;
Dh'èigh e, "Mhic an Donais, air do shocair!" ris an dràibhear;
Air dha-san bhith na Shasannach cha tuigeadh e a' chainnt seo
'S mharbh e gamhainn Gallda teann air Cnoc Holl.

Suas bruthach Mìobhaig cha ruitheadh e ach mall dhaibh,
Mach a nochd am Breabadair is dileag anns a' cheann aig';
E 'n dùil gur e beairt-fhighe bh' ann, an dèidh tighinn bhon Bhan-Rìgh
Ghabh e staigh a-rithist, 's rinn e sliobhagan den t-seann tè

(Na facail à Gairm, Àireamh 52, Am Foghar 1965)