Bliadhna nan ÒranYear of Song

Sèist / Chorus

Nighean donn a' chuailein rìomhaich,
B' àlainn, uasal buaidh do shinnsir;
Nighean donn a' chuailein rìomhaich,
Ghràdhaich mi do leannanachd.

'S ann a' fuireach thall sna cluaintean
Tha 'n nigh' bhàn a rinn mo bhuaireadh,
Mach o fhìor fhuil ghlain gun truailleadh,
Sìol nam buadh 's na lannaireachd.

An taigh-an-eas a thogadh òg thu
Fo sgàil taighe Taobh a' Chrònain,
Far am biodh na fèidh air lòintean,
'S lòin ri ceòl air mheangain dhut.

An àm don bharraich a bhith brùchdadh,
Bhiodh na smeòraichean a' dùsgadh
Air bhàrr gheugan a sheinn ciùil
'S a thogail cliù mo leannain-sa.

Basan mìne, caoine, tlàtha,
Meòir chaol, fhada dh'iomradh snàtha:
Càite am facas riamh thug bàrr ort
Tarraing snàthad tro anairtean.

Tha do chridhe mar an daoimean
Air latha grèine, 's e ri soillse;
'S e gun ghoimh, gun ghìomh, gun ghaoid ann:
'S mòr do loinn, 's chan ainneamh e.

Thug mi cion, 's chan fhaod mi àicheadh,
Do nighean duinn a' chuailein àlainn;
'S mòr gum b' fheàrr bhith suidhe làmh rith'
Na fìon Spainnt is caineal ann.