Bliadhna nan ÒranYear of Song

Sèist / Chorus

Seinn hìribh o hiùraibh o, hùgaibh o hì,
Seo agaibh an obair bheir togail dom chridh';
Bhith stiùireadh mo chasan dom dhachaigh bhig fhìn
Air crìochnachadh saothair an latha dhomh.

Rachadh treun-fhir an cèin an dèidh sonais is glòir,
Is poitearan gòrach nan tòir don taigh-òst',
Biodh spìocairean crìonta gan iarraidh san òr,
Gheibh mise làn-shòlas nam fhàrdaich.

Seall thall thar an aiseig am fasgadh nan craobh,
Am bothan beag glan ud 's e gealaichte le aol;
Siud agaibh mo dhachaigh, 's i dachaigh mo ghaoil,
Gun chaisteal san t-saoghal as fheàrr leam.

Tha maise an àite ag àrdach' a luach;
Tha 'n t-sòbhrag 's an neòinean a' còmhdach nam bruach;
Tha toman ga dhìonadh o shìon an taobh-tuaith;
'S mun cuairt air tha cluanagan àillidh.

Tha nàdar san àite ud a ghnàth cur ri ceòl;
Mur e an smeòrach san duilleach 's e uiseag sna neòil;
No caochan an fhuarain a' gluasad tron lòn;
No Mòrag ri crònan don phàiste.

Mo dhùrachd 's mo bheannachd dhut, bheanag na loinn,
Tha fritheal' mu 'm fhàrdaich 's ag àrach mo chloinn;
Do chridhe 's do nàdar gun àrdan, gun fhoill,
Ach caoimhneas a' boillsgeadh nad bhlàth-shuil.

Air ciaradh don fheasgar 's mi seasgar fo dhìon,
Mun cuairt air a' chagailt bidh aighear gun dìth;
Na pàistean ri àbhachd 's am màthair ri snìomh,
'S mo chridh-s' air a lìonadh le gràdh dhaibh.

Air falbh uam a' mhòrchuis, an t-òr agus cliù,
Chan eil annta ach faoineas is saobh-ghlòir nach fhiù;
Chan fhàgainn mo dhachaigh 's bean-chagair mo rùin
Gu bhith sealbhachadh lùchairt le bànrigh.