Bliadhna nan ÒranYear of Song

Gur muladach tha mi, tha mo leannan air fàs rium an gruaim
Thug mi gaol bho chionn tamaill 's tha tè eile ga mhealladh siud bhuam;
Nuair a thèid mi dhan leabaidh gura h-aotram mo chadal 's cha suain
Tha leann-dubh orm drùidhte, 's tric snighe mo shùil air mo ghruaidh.

Gur mis' tha fo euslain' bho na chuir iad an snaim air mo ghràdh
'S e do thuras a Mhìcheil a dh'fhàg m' aigne cho ìosal gu làr;
Dh'iarr thu orm dèanamh deiseil gus do bhanais a sheasamh Dimàirt
Rinn thu rithist ath-smaointinn 's dh'fhàg thu mise nam aonar gu bràth.

Tha mi fhathast gun phòsadh, dh'aindeoin sgeòdal 's luchd-innse nam breug
Cha robh dùil agam togail fhad 's a choisichinn slàn air an fheur;
Fhad 's a dh'fhanainn mar bha mi, 's a ghlèidhinn mo nàire 's mo chiall
Cha bu lugha nan caoch a bheireadh ormsa do ghaol a chuir dhìom.

Tha mo cheist air an armann guma camalagach àlainn do ghnùis
Gu bheil maise nad aodann nach cuir duine air an t-saoghal air chùl;
Ach ma rinn thu mo thrèigsinn le tainead mo sprèidh air mo chùl
Beannachd romhad 's nad dheaghaidh 's biodh agad mar roghnaich thu.