Bliadhna nan ÒranYear of Song

Feasgar foghair air acha'- buana,
Saoil sibh fèin nach mi bha suarach!
H-uile tè 's a fear fhèin ri gualainn
Mo leannan donn-sa, gur fhada bhuam e.

Nàile! 'S e mo rùn-s' an cùirteir,
Sgrìobhas litir 's dhan aithn' a dùnadh;
Thèid a-staigh gu bòrd na cùirte,
'S thig a-mach gu cridheil, sunndach.

Nàile! 'S e mo ghaol an saighdear,
Aig am bi na h-airm a' boillsgeadh;
Sgian bheag nan casan daoimean;
'S fhada shiùbhlainn leat an oidhche.

'S trom mo cheum air sàil mo bhrògan,
Dol do'n chlachan air Di-Dòmhnaich;
Bho nach fhaic mi tigh'nn am chòmhdhail,
Am fleasgach donn sin a gheall mo phòsadh.

Ach ma thig thu gu bràth an rathad,
Feuch gun tadhail thu 'n taobh-s' na h-abhainn;
An gaol a bh' againn bidh e 'n glèidheadh,
Gus an càirich saor an snaigheadh.

Sèist / Chorus

Fàill ill ò agus hò ro eile
Fàill ill ò agus hò ro eile
Fàill ill ò agus hò ro eile
A fhleasgaich dhuinn nach ann dhuinn a dh'èirich.

Saoil sibh fhèin nach mi bha truagh dheth,
Feasgair foghair air achadh bhuana;
A h-uile tè 's a fear fhèin ri gualainn
'S mo leannan donn-sa air bhàrr nan cuantan.

Shiùbhlainn, shiùbhlainn, shiùbhlainn fhèin leat,
Shiùbhlainn fada tro choill' nan geug leat;
'S nuair bha mi òg 's mi air bheagan cèille
Gur e do ghaol-sa a rinn mo lèireadh.

Gheall mo mhàthair fàinne òir dhomh,
Gheall m' athair buaile bhò dhomh;
'S ged gheibhinn siud 's an saoghal mòr leis
Gur mòr gum b' annsa leam gaol an òigeir.

Phiuthar ghaolaich dèan gu rèidh rium;
Cùm an crodh is na laoigh bho chèile;
'S ged ghabh mi 'm poca 's ged dh'iarr mi 'n dèirce,
Na cumaibh uam-sa mo rogha cèile.

Dè nam faicinn thu seach a' bhuaile?
Sgealb mi 'n cuman is thilg mi bhuarach;
Chuirinn fhèin mo dhà làimh mun cuairt dhut;
'S cò, a ghaoil, sin a chumadh uam thu?

Cinnidh sòbhraichean anns an earrach;
Cinnidh ùbhlan air bhàrr nam meangan;
Bheir siud am chuimhne-sa pòg mo leannain,
'S a h-uile tè dhiubh air bhlas na meala.