Bliadhna nan ÒranYear of Song

Mi air m' uilinn am leabaidh,
O! cha chadal 's cha tàmh,
Chi mi Eala nan Cuaintean,
Ga toirt uam th' air mo cheann;
'N dèidh 's mo lìon chuir man cuairt di,
'S a cuairteach gu tràigh,
Bha mo dhubhan gun bhiadh air,
'S gum bu dìomhain mo dhàn.

Bha mo dhubhan gun bhiadh air,
'S mi gun airgead am phòc,
No mo chrodh air na buailtean,
No caoirich gan cuairteach gu crò,
No mo làraichean searraich,
Gan teàrnadh gu baile le ceòl;
Och! 's ann rinn thu mo mhealladh
Mar rinn Iùdas nuair dh'iarr e phòg.

B' olc an car a rinn Iùdas,
Nuair dhiùlt e bhith dìleas do 'n chòir,
Ghabh e comhairl' a' mhealltair,
'S thug e mhaighstir thairis don mhòd;
Ged a thug mi dhut samhladh
Le tuit'mas cainnte mo bheòil,
B' e mo dhùrachd gun teagamh,
Bhi sìnte ri d' leisreadh ri m' bheò.

Ged b' e siud mo làn dùrachd,
O na dhiùlt thu mo chaidreabh an dràst',
Chan iongna dhòmhsa bhi dìleas,
Ge b' e neach don innsinn mar bha;
Ge b' e aon neach do 'n innsinn,
Miad ur brìodal thar chàch,
'S thu ann ghlacan gu dìomhair,
S do ghealladh cho cinnteach 's am bàs.

Bha do ghealladh cho cinnteach,
'S ged a sgrìobht' e le peann,
Air a dhaimhneach on Bhìoball
Gum biodh tu dìleas 's gach àm;
Ach ma thèid mi gu còir leat,
Mar bu chòir dhomh dol ann,
'S mi a dhèanadh do phòsadh,
Le m' uile dheòin 's ann gun taing.

Nach eil eagal ortsa a d' anam
Airson bhi eathaich a d' chainnt,
Nach eil thu fo chùram
Airson nan cùmhnantan teann;
Airson nan cùmhnantan daingeann
A bh' againn sa ghleann,
Pòs is ceangal gun fhios,
Ged bhithinn brist le do ghràdh.

Gur tu meann anns a' ghàrradh,
'S cùbhraidh fàile ri m' shròin,
'S tu gheug ùr a dh'fhàs àlainn
Null 's a-nall le gaoith mhòir;
Thàinig osag den ioma-ghaoith,
Sguab i aon de na meòir,
'S an ath-sgrìob thug i rithist,
Rinn i 'n t-slighe bu chòir.

Ged rinn thusa an t-slighe,
'S dh'fhàg thu mise fo bhròn,
Mar fhear garadh gun mhios mi,
Mar dhuine misgeach ag òl,
Mar shaighdeir gun chlaidheamh,
Mar ghobhainn gun òrd,
Mar shealgair gun ghunna
No mar chuilean gun sròin.

Mar chuilean gun sròin mi,
'S mi air cùl-luirg an ròin,
Nuair shaoil leis bhi aige,
Damh cabrach na cròic;
Fhleasgaich òig na cuir d' earbsa
Anns a' chalg th' air an fhiadh,
Ged fhaigh thu greim air bhàrr cròic air
Na cuir do dhòchas na bhian.

Na cuir dòchas ro làidir
Ann am bàta gun stiùir,
No 's a' bhreac air an linne,
No an eilid nan stùc,
Anns an ròn th' air a' chladach
Na cuir idir do dhùil,
No 's an t-sionnach bheag charach,
Ged robh e 'm fagas do d' chù.

Greim air eàrr air a' bhradan,
No air chois deiridh air fiadh,
No air sgèith muice-mara,
'S gum bu sleamhainn i riamh;
Greim air chliathaich air loingeas,
'S ceart co-ionnan an gnìomh,
Is air làmh na h-ùr chailin
Bha gam mhealladh seachd bliadhn'.

Ach cuim am bithinn fo mhulad,
Fo thuireadh no pràmh,
Agus fios aig an t-saoghal
Cò a dh'aom anns an fhàil'n;
Mar thug Eubh 'n car às an duin' aic,
Nuair bha iad 's a' ghàrr',
'S ann mar sin tha mis' leatsa
Air mo mhealladh an-dràst'.

Air mo mhealladh a tha mi
Le do mhànran 's gach uair,
Ach cuim an cuirinn ort coire,
Nan fana' tu bhuam;
Nuair bhithinn fo àmhghar,
Bhidh do làmh orm mun cuairt,
'G ràdh - "De 'n smuainrean th' air d' aire?
Cha toir fear gu bràth mise bhuat."

Is ionnan siud 's mar a thachair
Don aisleachan ùr,
'N gaol, chaolaich a chasan,
Agus dh'fhail e a chrùn;
Ghoid e bhòidhchead a bh' aige,
Agus phrap e a ghnùis,
Mar chraoibh gun fhreumhan air seachda,
'S i neo-dhreachmhor do 'n t-sùil.

Bu tu an rimhinn ùir uasail
Le d' chuman is buarach a' d' dhòrn,
Tarraing suas le d' chuid ghruagach,
Air feadh chruidh ruaidh thàin' à Bòid,
A chruidh dhuibh thàin' à Ile,
'S a chruidh bhàin thàin' à Leòdhs',
'S car thu Dhròbhair nan ciadan,
Fear thionnda lìonmhor nan còrn.

'S tu 'n fhaoilinn is gile,
No sneachd ga chur air an lòn,
'S tu 'n tàrmachan ceutach,
'S a' Bheinn Èibhinn 'm bi 'n ceò;
'S tu chuthag ghorm cheutach,
Madainn Chèitein chiùin cheòth'r.
'S tu 'n smeòrach air gheugan,
'S fheadan gleuiste chum ceòil.

Gur tu 'n liath-chearc 's an doire,
'S moich' a ghoireas le fuaim,
'S tu mo cheòl dol a chadal
'S anns a' mhadainn 'n àm gluasd;
An Taigh-mòra nan uinneag,
'S àrd a chluinninn mo rùn,
'S ann an coille nam badan,
'S tric am ghlacan bha thu.