Bliadhna nan ÒranYear of Song

Sèist / Chorus

An tèid thu leam a Mhàiri
An tèid thu leam a Mhàiri
An tèid thu leam a Mhàiri dhonn
Gu tìr nam beanntan àrda?

Tha crodh agam air àirigh
Tha laoigh an cois am màthair
Tha sin agam is caoraich mhaol
Air aodann nam beann àrda.

Dh'aithnichinn fhìn do bhàta
Steach mu Rubh' na h-Àirde
Brèidean geala anns an t-seòl
Is Clann Mhicleòid gan càradh.

Cha tèid mi leat a Ghàidheil
Mo dhùthaich chaoidh chan fhàg mi
Gur bochd am fonn 's tha an t-aran gann
An tìr nan gleann 's nan àrd bheann.

Dreach 2:

Sèist / Chorus

An tèid thu leam a ghràidheig,
'S am falbh thu leam thar sàile,
An tèid thu leam air bhàrr nan tonn,
Gu tìr nan gleann 's nan àrd-bheann?

Led chumadh dealbhach, àillidh,
Mar dheàlradh reult na fàire;
'S e d' nàdar ciùin, do bhàigh, 's do mhùirn,
A leag a rùin mo ghràdh ort.

Cha tèid mi leat a Ghàidheil,
Mo chàirdean gaoil chan fhàg mi,
Cha tèid mi leat a thìr nam beann,
Chan fhàg mi clann mo mhàthair.

Cha tèid mi leat a Ghàidheil,
Mo dhùthaich chaoidh chan fhàg mi,
Oir 's bochd am fonn, 's tha an t-aran gann,
An tìr nan gleann 's nan àrd bheann.

Cha tèid mi leat a Ghàidheil,
Chan eil do thaigh ach tàireil,
'S bhithinn fo sprochd, nam bithinn bochd,
An tìr nan cnoc 's nan àrd bheann.

Ged nach eil mo luing' air sàile
Gu saibhreas dhèanamh 'n àird dhomh
Thèid bàt' is lìon gach latha gu rian,
'S bidh agad iasg gu t-àilghios.

Stad a-nis a Ghàidheil
Mo ghaol, mo rùn 's mo làmh dhut;
'S gun tèid mi null gu tìr nam beann
On choisinn fonn do dhàin mi.