Rinn e bàrdachd is òrain air iomadh cuspair

Rinn e bàrdachd is òrain air iomadh cuspair. Rinn e tòrr de dh'òrain dhan t-seòrsa ris an can sinn bàrdachd baile, rudan beag a bha tachairt as an àite, daoine bha dèanamh rudan annasach, no daoine a bha dèanamh rudan a bha cuir cais air a' bhàrd, 's dòcha, cuideachd. Agus dhèanadh e òrain èibhinn, sgaiteach, no òrain dì-molaidh, no mar sin air na rudan sin. Bha tòrr dhan a' bhàrdachd sin aige. 'S e Briogais Mhic Ruairidh eisimpleir dhan a' sin.

Rinn e beagan de dh'òrain gaoil, mar Iseabail NicAoidh, ach cha robh sin ach òran dhan an nighean aig Iain Mac Eachainn, a chaidh a thogail còmhla ris, cha b' e fìor òran gaoil, ach rinn e fear no dhà eile cuideachd.

Cha do rinn e cus de dh'òrain air na cuspairean air a bheil na bàird, air an àbhaist dha na bàird Ghàidhlig a bhith mach, mar gaol is nàdar is a' leithid sin. Rinn e òran air Gleanna Gallaidh, no Gleann-a-Gallaidh, mar a chanas iad as na ceàrnaidhean sin, agus tha 'n t-òran sin air a sheinn fhathast. Ach chan e sin, chanainn-sa, a' phrìomh bhàrdachd aig a' bhàrd, na rudan a rinn e air na cuspairean sin. Agus sin as coireach, tha mi smaoineachadh, gu robh daoine rud beag teagmhach mu dheidhinn riamh am measg na bàird Ghàidhlig, nach robh buileach, a bhiodh air ainmeadh.. nach robh 'n t-ainm aig' le meas is miadh air a bheil e airidh.

Rud air a' robh e mach, rud air a' robh Rob Donn.. A' seòrsa cuspair a bu trice a bh' aig Rob Donn, 's ann mu dheidhinn daoine, a' toirt a bheachd air daoine. Bha e coimhead mun cuairt air air dè bha daoine dèanamh, dè seòrsa dol a-mach a bh' aca, rudan a bha dol as a' choimhearsnachd, bha e toirt a bheachd air a' sin. Canaidh tu aoir ris a' sin, ach tha facal aoir a chleachdadh ann an Gàidhlig airson seòrs' eile bàrdachd cuideachd, canaidh tu gur e bàrdachd càinidh no dì-moladh a th' ann, far a bheil bàrd dìreach a' cur sìos air duine, no uaireannan air rud, mar an cnatan, no radan, no rudeigin mar sin. Ach, cha b' e sin a bh' anns na h-aoirean aig Rob Donn, 's ann a bha e coimhead timcheall air 's a' toirt beachd, beachd moralta glè thrice, air dè bha 'n duine air a dhèanamh, no dè seòrsa dol a-mach a bh' aig daoine, agus sin chanainn a' phrìomh chuspair a th' aige.