Cuspairean

'S ann airson òrain, seach bàrdachd sgrìobhte, as ainmeile a tha Murchadh MacPhàrlain. Canaidh cuid gum b' e an t-òranaiche Gàidhlig a b' fheàrr anns an linn a chaidh seachad. Tha na h-òrain aige air an seinn le cuid de shàr-sheinneadairean na Gàidhlig agus le còmhlain mar Na h-Òganaich (gu h-àraidh), Na Siaraich, Runrig agus Capercaillie.

Bhiodh e fhèin a' cur fuinn ri na h-òrain mar a bha e gan dèanamh, fuinn bheòthail le blas an latha an-diugh orra, ged a bhiodh cuid de na còmhlain a' cur an dreach fhèin orra.

Tha tòrr ciùil ann am faclan nan òran aige cuideachd. Mar eisimpleir, 'Shil mo shùil nuair chaidh siùil / Ri croinn ùra chaol àrd, / Rìgh, 's mo rùn-sa nam bàrr' - agus ruitheaman làidir a tha gar giùlan gu siùbhlach tro na h-òrain no, uaireannan, a' samhlachadh cuspair àraidh – mar tulgadh na mara san eisimpleir gu h-àrd.

Tha 'dràma' anns na h-òrain aig MacPhàrlain. Tha glè thric caractaran aige anns na h-òrain – mar an saighdear agus a leannan ann an 'Naoi Ceud Deug 's Ceithir Deug' – airson an suidheachadh a thoirt beò agus gus am bi co-fhaireachdainn againn riutha. Uaireannan bidh còmhradh eadar na caractaran anns na h-òrain, rud a tha a' cur ris an dràma.

'S e bàrdachd airson a seinn a tha seo. Bidh MacPhàrlain uaireannan ag atharrachadh òrdugh àbhaisteach nam faclan ann an t-seantans. Mar eisimpleir, 'Cha bhi uat mi ach ràith' an àite 'Cha bhi mi uat ach ràith', rud a tha a' glacadh ar n-aire ann an òran ach nach obraicheadh cho math air an duilleig. 'S e bàrdachd airson èisteachd rithe, chan ann airson a leughadh, a tha seo.

Tha dibhearsain, tiamhaidheachd agus breithneachadh anns na h-òrain aig Murchadh MacPhàrlain. Tha e a' ruith air raon mhòr de chuspairean. A' Ghàidhlig agus a' Ghàidhealtachd, tachartasan mar dol-fodha na h-Iolaire, obraichean traidiseanta mar an t-iasgach, cogadh (bha e gu làidir an aghaidh cogadh), ceistean sòisealta mar buaidh na dibhe, gaol (ann an riochd spòrsail mar as trice), cianalas, seann chleachdaidhean, dòigh-beatha an latha an-diugh ('Linn Greas ort') agus mar sin air adhart. A bharrachd air an sin, rinn e grunn mhòr de dhuain aotrom mu dhaoine a dh'aithnicheadh e no mu rudan a thachair dha.